Read Uzbek Muqaddas Kitob Ishayo 44 Bible Online

Ishayo 44 - Uzbek Muqaddas Kitob bible

Ishayo 44

¹Egam aytar: “Endi eshit, ey qulim Isroil! Ey Yoqub nasli! Men seni tanlaganman.

²Men, Egang, seni yaratganman, onang qornida senga shakl berganman. Sening madadkoring, Men, shunday aytmoqdaman: «Qoʻrqma, ey aziz Isroil![254] Ey Yoqub nasli, Men seni tanlaganman.

³Chanqoq yerga Men suv beraman, Qaqragan tuproqda irmoqlar oqizaman. Naslingga Ruhimni beraman, Zurriyoting ustiga Oʻz barakamni yogʻdiraman.

⁴Ular oqar suv boʻyidagi tol daraxti kabi, Maysalar orasidan oʻsib chiqadi.

⁵Biri: ‘Men Egamnikiman’, deb aytadi, Boshqasi Isroil xalqiga[255] qoʻshilay deb keladi. Yana biri qoʻliga ‘Egamniki’ deb yozadi — da, Isroil xalqining biriman, deb aytadi.»”

⁶Isroil xalqining Shohi, ularning qutqaruvchisi, Sarvari Olam — Egamiz shunday aytmoqda: “Birinchiyu oxirgi Men Oʻzimman, Mendan boshqa Xudo yoʻq!

⁷Kim Menga oʻxshaydi? Qani, gapirsin — chi! Qadimiy xalqni yaratganimdan beri Nima boʻlganlarini boshdan aytib bersin! Kelajakda nima boʻlishini bildirsin.

⁸Vahimaga tushmang, qoʻrqmang! Men sizlarga nima boʻlishini Oldindan e’lon qildim — ku! Sizlar Mening guvohlarimsiz! Mendan boshqa Xudo bormi?! Yoʻq, boshqa Qoya yoʻq. Men boshqa hech birini bilmayman!

⁹But yasaydiganlarning hammasi hech narsadaydir. Xush koʻrgan butlari hech foyda keltirmaydi. Oʻsha butlarning guvohlari koʻr, johildir. Shuning uchun ular sharmanda boʻlib qoladi!

¹⁰Axir, kim foydasiz xudolarning tasvirlarini yasaydi?!

¹¹Hali oʻsha butparast doʻstlarning hammasi sharmanda boʻladi. But tayyorlovchilarga qarang. Ular ham oddiy odamlar — ku! Qani, hammasi toʻplansin! Ular qoʻrquvga tushib, birgalikda sharmandayu sharmisor boʻladi.

¹²But yasaydigan temirchi asbobini oladi. Buyumni koʻmir choʻgʻi ustida qizdiradi. Bolgʻasi bilan uni yasaydi. Qoʻlining kuchi bilan ishlaydi. Qorni ochib, holdan toyadi. Tashnalikdan sillasi quriydi.

¹³Duradgor ip bilan yogʻochni oʻlchaydi. Xohlagan shaklini chizib olib, randa bilan ishlov beradi. Uni inson shaklida yasaydi. Unga inson chiroyini beradi — da, sajdagohga oʻrnatadi.

¹⁴Oʻrmonda sarv, eman daraxtlarini tanlaydi. U oʻzi uchun sadr daraxtlaridan kesib oladi. Yoki qaragʻay daraxtini oʻtqazadi. Yomgʻir esa oʻsha daraxtni oʻstiradi.

¹⁵Keyin bular odamga oʻtin boʻladi. Odam yogʻochning ba’zilarini olib isinadi. Ba’zilarini esa yoqib, non yopadi. Yana oʻziga xudo ham yasab, unga sajda qiladi. But yasab, unga muk tushib, ta’zim qiladi!

¹⁶U oʻtinlarning yarmini yoqadi. Olovda goʻsht pishirib, qornini toʻydiradi. Isinib boʻlgach: «Oh, oh, isinib oldim, olovning taftidan jonim orom olyapti», deydi.

¹⁷Yogʻochning qolganidan esa xudosini, oʻzining butini yasaydi. «Meni oʻzing qutqar, axir, sen mening xudoyimsan!» deb butga ibodat qiladi, muk tushib sajda etadi.

¹⁸Ular hech narsani bilmaydilar, tushunmaydilar. Koʻzlariyu yuraklarida toʻsiq bor, ular koʻrmaydi, tushunmaydi.

¹⁹Birortasi ham oʻylab koʻrmaydi. «Oʻtinning bir qismini yoqdim. Olovida non yopdim, goʻsht pishirib yedim. Endi qolganidan jirkanch narsa yasaymanmi?! Yogʻoch gʻoʻlasiga ta’zim qilamanmi?!» deb aytishga aql — idrok yoʻq.

²⁰Eh, kul yeydiganlar! Aldangan qalbi uni adashtiradi. U oʻz jonini qutqara olmaydi. «Qoʻlimdagi shu narsa soxta — ku!» deb oʻziga aytmaydi.

²¹Ey Yoqub nasli! Ey Isroil xalqi! Bularni yodda tut! Sizlar Mening qulimsiz. Men sizlarni yaratdim, Ha, sizlar Mening qulimsiz! Ey Isroil, Men sizlarni unutmayman!

²²Gunohlaringizni bulutday haydadim, Ayblaringizni tumanday tarqatdim, Sizlarni qutqarganman, Menga qayting.”

²³Ey samolar, shodlikdan hayqiring! Mana, Egamiz ajoyib bir ish qildi! Hayqiring, ey zaminning tubsiz joylari! Shodlikdan hayqiring, ey togʻlar, Ey oʻrmon, oʻrmondagi har bir daraxt! Ha, Egamiz Yoqub naslini qutqarib, Oʻziga oldi. U Isroil xalqi orasida ulugʻlanmoqda.

²⁴Qutqaruvchingiz, onangiz qornida sizga shakl bergan Egamiz shunday aytmoqda: “Hammasini yaratgan Men Egangizman, Yolgʻiz Oʻzim samolarni yoyganman![256] Bir Oʻzim zaminni yaratganman!

²⁵Folbinlarning alomatlarini behudaga chiqaraman, Bashoratgoʻylarni laqillataman, Donishmandlarga zarba berib, Bilgan narsalarini nodonlikka chiqaraman.

²⁶Oʻz qulimning bashoratini ijro etaman, Elchilarimning aytganlarini qilaman. Men Quddus haqida: «Bu yerda yana inson yashaydi», deb aytmoqdaman. Yahudo shaharlari haqida: «Ular qaytadan quriladi, Vayronalarini tiklayman», deb aytmoqdaman.

²⁷Chuqur suvlarga shunday deyman: «Qurib bit! Daryolaringni quritaman.»

²⁸Shoh Kurush[257] haqida shunday deyman: «U Mening choʻponim. Mening barcha xohishimni u bajaradi.» Kurush shunday deydi: «Quddus qayta qurilsin, Ma’bad yana tiklansin.»”