Read Uzbek Muqaddas Kitob Ishayo 48 Bible Online

Ishayo 48 - Uzbek Muqaddas Kitob bible

Ishayo 48

¹Eshiting buni! Ey Yoqub nasli! Ey Isroil nomi bilan ataladiganlar, Yahudo urugʻidan chiqqanlar! Sizlar Egamizning nomi bilan qasam ichasizlar, Isroil xalqining Xudosini tilga olasizlar, Ammo haqiqat va solihlik bilan emas.

²Ha, sizlar oʻzingizni muqaddas shahar[271] nomi ila atadingiz, Isroil xalqining Xudosiga tayandingiz, Axir, Uning nomi Sarvari Olamdir.

³Egamiz sizlarga shunday dedi: “Boʻlib oʻtganlarni oldindan Men aytdim, Ogʻzimdan chiqishi bilan bularni bildirdim, Birdaniga harakat qildim va ular sodir boʻldi.

⁴Axir, qaysarligingni Men bilaman — ku! Boʻyning temirday, peshanang bronzaday qattiq!

⁵«Bularni mening sanamim qildi, Quyma, oʻyma butlarim amr qildi», deb Aytmagin, deya Men oldindan aytdim, Bajo boʻlmasdan oldin, boʻlib oʻtganlarni bildirdim.

⁶Bularning hammasini eshitding, Nahotki endi e’tirof etmasang?! Hozirdan boshlab yangilarini, Oʻzing bilmagan yashirin narsalarni Senga eshittirdim.

⁷Bular hozir yaratildi, qadimda emas, Bu toʻgʻrida sen ilgari eshitmagansan. Yoʻq! Sen: «Men bularni bilaman — ku!» — deb ayta olmaysan.

⁸Ha, eshitmagansan, bilmaysan ham, Hatto azaldan ham quloqlaring ochilmagandi. Men bilaman — ku xiyonatkor ekanligingni, Tugʻilganingdanoq sen isyonkor deb atalgansan.

⁹Oʻzimning ismim haqi gʻazabimni bosyapman, Sharafim haqi Oʻzimni tutyapman, Boʻlmasa, seni yoʻq qilgan boʻlardim.

¹⁰Mana, Men seni pokladim, Ammo kumushday qilib emas. Seni kulfat oʻchogʻida sinadim.

¹¹Oʻz haqim, ha, Oʻz haqim uchun shunday qilaman! Axir, nimaga Men badnom boʻlishim kerak?! Shuhratimni birovga berib qoʻymayman.

¹²Menga quloq tut, ey Yoqub nasli! Oʻzim chaqirgan Isroil xalqi, eshit! Men Oʻshaman! Boshi ham, oxiri ham Men Oʻzimman.

¹³Ha, Mening qoʻlim zaminning poydevorini[272] qoʻygan, Samolarni yoygan Mening qoʻlimdir. Men ularni chaqirganimda Ular birgalikda turadi.

¹⁴Hammangiz toʻplanib, eshiting! Butlarning qaysisi bularni bildirdi?! Kurushni[273] Men, Egangiz, yaxshi koʻraman. U Bobilda Mening niyatimni bajo keltiradi. Mening qoʻlim Bobilliklarga[274] qarshi boʻladi.

¹⁵Men aytdim! Ha, Men Oʻzim aytdim! Uni Men chaqirganman! Uni Men olib keldim, U gʻalabaga erishadi.

¹⁶Menga yaqinlashing! Bunga quloq soling! Azaldan hech narsani yashirmay aytdim, Boshidanoq Men oʻsha yerdaman.” Mana endi Egamiz Rabbiy meni Hamda Oʻz Ruhini yubormoqda[275].

¹⁷Qutqaruvchingiz, Isroil xalqining Muqaddas Xudosi — Egamiz shunday aytmoqda: “Men Egangiz Xudoman! Yaxshi boʻling deb, sizlarga yoʻl — yoʻriq koʻrsataman, Yuradigan yoʻllaringizdan yetaklayman.

¹⁸Qaniydi amrlarimga quloq solganingizda! Oʻshanda farovonligingiz daryoday boʻlardi, Zafaringiz dengiz toʻlqinlariday boʻlardi.

¹⁹Urugʻingiz qum kabi boʻlardi, Naslingiz qum zarralariday son — sanoqsiz boʻlardi. Ularning nomi oʻchib ketmagan boʻlardi, Mening oldimdan yoʻqotilmagan boʻlardi.”

²⁰Endi Bobildan chiqib keting, Bobilliklardan qoching. Shodlik hayqiriqlari ila e’lon qiling! Dunyoning toʻrt chetiga bu xabarni yetkazing! “Egamiz Oʻz qullari, Yoqub naslini qutqardi”, deb ayting!

²¹Egamiz ularni sahrodan olib borganda, Ular tashnalikdan qiynalmadilar. Xudo ular uchun qoyadan suv chiqardi[276]. U qoyani yordi, suvlar pishqirib chiqdi.

²²“Yovuzlarga omonlik yoʻq”, deydi Egamiz.