Read Uzbek Muqaddas Kitob Levilar 25 Bible Online

Levilar 25 - Uzbek Muqaddas Kitob bible

Levilar 25

¹Egamiz Muso orqali Isroil xalqiga Sinay togʻida shunday dedi: “Men sizlarga berayotgan yurtga kirganingizdan keyin, har yettinchi yili yeringizga dam bering.

³Olti yil davomida dalalaringizga ekin ekinglar, uzumzorlaringizni butab, hosilini yigʻinglar.

⁴Yettinchi yili[75] esa yer toʻliq dam olsin, Men, Egangizga bagʻishlangan yil boʻlsin. Shu yili dalalaringizga ekin ekmanglar, uzumzoringizni xomtok qilmanglar.

⁵Yerdan oʻsib chiqqan boshoqlarni oʻrmanglar, xomtok qilinmagan tokdagi uzum boshlarini yigʻmanglar. Yer bir yil toʻliq dam olsin.

⁶Ammo oʻsha yili yerdan tabiiy holda oʻsib chiqqan hamma narsani yeyishingiz mumkin. Bular sizlar uchun, qulu choʻrilaringiz uchun, mardikoru siznikida vaqtinchalik turgan musofirlar uchun ozuqa boʻladi.

⁷Mol — holingiz va yurtingizdagi yovvoyi hayvonlar ham yer hosilidan oziqlanishadi.

⁸Yetti yilni[76] yetti marta qoʻshib sana, hammasi boʻlib qirq toʻqqiz yil boʻladi.

⁹Soʻng yettinchi oyning[77] oʻninchi kuni, ya’ni Poklanish kuni[78] butun yurt boʻylab karnaylar chalinsin.

¹⁰Elliginchi yilni muqaddas deb biling. Oʻsha yili yurt boʻylab hamma odamga ozodlik e’lon qiling. Shu yil sizlar uchun Qutlugʻ yil boʻlsin. Har kim ota — bobosining joyiga, oʻz qavmiga qaytib borsin.

¹¹Ha, elliginchi yil sizlar uchun Qutlugʻ yil boʻlsin. Shu yili ekin ekmanglar, yerdan oʻsib chiqqan boshoqlarni oʻrmanglar, xomtok qilinmagan tokdagi uzum boshlarini yigʻmanglar.

¹²Bu Qutlugʻ yil boʻlgani uchun, uni muqaddas deb bilinglar. Toʻgʻridan — toʻgʻri daladan uzilgan hosilni yeyishingiz mumkin.

¹³Qutlugʻ yil hammangiz ota — bobolaringizdan meros boʻlib qolgan yerlaringizni qaytarib olish uchun u yerlarga boring.

¹⁴Yeringizni qoʻshningizga sotganingizda yoki qoʻshnidan yer sotib olganingizda gʻirromlik qilmang.

¹⁵Yer sotib olganingizda yerning narxi keyingi Qutlugʻ yilgacha qolgan yillarning hisobiga asoslangan boʻlsin. Sotuvchi yerning narxini qolgan hosilli yillarning miqdoriga qarab belgilasin.

¹⁶Agar hali koʻp yil bor boʻlsa, yerning bahosini oshirsin. Bordi — yu, ozroq yil qolgan boʻlsa, bahosini kamaytirsin. Sotuvchi aslida yerni emas, balki yer beradigan hosil miqdorini sotadi.

¹⁷Gʻirromlik qilmang, Men, Xudoyingizdan qoʻrqing. Men Egangiz Xudoman.

¹⁸Qonun — qoidalarimni bitta qoldirmay bajaring, shunda yurtingizda tinch yashaysizlar.

¹⁹Yer hosilini beradi, sizlar toʻyguningizcha uning ne’matlaridan yeysizlar. Yurtingizda bexatar yashaysizlar.

²⁰Sizlar: — Ekin ekib hosil olmasak yettinchi yili nima yeymiz? — deb soʻrashingiz mumkin.

²¹Men oltinchi yili hosilingizga baraka beraman. Oʻsha yili sizlar uch yilga yetadigan hosil yigʻib olasizlar.

²²Sakkizinchi yili urugʻ ekkaningizda oltinchi yil davomida yiqqan hosildan tanovul qilasizlar. Toʻqqizinchi yili ham hosilingiz pishguncha hanuz eski hosildan yeysizlar.

²³Yerni faqat vaqtinchaga soting, chunki yer Menikidir. Sizlar esa Mening yerimda yashab yurgan musofir va kelgindisizlar.

²⁴Oʻz yerini sotgan odamga yerini qayta sotib olish imkoniyatini yaratib bering.

²⁵Agar yurtdoshingiz qashshoqlashib meros qilib olgan yerining bir qismini sotsa, uning eng yaqin qarindoshi sotilgan yerni qaytarib sotib olsin.

²⁶Agar yerni qaytarib sotib oladigan qarindoshi boʻlmasa va u odamning oʻzi keyinchalik mol — dunyo topib, yetarli mablagʻ yigʻsa, u oʻz yerini qaytarib sotib olishi mumkin.

²⁷Buning uchun u Qutlugʻ yilgacha qolgan yillar davomida yerdan olinadigan daromadni hisoblab chiqib, xaridorga toʻlasin, shundan keyin oʻz mulkini qaytarib olsin.

²⁸Bordi — yu, yerni qaytarib sotib olishga qurbi yetmasa, yer xaridorning ixtiyorida Qutlugʻ yilgacha qolsin. Qutlugʻ yil yer asl egasiga qaytib berilsin.

