Read Uzbek Muqaddas Kitob Ishayo 9 Bible Online

Ishayo 9 - Uzbek Muqaddas Kitob bible

Ishayo 9

¹Kulfat qamragan bu yurtda endi azob boʻlmaydi. Oldin Zabulun va Naftali yurti[49] sharmanda boʻlgan edi. Ammo kelajakda dengiz boʻyidagi yerlar, Iordanning narigi tomonidagi oʻlka[50] va gʻayriyahudiylar Jalilasi[51] ulugʻlanadi.

²Zulmatda yurgan xalq yorqin ziyoni koʻrdi, Oʻlim soya solgan yurt aholisi ustiga nur sochildi.

³Bu xalqni Sen koʻpaytirgansan, Ularga koʻp shodlik ato qilgansan. Hosil vaqtidagi mamnunlik kabi, Oʻljalarin boʻlishib olgan paytdagi kabi, Ular huzuringda quvonchga toʻlgan.

⁴Bu xalqning ogʻir boʻyinturugʻini, Yelkasidagi tayogʻini Sen sindirib tashlagansan. Zolimlarning kaltagini Midiyon xalqi kabi, Magʻlub qilgansan[52].

⁵Jangda kiyilgan etiklar, Qonga belangan hamma kiyim Olovga tashlanib, yoqilajak.

⁶Mana biz uchun bola tugʻildi, Oʻgʻil bizga berildi. Hukmronlik Uning zimmasidadir, Nomi Ajoyib Maslahatchi[53], qudratli Xudo, Abadiy Ota, Tinchlik Shahzodasidir.

⁷Dovudning taxtida Uning hukmronligi ortib boradi. Tinchlik to abad hukm suradi. Hozirdan boshlab, to abad U adolat va haqiqat ila Shohligini mustahkamlab, barqaror qiladi. Sarvari Olam jon kuydirib, Buni bajo aylaydi.

⁸Yoqub nasliga qarshi Rabbiy bir soʻz yubordi, Uning soʻzi Isroil xalqiga yetib keldi.

⁹Efrayimda[54], Samariyada yashaydiganlar, Jamiki xalq bundan xabardor boʻldi. Ular dimogʻdorlik, kiborlik ila aytmoqda:

¹⁰“Gʻishtin imoratlar vayron boʻlsa, Yoʻnilgan toshlar bilan quramiz. Shikamora — anjir daraxtlari[55] kesilgan boʻlsa, Ularning oʻrniga sadr daraxtlarini[56] ekamiz.”

¹¹Ana, Oram shohi Ratanga qarshi Egam uning dushmanlarini qoʻzgʻatdi, Gʻanimlarini da’vat qildi.

¹²Sharqdan Oramlar, gʻarbdan Filistlar Ogʻizlarin katta ochib, Isroilni yutib yubordi. Ammo shunday boʻlsa ham, Egam tushmas gʻazabidan, Uning qoʻli hamon Isroilga qarshi koʻtarilgan.

¹³Bu xalq Sarvari Olamga yuz burmadi, Jazo bergan Zotga ular qaytmadi.

¹⁴Shunda Egam bir kunda Isroilning boshini va quyrugʻini, Xurmosini va qamishini kesib oldi[57].

¹⁵Oqsoqollar, amaldorlar boshdir, Soxta paygʻambarlar quyruqdir.

¹⁶Ular bu xalqni yoʻldan adashtirgan, Ularga ergashganlar boshi berk koʻchaga kirib qolgan.

¹⁷Hammasi shakkok, qabihlik qilar, Barcha ogʻizlardan ahmoqona soʻz chiqar. Rabbiy yoshlardan mamnun boʻlmadi, Yetim va bevalarga shafqat koʻrsatmadi. Ammo shunday boʻlsa ham, Egam tushmas gʻazabidan, Uning qoʻli hamon Isroilga qarshi koʻtarilgan.

¹⁸Fosiqlik olovga oʻxshab yonar, Yeb bitirar butazoru tikanzorlarni. Oʻrmondagi changalzorlarni yondirib, Balandlarga tutunini oʻrlatadi.

¹⁹Sarvari Olamning qahridan Yurt yonib bitar, Xalq olovga yonilgʻi boʻlar. Odamlar oʻz yaqiniga shafqat qilmas,

²⁰Ular oʻng tarafga hamla qiladilar, Ammo och qoladilar. Yutaman deb chap tomonga hujum qiladilar, Ammo toʻymaydilar. Oʻz qoʻlining goʻshtini yeydi insonlar.

²¹Manashe qabilasi yeydi Efrayim qabilasini, Efrayim esa Manasheni, Ikkovi birlashib Yahudoga[58] hujum qiladi. Ammo shunday boʻlsa ham, Egam tushmas gʻazabidan, Uning qoʻli hamon Isroilga qarshi koʻtarilgan.