Read Uzbek Muqaddas Kitob Levilar 18 Bible Online

Levilar 18 - Uzbek Muqaddas Kitob bible

Levilar 18

¹Egamiz Muso orqali

²Isroil xalqiga shunday dedi: “Men Egangiz Xudoman.

³Sizlar yashab yurgan Misr xalqining odatlariga va Men sizlarni olib borayotgan Kan’on yurtidagi xalqlarning odatlariga taqlid qilmanglar. Ularning udumlariga ergashmanglar.

⁴Faqat Mening qonunlarimga itoat etinglar, qoidalarimni bitta qoldirmay bajaringlar. Zotan, Men Egangiz Xudoman.

⁵Qonun — qoidalarimga amal qilinglar. Ularga rioya qilgan odam hayotdan bahramand boʻladi. Men Egangizman.

⁶Tugʻishgan yaqin qarindoshingiz bilan yotmang. Men Egangizman.

⁷Onangiz bilan yotib, otangizning sha’niga dogʻ tushirmang. Onangiz boʻlgani uchun u bilan yotmang.

⁸Otangizning xotini bilan yotmang, bunday qilib otangizning sha’niga dogʻ tushirmang.

⁹Tugʻishgan yoki oʻgay opa — singlingiz bilan yotmang. U otangizning qizi yoki onangizning qizi boʻlishidan qat’iy nazar, siz bilan bir uyda katta boʻlgan yoki boshqa joyda oʻsganidan qat’iy nazar, u bilan yotmang.

¹⁰Oʻz nevarangiz — oʻgʻlingizning qizi yoki qizingizning qizi bilan yotmang. Bunday qilib oʻz sha’ningizga dogʻ tushirmang.

¹¹Otangizdan tugʻilgan, oʻgay onangizning qizi bilan yotmang, chunki u sizning oʻgay singlingizdir.

¹²Ammangiz bilan yotmang, chunki u otangizning jigaridir.

¹³Xolangiz bilan yotmang, chunki u onangizning jigaridir.

¹⁴Amakingizning sha’niga dogʻ tushirib, uning xotini bilan yotmang. Axir, u sizning kelin oyingizdir.

¹⁵Keliningiz bilan yotmang. U oʻgʻlingizning xotinidir.

¹⁶Aka — ukangizning xotini bilan yotmang. Bunday qilib akangizning sha’niga dogʻ tushirmang.

¹⁷Siz biror ayol bilan yotgan boʻlsangiz, oʻsha ayolning qizi yoki qiz nevarasi bilan yotmang. U oʻgʻlining qizi boʻlsa ham yoki qizining qizi boʻlsa ham u bilan yotmang, ular qondoshdir. Bunday qilish buzuqlikdir.

¹⁸Xotiningizning singlisini xotiningizga kundosh qilmang. Xotiningiz tirik ekan, uning singlisi bilan yotmang.

¹⁹Hayz koʻrib harom boʻlgan ayol bilan yotmang.

²⁰Qoʻshningizning xotini bilan jinsiy aloqa qilib, oʻzingizni bulgʻamang.

²¹Bolalaringizning birortasini Moʻlaxga qurbonlik qilmang[47], axir, Men Egangizman. Bunday qilmish bilan Men, Xudoyingizni badnom qilmang.

²²Ayol bilan yotganday, erkak kishi bilan yotmang. Bu jirkanchdir.

²³Hayvon bilan jinsiy aloqa qilib, oʻzingizni bulgʻamang. Ayol kishi ham oʻzini hayvonga qoʻyib berib, u bilan jinsiy aloqa qilmasin. Bu oʻtaketgan razillikdir.

²⁴Bunday ishlar qilib oʻzingizni bulgʻamang. Men oldingizdan haydayotgan xalqlar mana shunday ishlari tufayli bulgʻangan edilar.

²⁵Natijada butun yurt harom boʻlib ketdi. Men yurtni jazoladim, yurt esa u yerning xalqlarini qusib yubordi.

²⁶Sizlar Mening qonun — qoidalarimga rioya qilinglar. Isroil xalqidan boʻlganlar va orangizda yashayotgan musofirlar bunday jirkanch ishlarni qilmasin.

²⁷Zotan, sizlardan oldin mana shu yurtda yashagan xalqlar bu jirkanch ishlarning hammasini qilib, yurtni bulgʻagan edilar.

²⁸Agar sizlar ham yurtni bulgʻasangiz, bu yurt oldingi xalqlarni qusib yuborganday sizlarni ham qusib yuboradi.

²⁹Bunday jirkanch ishni qilgan har qanday odam xalq orasidan yoʻq qilinsin.

³⁰Xullas, talablarimni bajaringlar. Sizlardan oldin bu yurtda qilingan jirkanch ishlarni qilib, oʻzingizni bulgʻamanglar. Zotan, Men Egangiz Xudoman.”