Read Uzbek Muqaddas Kitob Ishayo 53 Bible Online

Ishayo 53 - Uzbek Muqaddas Kitob bible

Ishayo 53

¹Bizning[292] xabarimizga kim ishondi? Egamizning qudratli kuchi kimga ayon boʻldi?

²Egamizning quli Egamiz oldida yangi koʻchatday, Quruq tuproqdagi ildizday oʻsdi. Bizni oʻziga jalb qiladigan Goʻzallik, ulugʻvorlik unda yoʻq edi. Bizni oʻziga rom etadigan Hech bir jozibasi yoʻq edi.

³Odamlar undan nafratlandilar, uni rad etdilar. U qaygʻu, azob — uqubat nimaligini bilardi. Hamma undan yuz oʻgirdi, undan hazar qildi. Biz uni odam qatorida sanamadik.

⁴Ha, dardlarimizni u oʻziga oldi, Ogʻriqlarimizni u oʻz zimmasiga oldi. Biz esa oʻyladik: “Uni Xudo urgan, Alamdiyda, jabrlangan u!”

⁵U esa bizning gunohlarimizni deb yarador boʻldi, Bizning ayblarimiz tufayli ezildi. Bizga tinchlik keltiradigan jazo unga tushdi, Uning yaralari bizga shifo berdi.

⁶Hammamiz qoʻylarday yoʻldan adashdik, Hammamiz oʻz yoʻlimizdan ketdik. Hammamizning ayblarimizni Egamiz uning zimmasiga yukladi.

⁷U jabr koʻrdi, oʻzi uqubat chekdi, Ammo miq etmadi, ogʻzini ochmadi. Boʻgʻizlanishga olib borilgan qoʻziday, Jun qirquvchi oldida jim turgan qoʻyday U miq etmadi, ogʻzini ochmadi.

⁸Hukm bilan, kuch bilan[293] olib ketildi. Uning nasli haqida kim oʻylaydi?[294] Tiriklar yurtidan u uloqtirildi, Xalqimizning[295] gunohi tufayli unga zarba tushdi.

⁹Garchi u yovuzlik qilmagan boʻlsa ham, Ogʻzidan yolgʻon soʻz chiqmagan boʻlsa ham, Unga yovuzlar qatori qabr berilgandi, Ammo oʻlganda u boylar yoniga qoʻyildi.

¹⁰Egamiz Oʻz qulini ezishni, azoblashni ma’qul koʻrdi. Shunday boʻlsa ham, Egamizning quli oʻz naslini koʻradi, Uzoq umr kechiradi, Chunki u oʻzini gunoh uchun nazr qildi. U orqali Egamizning xohishi bajo boʻladi.

¹¹Chekkan azoblarining natijasini koʻrib[296], U mamnun boʻladi. Mening solih qulim oʻz bilimi tufayli Koʻpchilikni oqlab, ularning aybini oʻziga oladi.

¹²Shu bois buyuklar qatorida unga ulush beraman[297], U kuchlilar bilan oʻljalarni boʻlishadi. Axir, u oʻzini oʻlimga tutib berdi, Gunohkorlar qatorida sanaldi. Koʻplarning gunohini u oʻziga oldi, Gunohkorlar uchun vasiylik qildi.