Read Uzbek Muqaddas Kitob Ishayo 62 Bible Online

Ishayo 62 - Uzbek Muqaddas Kitob bible

Ishayo 62

¹Quddus haqi, men sukut saqlamayman, Sion haqi, men jim turmayman. Uning zafari tong kabi nur sochmaguncha, Uning najoti mash’ala kabi yonmaguncha, Men aslo jim turmayman.

²Ey Quddus xalqi, xalqlar sizning gʻalabangizni, Har bir shoh shuhratingizni koʻradi. Ular sizni yangi nom bilan ataydi, Bu nomni Egamizning Oʻzi sizlarga beradi.

³Sizlar Egamizning qoʻlida goʻzallik tillaqoshi, Xudoyingizning qoʻlida shohlik toji boʻlasiz.

⁴Endi sizni “Tark etilgan” deb aytmaslar, Sizning yurtingizni “Tashlandiq” deb atamaslar. Endi sizga “Undan mamnunman” degan nom beriladi, Yurtingizni esa “Oilali” deb aytishadi. Zotan, Egangiz sizdan mamnun boʻladi, Yurtingiz ham oilali boʻladi.

⁵Yigit qiz bilan turmush qurganday, Oʻgʻillaringiz yurtingizga bogʻlanib, Unga egalik qiladi. Kuyov kelin bilan qanday shod boʻlsa, Xudoyingiz siz bilan shunday sevinadi.

⁶Ey Quddus, devorlaringga soqchilar qoʻydim, Ular kechayu kunduz ibodatni bas qilmaydi. Ey Egamizga ibodat qiladiganlar! Sizlar ham hech jim turmang.

⁷Quddusni barqaror qilgunga qadar, Uni yer yuzining faxri qilmagunga qadar, Egamizga hech tinchlik bermanglar.

⁸Egamiz oʻng qoʻlini koʻtarib, Oʻz qudrati bilan ont ichdi: “Hech qachon dushmanlaringizga Doningizni yemish qilib bermayman. Mehnatingiz singgan sharobni Begonalar ichmaydi.

⁹Ha, don yiqqanlarning oʻzi don yeydi — da, Men, Egasiga hamdu sano aytadi. Uzumni yigʻib — terganlar Sharobni muqaddas hovlimda ichadi.”

¹⁰Ey Quddus aholisi, darvozalardan chiqing! Qaytayotgan xalqqa yoʻlni tayyorlang! Tuproq yigʻib yoʻl qiling, Toshlarni terib tashlang, Xalqlar uchun bayroq tiking!

¹¹Mana, Egamiz yerning toʻrt chetiga e’lon qilmoqda: “Goʻzal Quddusga[313] shunday deb ayting: «Qara, najotkoring kelmoqda, Ana, Uning Oʻzi taqdirlaydi, Mukofotini Oʻzi bilan olib kelmoqda.»”

¹²Ey Quddus, sening xalqingni “Muqaddas” deb aytadilar, “Egamiz qutqargan xalq” deb aytadilar. Seni “Egamiz izlab topgan, tark etilmagan shahar” deb ataydilar.