Read Uzbek Muqaddas Kitob Ishayo 55 Bible Online

Ishayo 55 - Uzbek Muqaddas Kitob bible

Ishayo 55

¹Egam aytar: “Ey tashna boʻlganlar! Hammangiz suvga kelinglar! Ey pulsizlar, keling, sotib olib, yenglar! Keling, sharobu sut sotib oling pulsiz, tekinga!

²Nima uchun pulingizni Qorin toʻygʻizmaydigan narsaga sarf qilasiz? Nima uchun ishlab topganingizni Qoniqtirmaydigan narsalarga sarf qilasiz? Eshiting, Menga quloq soling! Shunda a’lo taomlarni yeysiz, Yogʻli taomlar yeb, maza qilasiz.

³Quloq soling, Menga keling, Tinglang, shunda yashaysiz. Dovudga va’da bergan sodiq sevgim haqi Siz bilan abadiy ahd tuzaman.

⁴Mana Men Dovudni xalqlarga guvoh qildim, Uni xalqlarning hukmdori, rahnamosi qildim.

⁵Oʻzingiz tanimagan xalqlarni chaqirasiz, Sizni tanimagan xalqlar oldingizga keladi. Meni, Isroil xalqining Muqaddas Xudosi — Egangiz Xudoni deb Bu xalqlar keladi, Zotan, Men sizni ulugʻvorlikka burkaganman.”

⁶Egangiz yoningizda ekan, Unga intiling, U yaqiningizda ekan, Uni chaqiring!

⁷Badkirdor yoʻlidan qaytsin, Gunohkor niyatidan qaytsin, Ular Egamizga qaytsin, Egamiz shafqat koʻrsatadi, Ular Xudoyimizga qaytsin, Uning yuragi kechirimga boy.

⁸Egamiz shunday demoqda: “Sizlarning fikringiz Meniki emas, Mening yoʻllarim sizlarniki emas.

⁹Osmon yerdan qanchalik baland boʻlsa, Mening yoʻllarim ham, oʻylarim ham, Sizlarning yoʻllaringizdan, oʻylaringizdan Shunchalik balanddir.

¹⁰Osmondan qor, yomgʻir yogʻadi. Ular osmonga qaytmay, yerni sugʻoradi, Toki yer oʻsimlik oʻstirsin, Ekkani don, yegani non bersin.

¹¹Mening ogʻzimdan chiqqan soʻz shunday boʻladi, Menga boʻm — boʻsh qaytib kelmaydi. Mening xohish — irodamni oʻsha soʻz bajaradi, Qaysi niyatda yuborsam, Oʻshani bajo qiladi.

¹²Ha, siz xursand boʻlib borasiz, Sogʻ — omon qaytib kelasiz. Oldingizda togʻlar, tepaliklar Sevinch ila hayqiradi, Daladagi hamma daraxtlar qarsak chaladi.

¹³Tikanzorlar oʻrniga sarv daraxtlari oʻsadi, Gazanda oʻt oʻrniga mirta butalari[298] oʻsadi. Shunday qilib, bular Men, Egangga sharaf boʻladi. Tuganmas, abadiy nishona boʻlib qoladi.”