Read Uzbek Muqaddas Kitob Ishayo 61 Bible Online

Ishayo 61 - Uzbek Muqaddas Kitob bible

Ishayo 61

¹Egamiz Rabbiyning Ruhi meni qamrab olgan, Chunki U meni tanlagan. “Yoʻqsillarga xushxabar yetkazsin, Xasta qalblarga shifo bersin, Asirlarga ozodlik e’lon qilsin, Zindondagilarga erkinlik xabarini bersin” deb, Egam meni yubordi.

²“Egamning marhamat yilini, Xudoning qasos oladigan kunini e’lon qilsin, Azadorlarning hammasini ovutsin” deb, Egam meni yubordi.

³“Quddusda[312] nola qilayotganlarga tasalli bersin, Ularga kul oʻrniga zeb — ziynat, Aza oʻrniga shodlik moyi, Ma’yus ruh oʻrniga madhiya bersin” deb, Egam meni yubordi. Endi ularni “Egamiz Oʻz shuhrati uchun ekkan koʻchatlar, Solihlik emanlari” deb atashadi.

⁴Endi ular qadimgi vayronalarni qayta tiklaydi, Azaliy vayrona yerlarni yana oʻnglaydi, Nasllar osha vayron yotgan shaharlarni qayta quradi.

⁵Ey xalqim, begonalar kelib, mol — qoʻylaringizni boqadi, Yot xalq oʻgʻillari dehqoningiz, bogʻboningiz boʻladi.

⁶Sizlarni esa Egamizning ruhoniylari deb atashadi, Xudoyimizning xizmatkorlari degan nom olasizlar. Elatlarning boyliklari sizlarniki boʻladi, Oʻzga xalqlardan kelgan mol — mulk bilan faxrlanasiz.

⁷Uyat oʻrniga sizlar ikki hissa ulush olasiz. Sharmanda boʻlmaysiz, olgan mulkingizdan shodlanasiz. Ha, oʻz yurtingizda ikki hissa ulush olasiz, Abadiy shodlikka ega boʻlasiz.

⁸Egam aytar: “Men, Egangiz, adolatni sevaman, Talonchilik, haqsizlikdan nafratlanaman. Sadoqat bilan xalqimga mukofotini beraman. Ular bilan abadiy ahd tuzaman.

⁹Ularning nasli xalqlar orasida mashhur boʻladi, Ularning zurriyoti ellar orasida dong taratadi, Koʻrganlarning hammasi ularni «Egamiz baraka bergan xalq» deb tan oladi.”

¹⁰Egam tufayli men buyuk shodlik topaman, Xudoyim deb qalbim joʻsh uradi. Zotan, U meni najot libosi bilan oʻradi, Zafar kiyimini menga kiydirdi. Men toj kiygan kuyovga oʻxshayman, Zeb — ziynat bilan bezangan kelindayman.

¹¹Yer oʻsimlikni yetishtirgani kabi, Bogʻ ekilganlarni oʻstirgani singari, Egamiz Rabbiy barcha xalqlar koʻz oʻngida Solihlik va madhiyalarni yetishtiradi.