Read Uzbek Muqaddas Kitob Ishayo 43 Bible Online

Ishayo 43 - Uzbek Muqaddas Kitob bible

Ishayo 43

¹Endi, ey Yoqub nasli, seni yaratgan Egamiz gapirmoqda! Ey Isroil xalqi, seni barpo qilgan Egamiz shunday aytmoqda: “Men seni qutqardim, Sening ismingni aytib chaqirdim, Sen Menikisan, qoʻrqma!

²Suvlardan oʻtganingda Men sen bilan birga boʻlaman. Daryolardan oʻtganingda Suvlar seni koʻmmaydi. Olovdan oʻtganingda Alanga seni yondirmaydi, Olov tafti seni kuydirmaydi.

³Ha, Men Egang Xudodirman, Isroil xalqining Muqaddas Xudosi — qutqaruvchingman. Sen uchun toʻlov qilib Misrni berdim, Habashiston[249], Savo[250] yurtlarini sening oʻrningga berdim.

⁴Koʻz oldimda azizsan, qadrlisan, Men seni sevaman. Shu bois sening evazingga odamni, Joning evaziga xalqlarni beraman.

⁵Qoʻrqma, Men sen bilan birgaman, Naslingni sharqdan olib kelaman, Sizlarni gʻarbdan yigʻib kelaman.

⁶Shimolga: «Ularni ber», deyman. Janubga: «Ularni ushlab qolma», deb aytaman. Oʻgʻillarim uzoqlardan, Qizlarim yerning chetlaridan kelsin.

⁷Menga tegishli boʻlganlarni Oʻz shuhratim haqi yaratdim, Oʻzim ijod qilib, ularni bino qildim.”

⁸Egamiz shunday demoqda: “Xalqimni yigʻinglar. Koʻzi bor, ammo koʻr boʻlgan, Qulogʻi bor, ammo kar boʻlgan xalqimni toʻplanglar.

⁹Jamiki elatlar birga yigʻilsin. Qani, xalqlar kelib qoʻshilsin. Ularning orasidan kim buni aytib beradi?! Oʻtib ketgan narsalarni kim bizga bildiradi?! Guvohlarini chaqirib, haqligini isbotlasin, Boshqalar eshitib: «Bu toʻgʻri», deb aytsin.”

¹⁰Egamiz shunday aytmoqda: “Sizlar Mening shohidimsizlar, Sizlar Mening qulimsizlar. Meni bilsin, Menga ishonsin, deb Tanho Xudo Men ekanligimni bilsin, deb Sizlarni tanladim. Mendan oldin biron xudo boʻlmagan, Mendan keyin ham boʻlmaydi.

¹¹Men Egangizman! Yolgʻiz Men Egangizman, Mendan boshqa qutqaruvchi yoʻq.

¹²Men Oʻzim aytdim, qutqardim, bildirdim, Orangizda boshqa biron xudo yoʻq.” Egamizning kalomi shudir: “Men Xudoman, sizlar Mening shohidlarimsiz.

¹³Ha, azaldan buyon Men Oʻshaman, Hech kim Mening qoʻlimdan qutula olmaydi. Men qilganimni kim bekor qila oladi?!”

¹⁴Isroil xalqining Muqaddas Xudosi, qutqaruvchingiz — Egamiz shunday demoqda: “Sizlarni deb Bobil ustiga lashkar yuboraman, Oʻzlari faxrlangan kemalarda Bobilliklar[251] qochishga majbur boʻladilar.

¹⁵Men Muqaddas Xudoyingiz — Egangizman, Isroil xalqining Yaratuvchisi — Shohingiz Menman.”

¹⁶Egamiz shunday demoqda: “Men dengizni boʻlib, yoʻl ochdim, Bahaybat suvlar ichra soʻqmoq qildim[252].

¹⁷Jang aravalariyu otlarni, Lashkaru jangchilarni olib chiqdim. Ana ular yotibdilar, turmaydilar. Pilikday miltirab, oʻchib qolganlar.

¹⁸Oʻtmishdagilarni yodga olmang, Qadimgilarni oʻylayvermang.

¹⁹Mana, Men yangi bir ish qilyapman. Shu paytning oʻzidayoq sodir boʻlyapti! Koʻrmayapsizmi?! Men sahroda yoʻllar ochaman, Ha, choʻlda daryolar yarataman.

²⁰Hatto yovvoyi hayvonlar Meni ulugʻlaydi, Chiyaboʻri, tuyaqushlar ham Meni sharaflaydi. Zotan, tanlagan xalqimga suv beray deya, Sahroga suvlar yubordim, Choʻlda daryolar yaratdim.

²¹Bu xalqni Oʻzim uchun yaratganman. Ular Menga hamdu sano aytsinlar.

²²Sen esa, ey Yoqub nasli, Menga sajda qilmading! Ey Isroil xalqi, sen Mendan bezor boʻlding!

²³Sen Menga qoʻylaringni atamading, Ularni kuydiriladigan qurbonlik qilmading. Meni ulugʻlash uchun qurbonliklar keltirmading. Men nazr — qurbonliklarni sendan Me’yoridan koʻp talab qilmadim — ku! Xushboʻy tutatqilarni sendan Ortigʻi bilan soʻramadim — ku!

²⁴Sen Menga xushboʻy qamish sotib olmading. Qurbonliklar yogʻini keltirmading, Meni rozi qilmading. Evoh, gunohlaring bilan Menga yuk boʻlding, Ayblaring bilan Meni charchatding.

²⁵Oʻzimning haqi — hurmatim Ayblaringni kechiradigan Menman. Gunohlaringni yodga olmayman.

²⁶Qani, birga da’volashaylik. Gapir! Aybsizligingni isbotla — chi! Yodimga sol — chi!

²⁷Axir, eng katta bobong[253] gunoh qilgandi. Paygʻambaru ruhoniylaring Menga qarshi chiqqandi.

²⁸Shu bois muqaddas maskanning Boshliqlarini harom qilaman. Ha, Yoqub naslini halokatga, Isroil naslini haqoratga hukm etaman.”