Read Uzbek Muqaddas Kitob Ishayo 5 Bible Online

Ishayo 5 - Uzbek Muqaddas Kitob bible

Ishayo 5

¹Qoʻshiq aytay suyukligimga, Aytay muhabbat qoʻshigʻimni Uning uzumzori haqida. Suyganimning uzumzori bor edi Tuprogʻi unumli tepalikda.

²Yerni agʻdarib, toshlardan tozaladi, Oʻtqazdi eng sara uzum tokini, Qorovul minorasini oʻrtaga qurdi. Uzum siqish chuqurini[22] tayyorladi, Uzumlarning pishishini U kutdi, Ammo hosil ituzum boʻldi.

³Endi, ey Quddus ahli, Yahudo xalqi, Hakam boʻling Men bilan uzumzorim oʻrtasida.

⁴Yana nima qilishim kerak edi uzumzor uchun? Unga qilmaganim yana ne qoldi?! Uzumlarning pishishini kutganimda, Nega hosil ituzum boʻldi?!

⁵Endi Men sizlarga aytaman Nima qilishimni uzumzorimni. Chetan devorini olib tashlayman, Hamma bor narsasi yeb bitirilsin. Uning devorini buzib tashlayman, Uzumzorim payhon qilinsin.

⁶Men uni xarobazor qilaman, Endi toklarim butalmaydi, Yeri hech yumshatilmaydi. Tikanlar, changalzor bilan qoplansin, Bulutlarga ham amr beraman, Uzumzorimga yomgʻir yogʻdirmasin.

⁷Sarvari Olamning uzumzori — Isroil xalqi, Egamning xush koʻrgan koʻchati — Yahudo odamlari. Ulardan toʻgʻrilik kutgandi, qotillik koʻrdi, Ulardan adolat kutgandi, faryod eshitdi.

⁸Ey koʻplab uy sotib oladiganlar! Holingizga voy! Ey dalasiga yana dala qoʻshib oladiganlar! Holingizga voy, Ha, boshqalarga joy qoldirmaysiz, Endi bu yurtda yolgʻiz oʻzingiz qolib ketasiz.

⁹Sarvari Olamning soʻzi ayon boʻldi menga: “Koʻplab uylar, shubhasiz, xarob boʻladi, Katta, chiroyli uylar kimsasiz qoladi.

¹⁰Yigirma tanob[23] uzumzor ikki koʻza[24] sharob beradi, Oʻn savat[25] urugʻ arang bir savat[26] hosil beradi.”

¹¹Holingizga voy, ey erta tongda turib, Oʻtkir ichimlik ortidan quvadiganlar! Holingizga voy, ey tunda allamahalgacha Sharob ichib qiziydiganlar!

¹²Ziyofatlaringizda lira, arfa, Childirma, nay chalinar, sharob ichilar! Biroq Egamning ishlarini anglamaysizlar, Uning qoʻllari ijodini koʻrmaysizlar!

¹³Shu bois, xalqim Meni bilmagani tufayli surgunga ketdi. Amaldorlari ochlikdan oʻlib ketdi, Koʻplari tashnalikdan oʻrtanib yondi.

¹⁴Ha, behad ochilib ketdi Oʻliklar diyorining[27] ishtahasi, Cheksiz ochilib ketdi uning ogʻzi, Tushib ketdi u yerga Quddusning obroʻsi, Oʻliklar diyoriga ketdi koʻp odami, Shovqin — suroni, yuksalgani ham.

¹⁵Shunday qilib, inson sharmanda boʻldi, Odamzod tiz choʻktirildi, Kiborlarning koʻzlari yerga qaradi.

¹⁶Biroq Sarvari Olam adolati ila yuksaladi. Mana, Muqaddas Xudo odilligi ila Muqaddasligini koʻrsatdi.

¹⁷Qoʻzilar oʻtlaydi endi oʻzlarining Yaylovida oʻtlaganday, Sarson boʻlib yurgan boʻrdoqilar Yeb toʻyadi vayronalarda[28].

¹⁸Holingizga voy! Ey yolgʻonni arqon qilib Ayblarini tortib keladiganlar! Ey aravaning arqoni bilan Gunohlarini sudrab keladiganlar!

¹⁹Sizlar aytasiz: “Qani, tez boʻlsin, Qiladiganini darrov qilsin, Toki biz buni koʻraylik. Isroil xalqining Muqaddas Xudosining maqsadi Zudlik bilan amalga oshsin, Toki biz buni bilib olaylik.”

²⁰Holingizga voy, ey yomonni yaxshi, Yaxshini yomon deb aytadiganlar, Zulmatni nur bilan, Nurni esa zulmat bilan almashtiradiganlar! Ey achchiqni shirin, Shirinni achchiq deydiganlar!

²¹Holingizga voy, ey oʻzini dono deb bilganlar, Oʻzlarini idrokli deb hisoblaganlar!

²²Holingizga voy, ey sharob ichishda Qahramon boʻlganlar, Ichkilikni aralash — quralash ichishda Bahodirlik koʻrsatganlar.

²³Pora evaziga aybdorni haq deb topganlar, Solihlarning toʻgʻriligini inkor qiladi ular!

²⁴Shu bois alanganing tili somonni yutganday, Ularning ildizi chirib ketadi, Quruq xashak olovda kuyib bitganday, Ularning gʻunchasi changday uchib ketadi. Sarvari Olamning ta’limotini ular rad qildi, Isroil xalqining Muqaddas Xudosining soʻzidan nafratlandi.

²⁵Ha, Egamning gʻazabi Oʻz xalqiga qarshi alangalandi, U xalqqa qarshi qoʻl koʻtarib, ularni urdi. Shunda togʻlar larzaga keldi, Koʻchalarda jasadlar axlat boʻldi. Shunda ham Egam gʻazabidan tushmadi, Uning qoʻli hamon Isroilga qarshi koʻtarilgancha turardi.

²⁶Uzoqdagi xalqlarga[29] Egam belgi beradi, Yerning chetidagi xalqlarga ishora yuboradi. Ana, ular kelayotir bu yerga tez, shiddat ila!

²⁷Ular na charchaydi, na yiqiladi, Na mudraydi, yo na uxlaydi, Na kamari boʻshaladi, Na chorigʻining iplari uziladi.

²⁸Ularning oʻqlari oʻtkirlangan, Hamma yoylari tortib bogʻlangan, Otlarining tuyoqlari chaqmoqtoshga oʻxshar, Aravalarining gʻildiraklari quyun kabidir.

²⁹Ular sherga oʻxshab boʻkiradi, Yirtqich sher kabi oʻkiradi, Oʻkirib, oʻljasini ushlaydi, olib ketadi, Hech kim uni qutqarib ololmaydi.

³⁰Oʻsha kuni guvullagan dengizga oʻxshab Yurt uzra oʻkirish eshitiladi. Ana yurtga qarang! Zulmat va kulfat, Bulutlar tufayli nur xira boʻldi.