Read Uzbek Muqaddas Kitob Ishayo 66 Bible Online

Ishayo 66 - Uzbek Muqaddas Kitob bible

Ishayo 66

¹Egamiz shunday aytmoqda: “Osmon Mening taxtimdir, Yer oyogʻim tagidagi kursidir. Menga qanday uy qurib bera olasiz?! Qaysi joy Menga maskan boʻla oladi?!

²Axir, hammasini Oʻz qoʻllarim bilan yaratganman, Ha, butun borliq Men tufayli mavjuddir, — demoqda Egamiz. — Kamtar, moʻmin boʻlgan odamga, Kalomim oldida titraydiganga Men e’tibor bilan qarayman.

³Ammo buqani qurbonlik qiladigan inson Odam oʻldirgan qotil kabidir. Qoʻzini qurbonlik qiladigan odam Itning boʻynini sindirgan odam kabidir. Don nazri qiladigan odam Choʻchqa qonini nazr qiladigan odam kabidir. Tutatqi tutatgan odam Butga topinadigan odam kabidir[326]. Oʻshalar oʻz yoʻllarini tanladilar, Qilgan jirkanch ishlaridan jonlari lazzat olar.

⁴Men ham ularga qattiq jazo tanlayman. Ular nimadan qoʻrqsa, oʻshani boshlariga solaman. Axir, chaqirganimda, hech kim javob bermadi, Gapirganimda, hech kim quloq solmadi. Ular Mening oldimda qabihlik qildilar, Menga noma’qul boʻlgan yoʻlni tanladilar.”

⁵Ey Egamizning kalomini eshitib, titraydiganlar, Uning soʻzlariga quloq tutinglar: “Qardoshlaringiz sizdan nafratlanadi, Mening nomimni deb ular sizni haydagan. Sizlarni mazax qilib, shunday degan edi: «Qani, Egangiz ulugʻvorligini koʻrsatib, Sizlarni qutqarsin. Xursand boʻlganingizni koʻraylik — chi!» Endi oʻshalar sharmanda boʻladi.”

⁶Shahardan kuchli shovqin — suron kelmoqda! Ma’baddan bir ovoz eshitilmoqda! Bu Egamizning ovozidir! U Oʻzining dushmanlariga Qilmishlariga yarasha qaytaradi.

⁷Mana, Quddus toʻlgʻoq tutmasdan oldin tugʻdi, Toʻlgʻoq tutmay turib, bir oʻgʻil tugʻdi.

⁸Kim bunday voqeani eshitgan?! Kim bunday hodisani koʻrgan?! Xoʻsh, yurt bir kunda paydo boʻladimi?! Bir onda butun bir xalq dunyoga keladimi?! Qarang, toʻlgʻogʻi tutar — tutmas Qiz Quddus[327] oʻgʻillar tugʻdi.

⁹“Tugʻadigan paytgacha olib kelaman — u, Tugʻishga kuch bermaymanmi?! — demoqda Egamiz. — Tugʻishga kuch beraman — u, Bachadonni yopib qoʻyamanmi?!” — deb aytmoqda Xudoyingiz.

¹⁰Ey Quddusni sevadiganlar, Quddus bilan birga sevining, Hammangiz u bilan birga shodlaning. Ey Quddus uchun aza tutganlar, U bilan birga xursand boʻling!

¹¹Siz uning koʻkragidan emganday boʻlib, Toʻyib, tasalli topasiz. Qonib — qonib ichib, Uning moʻl — koʻl barakasidan zavq olasiz.

¹²Ha, Egamiz shunday aytmoqda: “Men Quddusga tinchlikni daryo kabi, Elatlarning boyligini toshqin soy kabi oqizib keltiraman. Quddus sizlarni emizikli boladay qoʻllarida koʻtarib yuradi, Sizlarni tizzalariga oʻtirgʻizib, parvarish qiladi.

¹³Bolasini ovutgan bir ona kabi, Men ham sizlarni ovutaman. Sizlar Quddusda tasalli topasiz.”

¹⁴Bularni koʻrib, qalbingiz shodlikka toʻladi, Tanangiz yangi maysa kabi, hayot bilan toʻliq boʻladi. Egamiz Oʻz qullariga qudratini, Dushmanlariga esa gʻazabini koʻrsatadi.

¹⁵Mana, qarang! Egamiz olov bilan kelmoqda, Uning jang aravalari quyunday kelmoqda. U ayovsiz qasos oladi, Gʻazabi olov kabi yonadi.

¹⁶Ha, Egamiz olovu qilich bilan Jamiki jonzotlarga qarshi kurashadi. Uning qoʻlidan koʻplari halok boʻladi.

¹⁷Egamiz shunday aytmoqda: “Oʻzlarini poklab, butlarga bagʻishlaganlar, sajdagoh bogʻlarga[328] borib, yoʻlboshchilariga ergashganlar yoʻq boʻladi. Choʻchqa va boshqa harom, makruh hayvonlarning goʻshtini yeydiganlar, ularning hammasi birgalikda halok boʻladi.

¹⁸Ularning ishlaridan, oʻylaridan nafratlanaman[329]. Hamma xalqlarni, elatlarni yigʻish vaqti keldi[330]. Ular kelib, Mening ulugʻvorligimni koʻradilar.

¹⁹Men ularning orasida alomat koʻrsataman. Omon qolganlarini quyidagi xalqlar orasiga yuboraman: Tarshish[331], Liviya[332] xalqlariga, kamonkashlari bilan mashhur boʻlgan Lidiya[333] xalqiga, Tuval[334] va Yunon[335] xalqlariga, dengiz ortidagi Men haqimda eshitmagan, Mening ulugʻvorligimni koʻrmagan xalqlarga. Ular Mening buyukligimni oʻzga xalqlarga bildiradilar.”

²⁰Egamiz shunday deydi: “Oʻshanda ular barcha xalqlar orasidan qolgan hamma birodarlaringizni olib kelishadi. Ularni nazr sifatida muqaddas togʻim[336] — Quddusga keltirishadi. Xuddi Isroil xalqi pok don nazrini Ma’badga olib kelganday, ular birodarlaringizni Quddusga otlarda, jang aravalarida, ot qoʻshilgan aravalarda, xachirlarda va tuyalarda olib kelishadi.”

²¹Egamiz shunday deydi: “Ularning orasidan ba’zilarini ruhoniy, ba’zilarini esa levi qilib tayinlayman.”

²²Egamiz shunday aytmoqda: “Men yaratadigan yangi yer va yangi osmon koʻz oldimda qancha turadigan boʻlsa, avlodlaringiz ham, nomingiz ham shuncha turadi.

²³Har yangi oy shodiyonasida, har Shabbat kunida jamiki insonlar huzurimga kelib, Menga sajda qiladilar, — demoqda Egamiz.

²⁴— Ular tashqariga chiqqanlarida Menga qarshi chiqqanlarning jasadlarini koʻradilar. Oʻsha jasadlarni yeydigan qurtlar oʻlmaydi, ularni yondiradigan olov hech qachon oʻchmaydi. Hammasi barcha inson zotiga jirkanch boʻladi.”