Read Uzbek Muqaddas Kitob Ishayo 41 Bible Online

Ishayo 41 - Uzbek Muqaddas Kitob bible

Ishayo 41

¹Egam aytar: “Mening oldimda sukut saqlang, Ey dengiz ortidagi yurtlar! Xalqlarning kuchi qayta tiklansin. Ular yaqinroq kelib, gapirsinlar. Hukm qilishga birga yigʻilaylik.

²Kim sharqdan gʻolib shohni[238] chaqirdi?! Kim uni Oʻz xizmatiga chaqirdi?! Kim unga elatlarni boʻysundiradi?! Kim shohlarni oyogʻi ostida ezadi?! Gʻolib shoh oʻz qilichi bilan Ularni chopib tashlaydi, Yoyi bilan ularni somonday uchiradi.

³Ularni ta’qib qiladi, Oyoq bosmagan yoʻldan yuradi, Oʻsha joylardan eson — omon oʻtadi.

⁴Bu voqealar ortida turgan kim?! Boshidan avlodlarni dunyoga keltirgan kim?! Men emasmi?! Azaldan Men sizning Egangizman, Oxirgacha ham Egangiz boʻlaman.

⁵Dengiz ortidagi yurtlar Buni koʻrib, qoʻrqadi. Yer yuzining toʻrt burchidan titrab, Ular yaqinlashib keladi.

⁶«Qoʻrqmagin», deya hamma Bir — biriga dalda beradi.

⁷Mana, hunarmand odam Tilla ustasiga dalda beradi. Misgar: «Ha, yaxshi chiqdi», deb Temirchiga dalda beradi. Yiqilib tushmasin deb, butni mixlab qoʻyadi.

⁸Ammo sen — chi, ey qulim Isroil, Ey Oʻzim tanlagan Yoqub nasli, Doʻstim Ibrohimning avlodi!

⁹Seni yerning toʻrt burchidan olib keldim, Yerning olis burchaklaridan chaqirdim. Aytdimki: «Sen Mening qulimsan, Seni tanladim, rad etmadim.»

¹⁰Qoʻrqma, Men sen bilan birgaman, Vahimaga tushma, Men sening Xudoyingman. Senga kuch beraman, Oʻzim yordamga kelaman, Gʻolib oʻng qoʻlim bilan seni qoʻllayman.

¹¹Ha, senga qarshi boʻlganlarning hammasi Sharmandayu sharmisor boʻlib qoladi, Dushmanlaring yoʻq boʻladi, nobud boʻladi.

¹²Urush qiladiganlarni izlab ham topa olmaysan, Sen bilan jang qilganlar tamomila tugab bitadi.

¹³Men Oʻzim, Egang Xudo, oʻng qoʻlingni kuchaytiraman, Senga: «Qoʻrqma, Oʻzim yordamga kelaman» degan Menman.”

¹⁴Egamiz shunday aytmoqda: “Qoʻrqma, ey Isroil xalqi, Yoqub nasli! Sen kichkina bir chuvalchangdaysan. Ammo Oʻzim senga yordam beraman. Men, Isroil xalqining Muqaddas Xudosi, Sening qutqaruvchingman.

¹⁵Sendan bugʻdoy yanchadigan xoʻptir[239] yasayman, Yangi, oʻtkir, tishli xoʻptir qilaman, Sen togʻlarni yanchasan, ezasan, Tepaliklarni[240] somon qilasan.

¹⁶Sen ularni sovurib tashlaysan, Ularni shamol uchirib ketadi. Boʻron ularni toʻzgʻitadi, Sen esa Men — Egang tufayli sevinch topasan, Isroil xalqining Muqaddas Xudosi ila maqtanasan.

¹⁷Qashshoqlaru muhtojlar suv izlar, Ammo suv yoʻq. Ogʻizlari chanqoqdan qurib ketgan. Men, Egangiz, ularga javob beraman, Men, Isroil xalqining Xudosi, ularni tark etmayman.

¹⁸Yalangʻoch tepaliklardan daryolar oʻtkazaman, Vodiylar oʻrtasida buloqlar ochaman. Sahrolarni suv toʻla hovuzlarga aylantiraman, Qaqragan yerda buloqlar ochaman.

¹⁹Choʻlda sadr, akas, zaytun daraxtlarini, Hamda mirta butalarini[241] oʻstiraman, Sahroda sarv, archa, qaragʻay daraxtlarini oʻstiraman.

²⁰Mana, hamma koʻrib bilsin, Bularni Men, Egangiz, Oʻz qoʻlim bilan qilganimni ular tushunsin. Men, Isroil xalqining Muqaddas Xudosi, Bularni yaratganimni ular anglab yetsin.”

²¹Yoqub naslining Shohi — Egamiz, shunday deydi: “Da’volaringizni ayting, Isbotingizni keltiring.

²²Qani, butlaringizni olib keling, Kelajakda nima boʻlishini Butlaringiz aytib bersin. Oʻtmishda boʻlganlarni tushuntirsin — chi! Oʻshalar haqida oʻylab koʻraylik. Oxiri nima boʻlishini bilaylik. Ha, boʻladiganlarni bizga aytsin.

²³Ey butlar! Kelajakni bizga bildiring, Shunda xudo ekanligingizni bilamiz. Biron yaxshilik yoki yomonlik qilib koʻring — chi, Koʻrib, birgalikda vahimaga tushaylik.

²⁴Axir, sizlar hech nima emassiz, Ishlaringiz esa undan ham battar. Sizni tanlaganning oʻzi jirkanchdir.

²⁵Men shimoldan bir yetakchi[242] chaqirdim. Ana, u keladi. Sharqdan kelib, Mening nomimga shuhrat keltiradi. Hukmdorlarni u tuproqday oyoq osti qiladi, Kulolning loyiday qilib tepkilaydi.

²⁶Kim buni oldindan aytibdiki, biz bilibmiz?! Kim buni ilgari bildiribdiki, «U haq edi», deb aytsak?! Butlar bu haqda gapirmadi, xabar bermadi, Hech kim ularning ovozini eshitmadi.

²⁷Men, Egangiz, birinchi boʻlib bu xushxabarni Quddusga yetkazdim, Sionga elchi joʻnatib, shunday deb aytishni buyurdim: Xalqing kelyapti! Ular uylariga qaytib kelishyapti!

²⁸Men butlarga qaradim, Lekin ular Menga hech narsa aytmadi. Savolimga ular javob bermadi.

²⁹Qarang, butlarning hammasi soxta, Qilgan ishlari hech nima emas, Hamma butlar shamolday behuda.”