Read Uzbek Muqaddas Kitob Ishayo 42 Bible Online

Ishayo 42 - Uzbek Muqaddas Kitob bible

Ishayo 42

¹Egam aytar: “Mana Mening qulim, Oʻzim uni qoʻllab — quvvatlayman. Men Oʻzim uni tanlaganman. Undan juda mamnunman. Men unga Oʻz Ruhimni berdim, U elatlarga adolat keltiradi.

²U baqirmaydi, qattiq gapirmaydi, Koʻchalarda ovozini baland koʻtarmaydi.

³Ezilgan qamishni sindirmaydi, Tutayotgan pilikni oʻchirmaydi, Sodiq boʻlib, adolat keltiradi.

⁴Yer yuzida adolat oʻrnatmaguncha U holdan toymaydi, Uning jasorati soʻnmaydi. Dengiz ortidagi yurtlar Uning yoʻl — yoʻriqlarini kutadi.”

⁵Xudo, bizning Egamiz shunday aytmoqda: “Men osmonni yaratib, uni yoyganman[243], Yerni yaratib, uni toʻldirganman, Yer yuzidagi insonlarga jon ato qilganman, Jamiki odamzodga hayot berganman.

⁶Men, Egang, najot olib kelish uchun seni chaqirdim. Men sening qoʻlingni kuchaytiraman, Oʻzim seni himoya qilaman. Xalqim bilan tuzgan ahdimni Sen orqali amalga oshiraman, Jamiki elatlarga sen orqali nur sochaman.

⁷Sen koʻrlarning koʻzlarini ochasan, Mahbuslarni zindondan ozod qilasan, Zulmatda oʻtirganlarni qutqarasan.

⁸Men Egangizman! Mening nomim shudir! Men shuhratimni birovga bermayman, Oʻzimga munosib boʻlgan hamdu sanoni Butlar bilan baham koʻrmayman.

⁹Men sizlarga kelajakdagi voqealarni Yuz bermasdan oldin aytyapman. Oldin ayon qilganlarimga qarang, Ana, oʻshalar bajo boʻldi — ku!”

¹⁰Egamizga yangi bir qoʻshiq ayting! Yer yuzining har bir chetidan Egamizni tarannum eting! Ey kemalarda suzib keladiganlar, Dengizdagi barcha jonzotlar, Egamizga qoʻshiq ayting! Ey dengiz ortidagi yurtlaru Bu yurtlarni toʻldirganlar, Egamizga qoʻshiq ayting!

¹¹Sahrolar, u yerdagi shaharlar xitob qilsin, Kedar[244] qishloqlarining ahli shod boʻlsin! Sela[245] ahli shodlikdan kuylasin, Togʻ choʻqqilaridan hayqirsin!

¹²Ular Egamizni ulugʻlasin, Dengiz ortidagi yurtlarda ham Unga hamdu sanolar aytsin!

¹³Egamiz bahodir yigitday olgʻa bosadi, U gʻayratli jangchiday keladi, xitob qiladi. Hayqirib, dushmanlaridan ustunligini koʻrsatadi.

¹⁴Egam aytar: “Uzoq vaqt sukut saqladim, Jim turdim, Oʻzimni tutdim. Endi esa tugʻayotgan ayolday Ogʻir nafas olaman, faryod qilaman.

¹⁵Togʻu tepaliklarni vayron qilaman, Jamiki oʻt — oʻlanni quritaman, Irmoqlarni quruq yerga[246] aylantiraman, Hatto botqoqliklarni quritaman.

¹⁶Koʻzi ojizlarni bilmagan yoʻllaridan boshlab boraman, Ularni notanish soʻqmoqlardan olib boraman. Koʻzlaridagi zulmatni nurga aylantiraman, Oʻnqir — choʻnqir yoʻllarni tekislayman. Mana shu aytganlarimni qilaman, Ularni tark etmayman.

¹⁷Butlarga ishonganlar uyatga qoladi. Ha, butlarni «xudolarimiz» deydiganlar Sharmandayu sharmisor boʻladi.

¹⁸Eshiting, ey karlar, Qarang, koʻrib qoʻying, ey koʻrlar!

¹⁹Mening qulimday koʻr boʻlgan bormi?! Men yuborgan xabarchiday kar boʻlgan bormi?! Men tanlaganlarimday koʻr boʻlgan bormi?! Men, Egangizning quliday koʻr boʻlgan bormi?!

²⁰Ey xalqim! Koʻp narsalarni koʻrasiz — u, e’tibor bermaysiz, Quloqlaringiz ochigʻu eshitmaysiz.”

²¹Oʻz adolati haqi, Egamiz Oʻz qonunlarini Ulugʻ va sharafli qilmoqni istadi[247].

²²Ammo bu xalq talon — taroj qilingan[248], Hammasi zindonda tutqun, qamoqqa tashlangan. Ular qoʻlga tushdi, qutqaradigani yoʻq. Ular oʻlja boʻldi, “Qaytarib ber” deydigani yoʻq.

²³Qaysi biringiz bularni eshitasiz, E’tibor berib, oʻtmishga quloq solasiz?!

²⁴Yoqub naslini oʻlja qilib qoʻygan kim? Isroil xalqini talonchilarga bergan — chi? Egamiz emasmi?! Axir, biz Unga qarshi gunoh qildik — ku! Uning yoʻlidan yurishni istamadik, Uning yoʻl — yoʻriqlariga quloq solmadik.

²⁵Shu bois Egamiz qaqshatqich gʻazabini, Shafqatsiz urushni boshingizga keltirdi. Alanga sizni oʻrab olsa ham tushunmadingiz, Sizlarni kuydirsa ham, anglab yetmadingiz.