Read Uzbek Muqaddas Kitob Levilar 19 Bible Online

Levilar 19 - Uzbek Muqaddas Kitob bible

Levilar 19

¹Egamiz Muso orqali

²butun Isroil jamoasiga shunday dedi: “Muqaddas boʻlinglar, chunki Men, Egangiz Xudo, muqaddasman.

³Har biringiz ota — onangizni hurmat qiling. Shabbat kunlarimga rioya qiling. Zotan, Men Egangiz Xudoman.

⁴Butlarga sajda qilmang, oʻzlaringiz uchun butlar yasamang. Men Egangiz Xudoman.

⁵Tinchlik qurbonligini Menga keltirganingizda qoidalarga rioya qiling, toki qurbonligingiz qabul boʻlsin.

⁶Qurbonlikning goʻshtini qurbonlik qilingan kuni yoki ertasi kuni tanovul qiling. Uchinchi kuni ortib qolgan goʻshtni kuydiring.

⁷Bordi — yu, qurbonlikning goʻshti uchinchi kuni yeyilsa, qurbonligingiz bulgʻangan hisoblanib, qabul boʻlmaydi.

⁸Undan yegan har bir odam Mening muqaddas deb bilgan narsamni bulgʻagani uchun jazoga tortilsin. Bunday odam xalq orasidan yoʻq qilinsin.

⁹Dalangiz hosilini oʻrganingizda dalaning eng chetidagi bugʻdoyni oʻrmang, yerga tushib qolgan bugʻdoy boshoqlarini ham termang.

¹⁰Uzumzoringiz hosilini yiqqaningizdan keyin, toklarda qolib ketgan va yerga tushib qolgan uzum boshlarini yigʻib olmang. Ularni kambagʻal va musofirlarga qoldiring. Men Egangiz Xudoman.

¹¹Oʻgʻrilik qilmang, aldamang, birovga yolgʻon gapirmang.

¹²Mening nomim bilan yolgʻondakam ont ichmang. Shu orqali Men, Xudoyingizni badnom qilmang. Men Egangizman.

¹³Qoʻshningizni tovlamang, uni talamang. Mardikorning haqini ertalabgacha qoldirmang.

¹⁴Kar odamni qargʻamang. Koʻr odamning yoʻliga toʻsiq qoʻymang. Men, Xudoyingizdan qoʻrqing. Men Egangizman.

¹⁵Hukm chiqarganda haqsizlik qilmang, faqirga ham yon bosmang, obroʻli odamning ham koʻngliga qarab ish tutmang. Qoʻshningizni adolat bilan hukm qiling.

¹⁶Odamlar orasida qoʻshningizni gʻiybat qilib, uning jonini xavf ostiga qoʻymang. Men Egangizman.

¹⁷Dilingizda birodaringizga qarshi gina qilmang. Qoʻshningizning aybini ochiq yuziga soling, shunda siz uning aybi uchun jazoga tortilmaysiz.

¹⁸Qasos olmang, yurtdoshingizga qarshi kek saqlamang. Aksincha, oʻzgani oʻzingizni sevganday seving. Men Egangizman.

¹⁹Qonun — qoidalarimga rioya qiling. Molingizni boshqa turdagi hayvonlar bilan chatishtirmang. Dalangizga ikki xil urugʻ sepmang. Ustingizga ikki turdagi ipdan toʻqilgan kiyimni kiymang.

²⁰Agar erkak kishi boshqa birovga unashtirib qoʻyilgan choʻri bilan yotsa, u keltirgan zararni choʻrining egasiga toʻlashi lozim. Choʻri hali ozodlikka chiqarilmagani uchun ikkoviga ham oʻlim jazosi berilmasin.

²¹Erkak ayb qurbonligi sifatida bir qoʻchqorni Uchrashuv chodiri kiraverishiga olib kelib, Menga taqdim qilsin.

²²Ruhoniy qoʻchqorni ayb qurbonligi qilib, oʻsha odamni Mening huzurimda gunohidan poklasin. Shunda uning qilgan gunohi kechiriladi.

²³Sizlar Kan’on yurtiga kirib, turli xil mevali daraxtlar ekkaningizdan keyin, uch yil davomida ularning mevasidan yemang. Ularni yeyish man etilsin.

²⁴Toʻrtinchi yili hamma mevalar shukrona nazri sifatida Menga bagʻishlansin.

²⁵Beshinchi yili esa mevalarini yeyishingiz mumkin. Shunday qilsangiz, daraxtlaringiz serhosil boʻladi. Men Egangiz Xudoman.

²⁶Qoni chiqarilmagan goʻshtni yemang. Ta’birchilarga e’tiqod qilmang, fol ochtirmang.

²⁷Chakkangizdagi sochlaringizni qirmang, soqolingizning uchini qirqmang.

²⁸Aza tutganingizda marhum uchun badaningizni kesmang, teringizni teshib surat solmang[48]. Zero, Men Egangizman.

²⁹Qizingizni fohishalik qilishga undamang[49], uni bulgʻamang. Toki yurt zinoga botmasin, buzuqlik avj olmasin.

³⁰Mening Shabbat kunlarimga rioya eting, muqaddas makonimni izzat qiling. Men Egangizman.

³¹Arvoh chaqiruvchilarning oldiga bormang, folbinlarga maslahat solmang. Ularning dastidan oʻzingizni bulgʻamang. Men Egangiz Xudoman.

³²Moʻysafidni koʻrganingizda oʻrningizdan turing, qariyaning hurmatini joyiga qoʻying. Men, Xudoyingizdan qoʻrqing. Men Egangizman.

³³Yurtingizda yashab yurgan musofirga zulm qilmang.

³⁴Unga oʻz yurtdoshingizday qarang. Musofirni oʻzingizni sevganday seving, chunki sizlar ham Misr yurtida musofir edingizlar. Men Egangiz Xudoman.

³⁵Uzunlikni, ogʻirlikni va miqdorni oʻlchaganda gʻirromlik qilmang.

³⁶Tarozingiz, qadoq toshlaringiz, oʻlchov togʻorayu kosalaringiz[50] toʻgʻri boʻlsin. Men sizlarni Misr yurtidan olib chiqqan Egangiz Xudoman.

³⁷Qonun — qoidalarimning hammasini bitta qoldirmay bajaringlar. Men Egangizman.”