Read Uzbek Muqaddas Kitob Ishayo 45 Bible Online

Ishayo 45 - Uzbek Muqaddas Kitob bible

Ishayo 45

¹Egam aytar: “Men shoh Kurushni[258] oʻng qoʻlidan tutib turibman. Xalqlarni unga itoat ettiray deya, Shohlarni qurolsizlantiraman. Uning oldida eshiklar ochiq turadi, Darvozalar yopilmaydi.” Egamiz Oʻzining tanlagani — Kurushga shunday aytmoqda:

²“Men Oʻzim Sening oldingda boraman, Togʻlarni[259] tekislikka aylantiraman, Bronza eshiklarni parchalayman, Temir tambalarni sindiraman.

³Men Egang ekanligimni bilib olgin, Sening ismingni aytib chaqirayotgan Men Isroil xalqining Xudosi ekanligimni anglagin deb, Yashirib qoʻyilgan boyliklarni, Zulmatdagi xazinani senga beraman.

⁴Qulim Yoqub haqi, Oʻzim tanlagan Isroil haqi, Sening ismingni aytib chaqirdim. Senga nom ato qildim, Ammo sen Meni bilmaysan.

⁵Men Egangman, boshqasi yoʻq, Mendan oʻzga xudo yoʻq! Senga madad beraman, Ammo Meni bilmaysan.

⁶Mendan boshqasi yoʻqligini Sharqu gʻarbda hamma bilsin, dedim. Men Egangman, boshqasi yoʻq!

⁷Men yorugʻlik yarataman, zulmat bino qilaman, Farovonlik yuboraman, kulfat yogʻdiraman. Men Egangman! Bularning hammasini Men qilaman!

⁸Ey samolar, yuqoridan solihlik yogʻdiring, Ha, solihlik bulutlardan quyilsin. Yerdan najot unib chiqsin, Solihlik bilan birga yashnasin. Men Egangizman! Men uni yaratganman.”

⁹Holingizga voy! Ey Yaratuvchi bilan bahslashadiganlar! Tuproqdan yasalgan koʻzayu xumlar! Axir, loy kulolga: “Nima qilyapsan?” deydimi?! “Qoʻlingdan ish kelmas ekan!” deb aytadimi?!

¹⁰Tugʻilmagan homila otasiga: “Nima tugʻdiryapsiz oʻzi?” deb aytadimi?! Onasiga: “Nimaga meni tugʻyapsiz oʻzi?” deydimi?! Sizlarning holingizga voy!

¹¹Isroil xalqining Muqaddas Xudosi, Uning Yaratuvchisi — Egamiz shunday aytmoqda: “Xoʻsh, endi Oʻz farzandlarimning Taqdiri haqida Meni soʻroqqa tutasizmi?! Oʻz qoʻllarim ijodi toʻgʻrisida Menga koʻrsatmalar berasizmi?!

¹²Zaminni barpo qilgan, Yer yuzida insonni yaratgan Menman. Men Oʻz qoʻlim bilan osmonni yoydim, Barcha samoviy jismlarga Men buyruq berdim.

¹³Men Oʻzim Kurushni qoʻzgʻatib, Unga gʻalaba beraman. Uning barcha yoʻllarini tekislayman. U Mening shahrimni quradi. Porayu mukofot olmasdan Mening asirlarimni qoʻyib yuboradi.” Sarvari Olam shunday dedi.

¹⁴Egamiz aytmoqda: “Misrning boyliklari, Habashistonning[260] xazinalari seniki boʻladi! Savo yurtining[261] baland boʻyli odamlari senga keladi. Ular senga ergashadi. Zanjirband boʻlib, senga ta’zim qiladi. Yolvorib: «Ha, Xudo sizning orangizda! Undan boshqa Xudo yoʻq!» deydi.”

¹⁵Ey Isroil xalqining Xudosi — qutqaruvchi! Haqiqatan ham, Sen Oʻzini yashiradigan Xudosan.

¹⁶But yasaydiganlar birgalikda uyatga qoldi. Hammasi sharmandayu sharmisor boʻldi.

¹⁷Isroilni esa Egamiz qutqardi, To abad najot berdi! Ey Isroil xalqi, sizlar sharmanda boʻlmaysiz, To abad uyatga qolmaysiz!

¹⁸Egamiz Samolarni yaratgan, U Xudodir! U yerni barpo qilgan, mustahkamlagan. Yerni boʻsh qilib emas, Yashashga loyiq qilib yaratgan. U shunday deb aytmoqda: “Men Egangizman, boshqasi yoʻq.

¹⁹Men sizlarga yashirin joyda, Zimziyo yurtda gapirmadim. Men Yoqub nasliga: «Boʻsh joylardan Meni qidiring!» deb aytmadim. Men Egangizman. Haqiqatni aytaman, Toʻgʻrisini e’lon qilaman.

²⁰Ey xalqlarning omon qolganlari, Yigʻilinglar, yaqinlashib, birga kelinglar! Yogʻoch butlarini olib yuradiganlar, Qutqarmaydigan xudoga ibodat qiladiganlar Hech narsani anglab yetmaydilar.

²¹Gapiring, isbot keltiring. Oʻzaro maslahatlashing. Bu toʻgʻrida kim qadimdan xabar berdi? Azaldan kim aytib bergan edi? Men Egangiz emasmi?! Mendan boshqa Xudo yoʻq! Men odil Xudoman, qutqaruvchiman! Mendan boshqasi yoʻq.

²²Menga yuz buring, najot topasiz, Ey zaminning barcha chetlari! Ha, Men Xudoman, boshqasi yoʻq.

²³Oʻzim haqim ont ichdim[262], Ogʻzimdan toʻgʻri soʻz chiqdi, behuda ketmas: Mening oldimda har bir odam tiz choʻkadi, Har bir til Menga sadoqat qasamini ichadi.

²⁴Men haqimda: «Faqatgina Egamizda adolat, qudrat bor», deb aytadilar. Mendan gʻazablanganlarning hammasi Menga keladilar, ular uyalib qoladilar.

²⁵Ammo butun Isroil nasli Men — Egasi tufayli najot topadi. Ular maqtovga sazovor boʻladi.”