Read Uzbek Muqaddas Kitob Ishayo 7 Bible Online

Ishayo 7 - Uzbek Muqaddas Kitob bible

Ishayo 7

¹Uzziyoning nabirasi, Yoʻtomning oʻgʻli Oxoz[32] hukmronligi davrida Oram shohi Ratan va Isroil shohi Ramaliyo oʻgʻli Pekax Quddusga kelib, saf tortdilar. Ammo uni bosib ololmadilar.

²Dovud xonadoniga[33]: “Oram lashkari Efrayim[34] xalqi bilan ittifoq tuzibdi” degan xabar yetib keldi. Shoh Oxoz hamda xalq shunchalik vahimaga tushdilarki, hammalari shamolda tebrangan daraxtday titradilar.

³Shunda Egamiz Ishayoga dedi: “Sen oʻgʻling Sheryosub[35] bilan katta yoʻlga chiqqin. U yoʻl kir yuvuvchining dalasi tomon ketgan. Yuqori hovuz arigʻining oxiri boʻlgan oʻsha joyda Oxozni kutib olib,

⁴unga shunday deb aytinglar: «Oʻzingni bos, tinchlan, qoʻrqma! Oram shohi Ratan va Ramaliyo oʻgʻli gʻazabga mingan, ammo ularni deb qoʻrquvdan titramagin. Ikkovi ham yonib bitayotgan gʻoʻladay.

⁵Efrayim va Ramaliyo oʻgʻli bilan birga, Oram senga qarshi fitna qilib, shunday dedi:

⁶‘Yahudoga bostirib boramiz. Xalqini vahimaga solib, qoʻlga olamiz. Soʻng Toʻval oʻgʻlini[36] Yahudo shohi qilib tayinlaymiz.’

⁷Ammo Egamiz Rabbiy aytmoqda: Bu fitna amalga oshmas, Bu hech qachon yuz bermas.

⁸Oramning boshi Damashqdir, Damashqning boshi Ratandir, Oltmish besh yildan soʻng Efrayim Qirilib bitar, aslo xalq boʻlmas.

⁹Efrayimning boshi Samariyadir, Samariyaning boshi Ramaliyo oʻgʻlidir. Agarda soʻzimga ishonmasangiz, Mustahkam tura olmaysiz.»”

¹⁰Egamiz yana Ishayo orqali Oxozga shunday dedi:

¹¹— Aytganlarimni amalga oshirishimga ishonch hosil qilishing uchun, Men, Egang Xudodan oʻzingga biror alomat soʻra, oʻsha alomat oʻliklar diyoridan[37] chuqur yoki falak toqidan baland boʻlsin.

¹²Shunda Oxoz Ishayoga: — Soʻramayman, Egamni sinamayman, — dedi.

¹³Shunda Ishayo dedi: — Eshiting, ey Dovud xonadoni! Odamlarni bezdirganingiz sizlarga kamlik qilganday, Xudoyimni ham bezdirasizlarmi?!

¹⁴Endi Rabbiyning Oʻzi sizlarga alomat beradi: ana, qiz[38] homilador, u oʻgʻil tugʻadi va Uning ismini Immanuil[39] qoʻyadi.

¹⁵Oʻsha bola yomonni rad etib, yaxshini tanlashni biladigan yoshga yetganda qatiq va asal[40] yeydi.

¹⁶Ha, oʻsha vaqt kelmasdan oldin, sizlarni vahimaga solayotgan ikkala shohning yerlari tashlandiq boʻladi.

¹⁷Egam sizning va xalqingizning, ota — bobolaringizning xonadoni boshiga shunday kunlarni soladiki, Efrayim Yahudodan ajralib chiqqandan beri[41] bunday kunlar ularning boshiga tushmagan: evoh, Ossuriya shohi kelmoqda!

¹⁸Oʻsha kuni Egam Misr daryolarining yuqori oqimidagi pashshalarga, Ossuriya yurtidagi arilarga ishora qiladi.

¹⁹Shundan keyin ularning hammasi kelib, chuqur soyliklarga, qoyalarning yoriqlariga joylashadilar. Hamma chakalakzorlarga, hamma yaylovlarga oʻrnashib oladilar.

²⁰Oʻsha kuni Rabbiy Ossuriya shohini ishlatadi. U Rabbiyning qoʻlida Furot daryosining ortida ijaraga olingan ustara kabi boʻladi. Ha, soqolingizni butunlay qirib tashlaydi, boshu oyogʻingizda birorta tuk qolmaydi[42].

²¹Oʻsha kuni bir odam ikki qoʻy va bir gʻunajinni tirik saqlab qoladi.

²²U odamda shuncha koʻp sut boʻladiki, u qatiq yeydi. Yurtda qolganlarning hammasi qatiq va asal yeydi.

²³Ming kumush tangaga[43] arziydigan, toklarga toʻla bir uzumzor bor. Oʻsha kuni mana shu uzumzor ham chakalakzoru tikanzorlarga aylanadi.

²⁴Shundan keyin odamlar u yerga kamonu oʻqlari bilan boradigan boʻladi.

²⁵Bir zamonlar ishlov berilgan, ekin ekilgan barcha tepaliklarga endi sizlar bormaysizlar. Axir, chakalakzoru tikanzorlardan qoʻrqasizlar — da. U yerlarda mollar oʻtlaydi, u yerlarni qoʻy — echkilar toptaydi.