Read Uzbek Muqaddas Kitob Ishayo 6 Bible Online

Ishayo 6 - Uzbek Muqaddas Kitob bible

Ishayo 6

¹Shoh Uzziyo vafot etgan yili[30] men yuqoriga yuksalgan Rabbiyning taxtda oʻtirganini koʻrdim. Uning libosi etaklari Ma’badni toʻldirgan edi.

²Uning tepasida seraflar[31] shay turardi, har birining oltita qanoti bor edi. Ular ikki qanoti ila yuzlarini toʻsgandi, ikki qanoti ila oyoqlarini toʻsgandi, qolgan ikki qanoti bilan uchayotgan edi.

³Ular bir — biriga hayqirishardi: “Muqaddasdir, muqaddasdir, Muqaddasdir Sarvari Olam! Uning ulugʻvorligi Butun olamni toʻldirgan!”

⁴Ularning hayqirgan ovozlari Ma’badni poydevorigacha titratib yubordi, Ma’bad tutun bilan toʻlib borardi.

⁵Men shunday dedim: “Shoʻrim qursin! Oʻldim endi! Oʻz koʻzlarim bilan oʻsha Shohni, Sarvari Olamni koʻrdim. Axir, men ogʻzi nopok bir odamman, ogʻzi nopok xalq orasida yashayman!”

⁶Seraflardan biri men tomon uchdi, qoʻlida koʻmir choʻgʻi bor edi. U oʻsha choʻgʻni otashkurak bilan qurbongoh ustidan olgan edi.

⁷Koʻmir choʻgʻini ogʻzimga tekkizib, shunday dedi: “Qara, bu choʻgʻ lablaringga tegdi, endi ayblaring yuvildi, gunohlaringdan forigʻ boʻlding.”

⁸Shunda men Rabbiyning ovozini eshitdim: “Kimni yuboraman? Biz uchun kim boradi?” Men aytdim: “Men shu yerdaman, mana, yuborgin meni.”

⁹U shunday dedi: “Bor, mana shu xalqqa ayt: «Xoʻp, tinglayveringlar, baribir, tushunmaysiz, Qarayveringlar, baribir, anglab yetmaysiz.»

¹⁰Ey Ishayo, bu xalqqa gapir. Soʻzlaring ularning aqlini oʻtmas qiladi, Gaplaring dastidan quloqlari garang boʻladi, Ularning koʻzlari yumilib qoladi. Shunda koʻrmay qoladi koʻzlari, Eshitmay qoladi quloqlari, Anglamay qoladi aqllari, Ular Menga qaytmaydilar, Ular shifo topmaydilar.”

¹¹Soʻradim: “Ey Rabbiy, qachongacha?” U aytdi: “Shaharlar vayron boʻlib, Kimsasiz qolgunlaricha, Xonadonlarda biron jon qolmay, Yurt tamom vayron boʻlguncha.

¹²Oxiri, Men, Egangiz, hammani uzoqqa joʻnataman, Yurtda esa koʻplab tashlandiq joylar boʻladi.

¹³Xalqning oʻndan biri qolsa ham Yondirib yuboriladi. Ammo qayragʻoch, eman daraxtlari kesilganda Toʻnkalari qolgani kabi, Undan ham toʻnka qoladi. Uning toʻnkasi Muqaddas urugʻdir.”