Read Uzbek Muqaddas Kitob Ishayo 8 Bible Online

Ishayo 8 - Uzbek Muqaddas Kitob bible

Ishayo 8

¹Shunda Egamiz menga aytdi: — Katta lavha olib, unga: “Moxirshalolxoshbozga[44] tegishli”, deb tushunarli qilib yoz.

²Men ruhoniy Uriyo bilan Yabarakiyo oʻgʻli Zakariyoni Oʻzimga ishonchli guvohlar qilib tayinlayman.

³Shundan keyin men xotinim bilan yotdim. U homilador boʻlib, oʻgʻil tugʻdi. Shunda Egamiz menga dedi: — Uning ismini Moxirshalolxoshboz deb qoʻy.

⁴Bola hali “ota”, “ona” deb aytishni oʻrganmasdan oldin, Ossuriya shohi Damashqning boyliklarini va Samariyadan tortib olgan oʻljalarini olib ketadi.

⁵Egamiz yana menga gapirib:

⁶— Bu xalq tinch oqadigan Shiloʻvax suvlaridan[45] voz kechdi, Ratan va Ramaliyo oʻgʻli Pekaxdan koʻngillari shod boʻldi, — dedi.

⁷— Shuning uchun Men, Rabbiy, xalqimga qarshi Ossuriya shohini va uning shonli lashkarini boshlab kelmoqdaman. Ular Furot daryosining bahaybat toʻlqinlari kabidir. Hamma irmoqlardan oshib, hamma qirgʻoqlardan toshib ketadi.

⁸Sel kabi Yahudoni bosadi, uning boʻgʻziga yetib keladi. Shunga qaramay, Xudo biz bilandir![46] U yoyilgan qanotlari panohida yurtimizni omon saqlaydi!

⁹Ey xalqlar, safarbar boʻlavering, halokatga yoʻliqasiz! Ey uzoq yurtlardagi jamiki ellar, eshiting! Jangga bel bogʻlayvering, ammo halokatga yoʻliqasiz! Ha, bel bogʻlayvering, ammo halok boʻlasiz!

¹⁰Puxta reja qilavering, ammo rejangiz puchga chiqadi, Soʻz beravering, ammo amalga oshmaydi, Chunki Xudo biz bilandir!

¹¹Egam qudrati bilan meni Oʻziga jalb qilib, shunday koʻrsatma berdi: — Bu xalqning yoʻlidan bormanglar.

¹²Bu xalq isyon deb aytadigan hamma narsani sizlar isyon deb bilmanglar. Ularni qoʻrquvga soladigan narsalardan sizlar qoʻrqmanglar, vahimaga tushmanglar.

¹³Sizlar Men, Sarvari Olamni muqaddas deb izzat qilinglar. Faqat Mendan qoʻrqing, faqatgina Men sizni vahimaga solay.

¹⁴Oʻshanda Men Oʻzim sizlarga panoh boʻlaman. Ammo Isroilning ikkala xonadoni uchun Men qoqiltiradigan tosh, toʻsqinlik qiladigan qoya, Quddus aholisi uchun tuzoq va toʻr boʻlaman.

¹⁵Ulardan koʻplari qoqiladi, yiqilib, burda — burda boʻladi. Ular tuzoqqa tushib, asir boʻladi.

¹⁶Ey shogirdlarim, Egam menga bergan bu soʻzlarni avaylab asrang.

¹⁷Sarvari Olam Sion togʻida maskan qilgan. U Yoqub naslidan yuzini yashiryapti, ammo men Uni kutaman, umidim Undadir. Mana, qarang, Egam bergan farzandlarim bilan birga men shu yerdaman! Isroilda biz belgi va alomatmiz[47].

¹⁹Xalqlar sizlarga: “Arvoh chaqiruvchilarga boringlar, gʻalati tovush chiqarib, tushunarsiz soʻzlarni pichirlab aytadigan folbinlarga maslahat solinglar”, deb aytsalar, sizlar oʻz Xudoyingizga bormaysizmi?! Axir, tiriklar oʻliklardan nasihat izlab boradimi?!

²⁰Arvoh chaqiruvchilarga borishni maslahat berganlarga roʻshnolik boʻlmaydi. Sizlar ularga emas, Xudoning yoʻl — yoʻriqlari va ta’limotiga maslahat soling[48].

²¹Sizlarni notoʻgʻri yoʻlga boshlagan oʻsha xalqlar bu yurt boʻylab oʻtadi, ular och, iztirobda. Och qolib, gʻazablanib, shohini va xudolarini la’natlaydi. Yuqoriga qaraydi,

²²yerga qaraydi. Ana, kulfat va zulmat, gʻam va ofat. Ular yoʻq boʻlib ketadi.