Read Uzbek Muqaddas Kitob Ishayo 60 Bible Online

Ishayo 60 - Uzbek Muqaddas Kitob bible

Ishayo 60

¹Ey Quddus xalqi, tur, porlagin! Axir, nuring keldi, Egamizning ulugʻvorligi ustingga yogʻildi.

²Mana, yer yuzini zulmat qopladi, Xalqlarni quyuq zulmat bosdi. Ammo Egamiz sening oldingga keladi, Oʻz ulugʻvorligini boshing uzra porlatadi.

³Xalqlar sening nuringga keladi, Tonggi yorugʻligingga shohlar keladi.

⁴Boshingni koʻtarib, atrofingga boq! Hammasi toʻplanib, senga kelmoqda. Oʻgʻillaringni uzoqlardan olib keladilar, Qizlaringni chaqaloqlarday qoʻllarda koʻtarib keladilar.

⁵Oʻshanda shularni koʻrib, nur sochasan, Yuraging hapriqib, qinidan chiqquday boʻladi. Zotan, dengiz orqali keladigan boyliklar senga nasib etadi, Xalqlarning boyligi senga keladi.

⁶Yurting tuya suruvlariga toʻlib ketadi, Midiyon, Efaxning[308] boʻtaloqlari bilan toʻladi. Ularning hammasi Shava yurtidan[309] keladi, Oltinu tutatqilar olib keladi. Ular Egamizga madhlar aytadi.

⁷Kedarning hamma qoʻy suruvlari senga keladi, Navayotning[310] qoʻchqorlari senga xizmat qiladi. Egamizning qurbongohida Ular qurbonlik deb qabul qilinadi. Egamiz Oʻz uyini yanada ulugʻvor qiladi.

⁸Bulutlar kabi, uchayotgan nima u? Inlariga uchayotgan kaptarlarga oʻxshash nima u?

⁹Shubhasiz, dengiz ortidagi yurtlar Egamizga muntazir boʻladi. Isroil xalqining Muqaddas Xudosi — Egangiz Xudoning sharafiga Tarshish[311] kemalari boshchiligida Bolalaringizni uzoqdan olib kelishadi, Oltinu kumushlari bilan birga olib kelishadi. Zotan, Egamiz seni ulugʻvorlik bilan qoplagan.

¹⁰Egamiz Quddusga shunday deydi: “Begonalar devorlaringni tuzatadi, Shohlari senga xizmat qiladi. Gʻazablanganimda senga jazo bergan boʻlsam ham, Endi marhamat qilib, senga shafqat qilaman.

¹¹Darvozalaring doimo ochiq boʻladi, Ular kechayu kunduz yopilmaydi. Shunda xalqlar senga boyliklarini olib keladi, Ularni oʻz shohlari boshlab keladi.

¹²Senga xizmat qilmagan elatu shohlik yoʻq boʻladi, Ha, u xalqlar batamom nobud boʻladi.

¹³Lubnonning faxrlangan daraxtlari Senga olib kelinadi. Sarv, chinor, sadr yogʻochlari Muqaddas maskanimni bezatish uchun keltiriladi. Oyogʻim turgan shu joyga Men shuhrat keltiraman.

¹⁴Senga zulm qilganlarning oʻgʻillari kelib, Senga ta’zim qiladilar. Sendan nafratlanganlarning hammasi Oyoqlaringga yiqiladi. Ular seni «Egamizning shahri, Isroil xalqining Muqaddas Xudosining shahri — Sion» deb atashadi.

¹⁵Ilgari sen tashlab ketilgan, Hamma nafrat etgan, Biror kimsa oʻtmaydigan joy eding. Endi Men seni abadiy ulugʻvor qilaman, Jamiki nasllarning shodligi qilaman.

¹⁶Elatlar, shohlar seni ona kabi emizadilar, Oʻshanda Men, Egang, sening najotkoring ekanligimni bilib olasan, Yoqub naslining qudratli Xudosi — Qutqaruvching Men ekanligimni anglaysan.

¹⁷Senga bronza oʻrniga oltin, Temir oʻrniga kumush, Yogʻoch oʻrniga bronza, Tosh oʻrniga temir keltiraman. Tinchlik sening hakaming, Solihlik hukmdoring boʻladi.

¹⁸Yurtingda endi zoʻravonlik tovushi eshitilmaydi, Chegarang ichida vayronagarchilik, halokat boʻlmaydi. Devorlaringga, Najot deb nom qoʻyasan, Darvozalaringga, Sharaf deya nom berasan.

¹⁹Endi kunduzi quyosh senga nur sochmaydi, Oy ham yorugʻlik manbaing boʻlmaydi. Senga Mening Oʻzim to abad nur manbayi boʻlaman, Men, Xudoying, sening ulugʻvorliging boʻlaman.

²⁰Quyoshing hech qachon botmaydi, Oying endi boshqa yashirinmaydi, Chunki Men sening quyoshu oying boʻlaman. Ha, Men sening to abad nuring boʻlaman, Qaygʻuli kunlaring tamom boʻladi.

²¹Xalqingning hammasi solih boʻladi, Ular yurtni to abad mulk qilib oladi. Oʻzim oʻtqazgan niholdir ular, Menga shuhrat keltirsin deb, yaratgan Qoʻllarimning ijodi ular.

²²Eng kichik odamingdan mingta odam chiqadi, Eng zaif odamingdan kuchli xalq paydo boʻladi. Men, Egang, buni oʻz vaqtida tez bajo keltiraman.”