²⁹Bordi — yu, birortasi devor bilan oʻralgan shahar ichidagi uyini sotsa, sotilgan kundan boshlab bir yil oʻtguncha uyini qaytarib sotib olishi mumkin. Uyni qaytarib sotib olish muddati bir yildir.

³⁰Bir yil oʻtguncha u uyini qaytarib sotib olmasa, devor bilan oʻralgan shahar ichidagi bu uy xaridorning mulkiga aylanib, abadiy uning va naslining ixtiyorida qoladi. Qutlugʻ yilda ham uy uning ixtiyoridan chiqmaydi.

³¹Atrofi devor bilan oʻralmagan qishloqlardagi uylar dala sifatida hisoblansin. Bunday uylarni har qanday vaqtda qaytarib sotib olish mumkin, Qutlugʻ yilda ular asl egasiga qaytarib berilsin.

³²Levilarning shaharlariga kelsak, levilar oʻz shaharlaridagi uylarini qaytarib sotib olish huquqiga doimo ega boʻlishsin.

³³Bordi — yu, levi bunday shahardagi sotilgan uyini qaytarib sotib olmasa, bu uy unga Qutlugʻ yil qaytarib berilsin. Zotan, levilarga qarashli shaharlardagi uylari levilarning Isroil xalqi orasidagi mulkidir.

³⁴Lekin ularning shaharlari atrofidagi yerlar zinhor sotilmasin, chunki bu yerlar levilarning abadiy mulkidir.

³⁵Agar biror yurtdoshingiz nochor ahvolga tushib, sizga qarab qolsa, unga yordam bering. U orangizda gʻarib yoki musofirday yashasin.

³⁶Undan foydalanib pul ishlamang, foyda ham olmang, Men, Xudoyingizdan qoʻrqing. Bunday yurtdoshingizning orangizda yashashiga yoʻl qoʻying.

³⁷Bergan qarzingizdan foiz talab qilmang, ovqatni oʻz narxidan qimmatga sotmang.

³⁸Men Egangiz Xudoman. Men Xudoyingiz boʻlishim uchun va sizlarga Kan’on yurtini berish uchun sizlarni Misrdan olib chiqqanman.

³⁹Agar yurtdoshingizdan birortasi oʻta qashshoqlashib, oʻzini sizga sotsa, uni qulday ishlatmang.

⁴⁰Unga mardikor yoki musofirday muomala qiling. U Qutlugʻ yilgacha siznikida xizmat qilsin.

⁴¹Qutlugʻ yil u bolalari bilan ozod boʻlsin. Ular oʻz xonadoniga, ota — bobolarining mulkiga qaytib borishsin.

⁴²Binobarin ular Mening qullarimdir, Men ularni Misr yurtidan olib chiqqanman. Ularni qulday sotmanglar.

⁴³Ularga zulm oʻtkazmanglar, Men, Xudoyingizdan qoʻrqinglar.

⁴⁴Agar qulu choʻrilarga muhtoj boʻlsangiz, ularni atrofingizdagi xalqlardan sotib olishingiz mumkin.

⁴⁵Orangizda yashayotgan musofirlardan va ularning Isroil yurtida tugʻilgan bolalaridan ham qulu choʻrilar sotib olishingiz mumkin. Ular sizning mulkingiz boʻladi.

⁴⁶Ularni oʻzingizdan keyin bolalaringizga meros qilib berishingiz mumkin. Ularga qullarga muomala qilganday muomala qiling. Lekin Isroil xalqidan boʻlgan birodarlaringizga zulm qilmang.

⁴⁷Agar orangizda yashayotgan musofir boylik orttirsa — yu, Isroil xalqidan boʻlgan birodaringiz esa qashshoqlashib oʻzini musofirga yoki musofirning qavmidan boʻlganlarga sotsa,

⁴⁸birodaringiz ozod boʻlish huquqiga ega boʻlsin. Uning aka — ukasi ozodlik evaziga haqini toʻlab, uni ozod qilsin.

⁴⁹Shuningdek, amakisi, amakivachchasi yoki boshqa bir qarindoshi ozodlik haqini toʻlab, uni ozod qilishi mumkin. Sotilgan odamning oʻzi ham davlat orttirsa, oʻzini oʻzi ozod qila oladi.

⁵⁰Buning uchun u xaridori bilan kelishib, oʻzini sotgan yildan boshlab Qutlugʻ yilgacha qolgan yillarning sonini hisoblab chiqsin. Ozodligining bahosi oʻsha yillar davomida mardikorga toʻlanadigan ish haqi asosida belgilansin.

⁵¹Agar Qutlugʻ yilgacha hali koʻp yillar bor boʻlsa, ozodlik bahosi xaridor toʻlagan narxga asoslangan boʻlsin.

⁵²Bordi — yu, Qutlugʻ yilgacha oz qolgan boʻlsa, qolgan yillarni hisoblab, shunga yarasha ozodligining narxini toʻlasin.

⁵³Musofir sotib olgan birodaringizga bir yilga yollagan ishchiga muomalada boʻlganday muomala qilsin. Isroil xalqidan boʻlgan birodaringizga zulm oʻtkazishiga yoʻl qoʻymang.

⁵⁴Agar sotilgan birodaringiz ozodlik haqini toʻlab ozod boʻlmasa, u Qutlugʻ yil bola — chaqalari bilan ozod qilinsin.

⁵⁵Zotan, Isroil xalqi Mening qullarimdir, ularni Misr yurtidan Men olib chiqqanman. Men Egangiz Xudoman.