Read Uzbek Muqaddas Kitob Ishayo 56 Bible Online

Ishayo 56 - Uzbek Muqaddas Kitob bible

Ishayo 56

¹Egamiz shunday aytmoqda: “Adolatni himoya qiling, Toʻgʻri ishlarni qiling. Zotan, yaqinda najot beraman, Tez orada adolatimni zohir etaman.

²Shabbat kunini tahqirlamay, Unga rioya qiladigan inson baxtlidir! Har qanday yovuzlikdan qoʻlini tiyib, Barqaror boʻlgan inson baxtlidir!”

³Begona xalqdan boʻla turib, Oʻzini Egamizga bagʻishlagan odam: “Egamiz meni, baribir, Oʻz xalqidan ajratadi”, deb aytmasin. Bichilgan erkak ham: “Men qurigan daraxtman”, deb aytmasin.

⁴Zotan, Egamiz oʻsha erkaklarga shunday aytmoqda: “Shabbat kuniga rioya qiling. Meni mamnun qiladiganlarni tanlang. Mening ahdimga sodiq boʻling.

⁵Shunda sizlarga uyimda Oʻgʻilu qizlarimnikidan ham koʻra, Yaxshiroq nom, xotira beraman. Bu nom yoʻqolmaydigan, abadiy bir nom boʻladi.”

⁶Egamizni sevib, xizmat qiladigan, Shabbat kuniga rioya etadigan, Egamizning ahdiga sodiq boʻlgan, Begona xalqdan boʻlib turib, Oʻzini Egamizga bagʻishlaganlarga Egamiz shunday demoqda:

⁷“Men sizlarni muqaddas togʻimga[299] olib kelaman. Ma’badimda sizlarni mamnun qilaman. Kuydiriladigan qurbonliklaru nazrlaringiz Qurbongohimda qabul boʻladi. Mening uyim barcha xalqlarning ibodat uyi deb ataladi.”

⁸Tarqalib ketgan Isroil xalqini yigʻadigan Egamiz Rabbiy aytmoqda: “Uyimda yigʻilganlar yoniga Men yana boshqalarni yigʻib kelaman.”

⁹Ey dashtdagi hamma hayvonlar, Ey oʻrmondagi barcha hayvonlar! Kelinglar, xalqimni yeb bitiringlar!

¹⁰Isroilning soqchilari koʻrdir! Ularning hammasi idroksiz, Vovullamaydigan tilsiz itlar kabidir. Yotib olib, tush koʻradilar, Ular uyquni yaxshi koʻradilar.

¹¹Ular toʻyganini bilmagan Ochkoʻz itlarga oʻxshar, Bu choʻponlar idroksiz! Oʻz foydasini koʻzlab, Har biri oʻz yoʻlidan ketdi.

¹²Ular shunday deydi: “Qani, kelinglar, sharob ichaylik, Ichkilikka rosa toʻyaylik. Erta ham bugun kabi boʻladi, Hatto undan ham yaxshiroq boʻladi.”