Read Uzbek Muqaddas Kitob Ishayo 59 Bible Online

Ishayo 59 - Uzbek Muqaddas Kitob bible

Ishayo 59

¹Nima, Egamizning qoʻli qisqami? Qutqarolmasa! Qulogʻi ogʻirmi? Eshitmay qolsa!

²Axir, oʻz ayblaringiz sizni Xudoyingizdan ayirdi, Gunohlaringiz tufayli U sizdan yuz oʻgirdi, Ibodatlaringizga quloq solmaydi.

³Ana, qoʻllaringiz qonga bulgʻangan, Barmoqlaringiz gunohga botgan, Ogʻzingizdan yolgʻon chiqaveradi, Tilingiz haqsizlikni gapiradi.

⁴Hech kimsa, adolat boʻlsin, deb aytmaydi, Hech kimsa haqiqat uchun kurashmaydi. Behuda gaplardan umid qilib, yolgʻonlar aytadi, Buzuqlikka homilador boʻlib, yovuzlik tugʻadi.

⁵Sizlar ilonning tuxumini bosib oʻtirasiz, Oʻrgimchak uyasini toʻqiysiz. Bunday tuxumni yeganlar oʻladi. Agar bitta tuxum ezilsa, Undan zaharli ilon oʻrmalab chiqadi.

⁶Toʻqigan uyangizdan kiyim chiqmaydi, Siz toʻqiganlar bilan hech kim ustini yopa olmaydi. Sizlarning ishingiz yaramas ishlardir, Sizlarning qoʻllaringiz zoʻravonlikka toʻla.

⁷Fosiqlarning oyogʻi yomonlikka shoshiladi, Ular behuda qon toʻkishga juda usta. Ularning fikri — zikri gunoh bilan band, Qadamidan halokatu vayrona keladi.

⁸Ular tinchlik yoʻllarini bilmaydi, Yurgan yoʻlida adolat yoʻq. Oʻzlariga egri yoʻllar qildilar, Bu yoʻldan yurganlar tinchlik bilmaydi.

⁹Shu bois adolat bizdan uzoq, Xudo bizni qutqarmaydi. Nur izlaymiz, ammo faqatgina zulmat bor, Yorugʻlik izlaymiz, ammo zulmatda yuramiz.

¹⁰Koʻrlarday devorni ushlab yuramiz, Koʻzi koʻrmaydiganlarday paypaslanamiz. Kuppa — kunduzi tundagiday qoqilamiz, Tiriklar orasida oʻliklardaymiz.

¹¹Hammamiz ayiq kabi boʻkiryapmiz, Hammamiz musicha kabi nola qilyapmiz. Adolat kutyapmiz, ammo u yoʻqdir, Najot kutyapmiz, ammo u bizdan uzoqda.

¹²Ha, Xudo oldida koʻp itoatsizlik qildik, Gunohlarimiz bizga qarshi guvohlik berib turibdi. Itoatsizligimiz koʻz oʻngimizda, Ayblarimizni oʻzimiz bilamiz.

¹³Itoatsizlik qildik, Egamizni aldadik, Xudoyimizdan yuz oʻgirdik, Zulm qoʻzgʻadik, xiyonat qildik, Yurakda yolgʻon gaplar toʻqib gapirdik.

¹⁴Adolat chekindi, solihlik uzoqqa ketdi. Axir, haqiqat quvib chiqarildi, Haqqoniylikka aslo oʻrin qolmadi.

¹⁵Hech qayerda haqiqat yoʻq, Oʻzini yomonlikdan olib qochgan odam Halokatga yoʻliqdi. Egamiz bularni koʻrib, Adolat yoʻqligidan ozor chekdi.

¹⁶Mazlumlarga yordam beradigan Hech kimsa yoʻqligini koʻrdi, Hech kim yoʻqligidan U hayratda qoldi. Shunda Egamiz Oʻz qoʻli bilan qutqarishga kirishdi, Xudoning Oʻzi ularga najot berdi.

¹⁷U adolatni sovutday kiyib oldi, Najot dubulgʻasini boshiga kiydi, Egamiz qasosni libosday kiyib oldi, Rashkni chopon qilib oʻrab oldi.

¹⁸Har kimga qilganiga yarasha javob beradi, Oʻz dushmanlariga gʻazab sochadi, Gʻanimlaridan qasos oladi, Dengiz ortidagi yurtlarga Qilganlariga yarasha toʻliq qaytaradi.

¹⁹Gʻarbda Egamizning nomidan qoʻrqadilar, Sharqda Uning shuhratidan qoʻrquvga tushadilar. Mana, Egamiz daryoday keladi. Oʻzining Ruhi da’vat etayotgan Kuchli daryoday keladi.

²⁰Egamiz shunday aytmoqda: “Qutqaruvchi Quddusga[307] keladi, Yoqub naslining gunohdan qaytganlariga keladi.”

²¹Egamiz shunday deydi: “Siz bilan qiladigan ahdim shudir: sizga bergan Ruhim, ogʻzingizga solgan soʻzlarim sizlarni tark etmaydi. Hozirdan boshlab, to abad sizlarni, bolalaringizni va nabiralaringizni hech qachon tark etmaydi.”