Read Uzbek Muqaddas Kitob Levilar 13 Bible Online

Levilar 13 - Uzbek Muqaddas Kitob bible

Levilar 13

¹Muso va Horunga Egamiz quyidagi qonunlarni berdi:

²agar birortasining badanida teri kasalligiga[30] aylanishi mumkin boʻlgan shish, toshma yoki dogʻ paydo boʻlsa, oʻsha odamni ruhoniy Horun yoki uning oʻgʻillaridan[31] biri huzuriga olib keling.

³Ruhoniy badandagi yarani koʻrsin. Agar yara ustidagi tuklar oqargan va yara teri ostiga oʻtgan boʻlsa, bu teri kasalligidir. Ruhoniy yarani koʻrib boʻlishi bilanoq oʻsha odamni harom deb e’lon qilsin.

⁴Bordi — yu, odamning badanida oq dogʻ boʻlib, teri ostiga oʻtmagan boʻlsa va dogʻ ustidagi tuklar oqarmagan boʻlsa, ruhoniy kasallangan odamni yetti kunga yolgʻizlatib qoʻysin.

⁵Yettinchi kuni ruhoniy yana oʻsha odamni koʻrsin. Agar yara oʻzgarmagan boʻlsa va atrofidagi teriga yoyilmagan boʻlsa, ruhoniy oʻsha odamni yana yetti kunga yolgʻizlatib qoʻysin.

⁶Yettinchi kuni ruhoniy uni yana koʻrsin. Agar yara tuzala boshlagan boʻlib, atrofidagi teriga yoyilmagan boʻlsa, ruhoniy u odamni pok deb e’lon qilsin. Bu toshmadir. Oʻsha odam kiyimlarini yuvsin va u pok boʻladi.

⁷Bordi — yu, ruhoniy tekshirib, pok deb e’lon qilgan oʻsha odamning terisidagi toshmasi yoyilib ketsa, u qaytadan ruhoniyga koʻrinsin.

⁸Ruhoniy kasalni yana tekshirsin. Agar toshma teriga yoyilgan boʻlsa, ruhoniy u odamni harom deb e’lon qilsin. Bu teri kasalligidir.

⁹Agar odam teri kasalligiga chalinsa, uni ruhoniy huzuriga olib keling.

¹⁰Ruhoniy uni tekshirsin. Agar teri ustida oq shish paydo boʻlib, shish ustidagi tuklar oqargan boʻlsa va ochiq yara hosil boʻlgan boʻlsa,

¹¹bu tuzalmas teri kasalligidir. Ruhoniy u odamni harom deb e’lon qilsin, uni yolgʻizlatib oʻtirmasin, chunki uning haromligi oydindir.

¹²Bordi — yu, teridagi toshma odamning butun tanasini boshdan — oyoq qoplab olsa,

¹³ruhoniy uni tekshirsin. Agar toshma butun tanaga yoyilgan boʻlsa, ruhoniy uni pok deb e’lon qilsin. Hamma teri birday oqargani uchun bunday odam pok hisoblanadi.

¹⁴Bordi — yu, uning badanida ochiq yara hosil boʻlsa, oʻsha odam harom hisoblanadi.

¹⁵Ruhoniy ochiq yarani koʻrsin va u odamni harom deb e’lon qilsin. Ochiq yara haromdir, bu teri kasalligining belgisidir.

¹⁶Lekin ochiq yara tuzalib, oqarsa oʻsha odam ruhoniyning oldiga kelsin.

¹⁷Ruhoniy uni koʻrsin. Agar yara haqiqatan ham oqargan boʻlsa, ruhoniy kasal odamni pok deb e’lon qilsin. Shunda u pok boʻladi.

¹⁸Agar birortasining badaniga chipqon chiqib, bitgan boʻlsa — yu,

¹⁹lekin chipqon oʻrnida oq shish yoki qizgʻish — oq dogʻ paydo boʻlsa, u odam ruhoniyga koʻrinsin.

²⁰Ruhoniy uni koʻrsin. Agar dogʻ teri ostiga oʻtgan boʻlsa va tuklari oqarib qolgan boʻlsa, ruhoniy oʻsha odamni harom deb e’lon qilsin. Demak, chipqon oʻrnida teri kasalligi hosil boʻlgan.

