Read Uzbek Muqaddas Kitob Ishayo 49 Bible Online

Ishayo 49 - Uzbek Muqaddas Kitob bible

Ishayo 49

¹Quloq soling, ey dengiz ortidagi yurtlar! E’tibor bering, ey uzoqdagi xalqlar! Tugʻilmasimdan oldin Egam meni chaqirdi, Ona qornida boʻlganimdayoq U ismimni aytib chaqirdi.

²U tilimni oʻtkir qilichday qildi, Qoʻlining soyasida U meni yashirdi. U meni uchli oʻqday qildi, Oʻqdoniga meni yashirdi.

³U menga shunday dedi: “Sen Mening qulimsan, Ey Isroil, Men sen tufayli shuhrat topaman.”

⁴Men shunday dedim: “Men bekorga mehnat qildim, Kuchimni behuda, befoyda sarf etdim.” Ammo Egam meni hukm qiladi — ku, Mukofotlash Xudoyimning qoʻlidadir.

⁵Endi Egam gapirdi. Yoqub naslini Unga qaytarsin deb, Isroilni Uning oldiga toʻplasin deb, Onam qornidayoq meni Oʻz quli qilib yaratdi. Egamning koʻzi oldida men shuhrat topaman, Xudoyim mening kuch — qudratim boʻldi.

⁶U shunday dedi: “Ha, sen Yoqub qabilalarini qayta tiklaysan, Isroilning omon qolganlarini Oʻz yurtiga qaytarib olib kelasan. Biroq seni faqat shuning uchungina qulim qilmadim. Men seni boshqa xalqlarga nur qilaman, Toki Men beradigan najot yerning chetigacha yetib borsin.”

⁷Isroil xalqining qutqaruvchisi, Ularning Muqaddas Xudosi — Egamiz shunday aytmoqda: “Ey xoru zor boʻlgan bechora qulim, Sen xalqlarning[277] nafratiga uchragansan, Hukmdorlarning quliga aylangansan. Biroq senga aytamanki, Seni koʻrib, shohlar oʻrnidan turadi, Hukmdorlar tiz choʻkib ta’zim qiladi. Isroil xalqining Muqaddas Xudosi — Sodiq Egangiz haqi — hurmati shunday qiladi. Axir, U seni tanlagan — ku!”

⁸Egamiz shunday aytmoqda: “Muruvvat payti kelganda, Men senga javob berdim, Najot kuni kelganda, Men senga yordam berdim. Oʻzim seni himoya qilaman, Xalqim bilan tuzgan ahdimni Sen orqali amalga oshiraman. Toki yurt qayta tiklansin, Tashlandiq mulklar taqsimlansin.

⁹Mahbuslarga: «Chiqinglar!» demoqdaman. Zulmatdagilarga: «Koʻrininglar!» deb aytmoqdaman. Yoʻl boʻyida ular oʻtloqlar topadi, Tap — taqir qirlar ularning yaylovi boʻladi.

¹⁰Ular na ochlikni, na tashnalikni biladi, Na garmsel[278], na jazirama quyoshdan azob chekadi. Mehr — shafqat koʻrsatib, ularni yetaklayman, Ularni buloqlarga boshlab boraman.

¹¹Hamma tepaliklarimni tekis yoʻl qilaman, Jarliklarni toʻldirib, yoʻllar barpo etaman.

¹²Mana, ular uzoqlardan keladi. Qarang, ular shimoldan, gʻarbdan, Sinim yurtidan[279] ham keladi.”

¹³Shodlikdan kuylang, ey samolar, Xursand boʻl, ey zamin! Qoʻshiqqa joʻr boʻling, ey togʻlar! Egamiz xalqiga tasalli berdi, Ezilgan xalqiga rahm qildi!

¹⁴Ammo Quddus[280] shunday dedi: “Egam meni tark etdi, Rabbim meni unutib qoʻydi.”

¹⁵Egam aytar: “Axir, ayol kishi emizikli bolasini unutadimi?! Oʻzi tuqqan bolasiga rahm qilmaydimi?! Agar xotinlar bolasini unutsalar ham, Men seni aslo unutmayman!

¹⁶Qara, sening nomingni kaftimga yozib qoʻydim, Ey Quddus, doimo koʻz oʻngimdasan!

¹⁷Hademay, farzandlaring qaytib keladi, Seni vayron qilib, yoʻqotmoqchi boʻlganlar Sendan chiqib ketadi.

¹⁸Boshingni koʻtarib, atrofga qara, Hamma farzandlaring toʻplanib, oldingga kelishdi.” Egamiz shunday demoqda: “Men barhayot Xudo boʻlganim haqi aytamanki, Hammasi zebu ziynatday seni bezatib turadi, Kelinchakday ularni taqinchoq qilib taqasan.

¹⁹Ha, yering kimsasiz, huvullab qolgandi, Yurting vayronaga aylangandi. Endi esa odam koʻpligidan tor boʻlib qoladi, Buzgʻunchilar sendan uzoqda yuradi.

²⁰Asirlikda tugʻilgan farzandlaring Hali senga shunday deydi: «Bu joy bizga torlik qilyapti, Joy bering, biz ham yashaylik.»

²¹Shunda oʻzingga oʻzing deysan: «Ularni menga kim tugʻib berdi? Farzandsiz edim, tugʻmas boʻlib qolgandim. Surgunda edim, xor boʻlgandim. Ularni kim menga katta qilib berdi? Yolgʻiz oʻzim qolgandim — ku, Endi ular qayerdan kelib qoldi?»”

²²Egamiz Rabbiy shunday aytmoqda: “Mana, Men xalqlarga qoʻl koʻtarib, ishora beraman, Elatlarga bayrogʻimni koʻtaraman. Bolalaringni ular qoʻllarida koʻtarib keladi, Qizlaringni ular opichlab keladi.

²³Shohlar senga xizmat qilib, boqadi, Malikalar senga enagalik qiladi. Boshlari yerga tekkuday boʻlib, Ular senga ta’zim qiladi, Oyoqlaring changini yalab — yulqaydi. Oʻshanda Men Egang ekanligimni bilasan. Menga umid bogʻlagan sharmanda boʻlmaydi.”

²⁴Biror kimsa kuchli jangchidan Oʻljani olib qoʻya oladimi?! Nahotki zolimning[281] qoʻliga asir tushgan qutula olsa?!

²⁵Egamiz esa shunday aytmoqda: “Mana, kuchli jangchidan asirlar tortib olinadi, Zolimga oʻlja boʻlganlar qutqariladi! Senga qarshi chiqqanlarga Men qarshi chiqaman, Sening bolalaringni Men Oʻzim qutqaraman!

²⁶Senga zulm qilganlarga oʻz tanasini yediraman, Ular sharob ichganday boʻlib, oʻz qonidan mast boʻladi. Shunda jamiki odamzod Men, Egang, najotkoring va qutqaruvching ekanligimni, Yoqub naslining qudratli Xudosi ekanligimni bilib oladi.”