Read Uzbek Muqaddas Kitob Ishayo 54 Bible Online

Ishayo 54 - Uzbek Muqaddas Kitob bible

Ishayo 54

¹Egam aytar: “Ey bola koʻrmagan bepusht ayol! Shodlikdan hayqir! Ey toʻlgʻoq ogʻrigʻini bilmagan ayol! Sevinchdan hayqir! Axir, tashlab ketilgan ayolning bolalari Eri bor xotinnikidan ham koʻproq boʻladi.

²Chodiring joyini kengaytirgin, Chodiring pardalarini keng choʻzdirgin! Hech narsani ayama! Arqonlaringni uzun tashlagin, Qoziqlaringni mahkam qoqqin!

³Axir, mulking oʻngu soʻlga kengayib ketadi. Avloding xalqlarni mulk qilib oladi, Ular tashlandiq shaharlarni toʻldiradi.

⁴Qoʻrqma, uyatga qolmaysan, Uyalma, sharmanda boʻlmaysan! Axir, sen yoshligingdagi sharmandalikni unutasan, Bevaligingdagi sharmandalikni boshqa eslamaysan.

⁵Zotan, Men, Yaratuvching, sening ering boʻlaman. Mening nomim Sarvari Olamdir! Men, Isroil xalqining Muqaddas Xudosi, qutqaruvchingman, Men butun yer yuzining Xudosi deb atalaman.

⁶Ey Isroil! Sen tashlab ketilgan, Ruhi azoblangan ayoldaysan. Rad etilgan, yosh juvondaysan. Ammo Men, Egang, seni chaqirib olaman, — demoqda Xudoying. —

⁷Qisqa vaqtga Men seni tark etgandim, Buyuk shafqat ila seni qaytarib olaman.

⁸Qattiq gʻazabda sendan bir lahzaga yuz oʻgirgandim, Endi tuganmas mehr bilan senga rahm qilaman, — demoqda qutqaruvching — Egamiz. —

⁹Ha, Men uchun bu Nuh davri kabidir. Endi yer yuzini Nuh toʻfoni kabi, Hech qachon suv bosmaydi, deb ont ichganman. Xuddi shunday qilib, yana ont ichaman: «Hech qachon sendan gʻazablanmayman, Senga jahl qilmayman!»

¹⁰Togʻlar oʻrnidan qoʻzgʻalsa ham, Tepaliklar tebransa ham, Mening sodiq sevgim sendan ketmaydi, Mening tinchlik ahdim oʻzgarmaydi.” Seni sevuvchi Egamizning kalomi shudir.

¹¹Egam aytar: “Ey mazlum shahar! Boʻronlarda qolding, ammo hech kim seni yupatmadi! Mana, Men firuza toshlar ishlatib, seni qayta quraman. Zangori yoqut toshlardan senga poydevor qoʻyaman.

¹²Minoralaringni yoqutlardan quraman, Darvozalaringni gavharlardan qilaman, Barcha devorlaringni qimmatbaho toshlardan quraman.

¹³Hamma bolalaringga Men, Egang, ta’lim beraman, Farzandlaringning tinchligi buyuk boʻladi.

¹⁴Men seni dushmanlaringdan xalos qilganimda Sen bexatar boʻlasan. Zulm sendan uzoqda boʻladi, Halokatdan qoʻrqmaysan, Chunki u senga yaqinlashmaydi.

¹⁵Agar kimdir senga hujum qilsa, Bilginki, uni Men qilmagan boʻlaman. Senga hujum qilgan har kim magʻlub boʻladi.

¹⁶Temirchiga qara! U toshkoʻmir choʻgʻini puflaydi, Qotillik uchun qurol yasaydi. Uni Men yaratganman. Vayron qilsin deb, Bosqinchini ham Men yaratdim.

¹⁷Senga qarshi yasalgan Hech qanday qurol senga bas kela olmaydi. Sen bilan da’volashgan har bir odamning Da’volarini sen yoʻqqa chiqarasan. Mening qullarimga ana shular nasib qiladi, Oʻzim ularga gʻalaba ato qilaman.” Egamizning kalomi shudir.