²¹Lekin ruhoniy uni tekshirganda, dogʻ ustidagi tuklar oqarmagan, dogʻ terining ostiga oʻtmagan va tuzala boshlagan boʻlsa, ruhoniy oʻsha odamni yetti kunga yolgʻizlatib qoʻysin.

²²Agar dogʻ teriga yoyilib ketsa, ruhoniy u odamni harom deb e’lon qilsin. Bu teri kasalligidir.

²³Bordi — yu, dogʻ oʻzgarmasa va yoyilmasa, bu dogʻ chipqonning chandigʻi, xolos. Ruhoniy bu odamni pok deb e’lon qilsin.

²⁴Agar birortasi kuyib qolsa va kuygan joyining rangi oʻzgarib, qizgʻish — oq yoki oppoq tusga kirsa,

²⁵ruhoniy kuygan joyni tekshirsin. Agar kuygan joy ustidagi tuklar oqarib qolgan boʻlsa va dogʻ teri ostiga oʻtgan boʻlsa, demak, kuygan joy oʻrnida teri kasalligi hosil boʻlgan. Ruhoniy bu odamni harom deb e’lon qilsin.

²⁶Lekin ruhoniy uni tekshirganda tuklar oqarmagan va dogʻ teri ostiga oʻtmagan boʻlsa, buning ustiga dogʻ tuzala boshlagan boʻlsa, ruhoniy u odamni yetti kunga yolgʻizlatib qoʻysin.

²⁷Yettinchi kuni ruhoniy u odamni koʻrsin. Agar dogʻ teriga yoyilgan boʻlsa, ruhoniy u odamni harom deb e’lon qilsin. Bu teri kasalligidir.

²⁸Bordi — yu, dogʻ oʻzgarmasa va atrofdagi teriga yoyilmasa, buning ustiga tuzala boshlagan boʻlsa, demak, bu kuyish natijasida paydo boʻlgan shishdir. Ruhoniy u odamni pok deb e’lon qilsin. Bu kuygan joyning izidir.

²⁹Agar erkak yoki ayolning boshiga yo jagʻiga yara chiqsa,

³⁰ruhoniy yarani tekshirsin. Yara terining ostiga oʻtgan boʻlsa va yara ustidagi tuklar sargʻayib, nimjon boʻlib qolgan boʻlsa, ruhoniy oʻsha erkak yoki ayolni harom deb e’lon qilsin. Demak, uning boshi yoki jagʻiga qichitma chiqqan, bu teri kasalligidir.

³¹Agar ruhoniy qichitmani tekshirganda yara terining ostiga oʻtmagan boʻlsa, lekin yaraning ustida sogʻlom tuklar boʻlmasa, ruhoniy qichitmaga chalingan bu odamni yetti kunga yolgʻizlatib qoʻysin.

³²Yettinchi kuni ruhoniy qichitmani yana koʻrsin. Agar qichitma yoyilmagan boʻlsa, uning ustida sargʻish tuklar boʻlmasa, yara terining ostiga oʻtmagan boʻlsa,

³³kasal odam hamma sochini qirsin, lekin qichitma bor joyiga tegmasin. Soʻng ruhoniy uni yana yetti kunga yolgʻizlatib qoʻysin.

³⁴Yettinchi kuni ruhoniy qichitmani koʻrsin. Agar qichitma yoyilmagan va terining ostiga oʻtmagan boʻlsa, ruhoniy u odamni pok deb e’lon qilsin. U odam kiyimlarini yuvsin, shunda u pok boʻladi.

³⁵Bordi — yu, ruhoniy uni pok deb e’lon qilgandan keyin qichitma yoyilsa,

³⁶ruhoniy u odamni yana tekshirsin. Agar qichitma haqiqatan ham yoyilgan boʻlsa, sargʻish tukni qidirishning hojati yoʻq. U odam haromdir.

³⁷Bordi — yu, ruhoniyning nazarida qichitma oʻzgarmagan boʻlsa va uning ustida qora tuklar oʻsa boshlagan boʻlsa, qichitma tuzalgan boʻladi. Ruhoniy u odamni pok deb e’lon qilsin.

