Read Uzbek Muqaddas Kitob Ishayo 46 Bible Online

Ishayo 46 - Uzbek Muqaddas Kitob bible

Ishayo 46

¹Egam aytar: “Xudo Bel tiz choʻkdi, xudo Navo[263] bukildi. Ularning butlari molu hayvonga yuk boʻldi. Oldin koʻtarib yurganlaringiz Endi toliqqanga yuk boʻldi.

²Ular egildi, birga tiz choʻkdi, Ular endi yukni qutqara olmaydi, Oʻzlari esa asir boʻlib ketadi.

³Ey Yoqub nasli! Menga quloq soling! Ey Isroil naslining omon qolganlari! Ey xalqim! Tugʻilganingdan beri seni onaday koʻtarib yurdim, Ha, dunyoga kelmasingdan oldin Men tayanching boʻldim.

⁴Keksayguningcha ham Men Oʻshaman, Soching oqarganda ham seni koʻtarib yuraman. Men seni yaratganman, Oʻzim seni koʻtaraman. Oʻzim seni koʻtarib, qutqaraman.

⁵Meni kimga oʻxshatasan?! Kimga tenglashtirasan?! Meni kimga taqqoslaysan?! Nima, Men oʻshalar bilan teng boʻlib qoldimmi?!

⁶Mana, odamlar hamyondan tilla chiqaradilar. Kumushni tarozilarda tortadilar. Usta yollab, xudo yasattiradilar. Ular oʻsha xudosiga ta’zim qiladilar. Ha, unga sajda qiladilar.

⁷Oʻsha xudosini opichlab olib ketadilar, Uni joyiga oʻrnatib, turgʻizib qoʻyadilar. U joyidan qimirlamay turaveradi. Kimdir unga yolvorganda, javob bermaydi, Mashaqqatidan xalos qila olmaydi.

⁸Buni yodda tuting, mahkam boʻling! Ey isyonkorlar, buni esga olib turing!

⁹Azaldan boʻlganlarni yodda tuting! Axir, Men Xudoman, boshqasi yoʻq! Men Xudoman, Menga oʻxshagani yoʻq!

¹⁰Oxirida nima boʻlishini boshidayoq aytaman. Sodir boʻlmaganlarni oldindan bildiraman. «Niyatlarim bajo boʻladi, Barcha istaklarimni ijro etaman», deb aytmoqdaman.

¹¹Sharqdan yirtqich qushni chaqiryapman. Ha, xohishimni bajaradiganni Uzoq yurtdan chaqiryapman[264]. Men Oʻz aytganimni bajo qilaman! Ha, oʻylaganimni amalga oshiraman!

¹²Menga quloq soling, ey oʻjarlar! Gʻalaba uzoq, deb oʻylaganlar!

¹³Mana, Men gʻalaba keltiraman, u uzoqda emas. Kechiktirmay najot beraman. Ha, Quddusga[265] najot ato qilaman, Isroilga Oʻz ulugʻvorligimni beraman.”