³⁸Agar erkak yoki ayolning badanida oq dogʻlar paydo boʻlsa,

³⁹ruhoniy oʻsha odamni tekshirsin. Agar bu dogʻlar koʻrinar — koʻrinmas oqishroq tusda boʻlsa, bu bor — yoʻgʻi toshmadir. Bunday odam pokdir.

⁴⁰Agar odamning sochi toʻkilgan boʻlsa, u odam kal, lekin pok hisoblanadi.

⁴¹Boshning old tomonidagi va chakkalaridagi sochlari toʻkilgan boʻlsa, u odam kal boʻlgani bilan pok hisoblanadi.

⁴²Bordi — yu, boshning kal joyida qizgʻish — oq dogʻ paydo boʻlsa, bu teri kasalligidir.

⁴³Ruhoniy uni koʻrsin. Agar shish haqiqatan teri kasalligi singari qizgʻish — oq tusda boʻlsa,

⁴⁴demak, odam kasallangan, u haromdir. Boshidagi yarasi tufayli ruhoniy uni harom deb e’lon qilsin.

⁴⁵Bunday yomon teri kasalliklaridan biriga chalingan odam kiyimlarini yirtsin, sochini toʻzitsin[32], yuzining quyi qismini berkitsin. Soʻng: “Harom! Harom!” deb baqirsin.

⁴⁶U odam kasalligi davomida harom hisoblanadi. U alohida, qarorgohdan tashqarida yashasin.

⁴⁷Agar kiyimni mogʻor bossa, jun yoki zigʻir matosidan tikilgan kiyimni,

⁴⁸jun yoki zigʻirdan toʻqilgan matoni, charmni yo charmdan yasalgan buyumni

⁴⁹bosgan oʻsha mogʻor koʻkimtir yoki qizgʻish rangda boʻlsa, bu yoyiladigan zamburugʻdir, uni ruhoniyga koʻrsatish lozim.

⁵⁰Ruhoniy mogʻorni tekshirsin, soʻng zararlangan narsani yetti kunga qadar olib qoʻysin.

⁵¹Yettinchi kuni ruhoniy uni yana koʻrsin. Agar mogʻor kiyimga, toʻqilgan matoga yo charmdan yasalgan har qanday buyumga yoyilgan boʻlsa, bu yoyiladigan zamburugʻdir. Zararlangan narsa harom hisoblanadi.

⁵²Ruhoniy oʻsha narsani kuydirsin. Buyum yoyiladigan zamburugʻ bilan zararlangani uchun uni kuydirib yuborish kerak.

⁵³Bordi — yu, mogʻor kiyimga, matoga yoki charmga yoyilmagan boʻlsa,

⁵⁴ruhoniy zararlangan oʻsha narsani yuvdirsin. Soʻng uni yana yetti kunga olib qoʻysin.

⁵⁵Ruhoniy yuvilgan oʻsha narsani yana tekshirsin. Agar mogʻorlagan joyning rangi oʻzgarmagan boʻlsa, mogʻor yoyilmagan taqdirda ham harom hisoblanadi. Narsaning mogʻorlagan joyi ichki yoki tashqi tomonida boʻlishidan qat’iy nazar, uni kuydirib yuboring.

⁵⁶Bordi — yu, ruhoniy yuvilgan narsani tekshirganda mogʻorning rangi oʻchgan boʻlsa, ruhoniy kiyim, mato yoki charmdagi mogʻorlagan joyni yulib olsin.

⁵⁷Agar mogʻor oʻsha narsada yana paydo boʻlsa, zamburugʻ yana koʻpayishni boshlagandir, narsaning egasi uni kuydirib yuborsin.

⁵⁸Bordi — yu, yuvilgandan keyin narsadagi mogʻor ketsa, uni ikkinchi marta yuving va u pok boʻladi.

⁵⁹Jun yoki zigʻir matosidan tikilgan kiyimda, jun yoki zigʻirdan toʻqilgan matoda va charmdan yasalgan har qanday buyumda hosil boʻlgan zamburuqqa oid qoidalar shulardan iboratdir. Bular sizlarga halolni haromdan ajrata olishingiz uchun xizmat qiladi.