Read Uzbek Muqaddas Kitob Yeremiyo 1 Bible Online

Yeremiyo 1 - Uzbek Muqaddas Kitob bible

Yeremiyo 1

¹Ushbu kitobda Xilqiyo oʻgʻli Yeremiyoning soʻzlari bayon etilgan. Yeremiyo Benyamin hududidagi Onotoʻt shahrida[1] yashagan ruhoniylardan biri edi.

²Omon oʻgʻli Yoʻshiyo Yahudoda[2] hukmronlik qilgan davrning oʻn uchinchi yilida[3], Egamizning soʻzi ilk bor Yeremiyoga ayon boʻlgan edi.

³Shundan soʻng Yahudo shohi Yoʻshiyo oʻgʻli Yohayiqim davridan[4] tortib, to Yahudo shohi Yoʻshiyo oʻgʻli Zidqiyo hukmronligining oʻn birinchi yiligacha[5], Egamiz Yeremiyoga Oʻz soʻzini bir necha marta ayon qilgan edi. Zidqiyo hukmronligining oʻn birinchi yili beshinchi oyida[6] Quddus aholisi Bobilga surgun qilindi.

⁴Egamiz menga Oʻz soʻzini ayon qildi:

⁵“Onang qornida senga shakl bermasimdan oldin seni bilgan edim, Tugʻilmasingdan oldin seni Oʻzim uchun ajratib olgan edim. Xalqlarga seni paygʻambar etib tayinlagan edim.”

⁶Men Unga shunday javob qaytardim: — Yo Egam Rabbiy! Men tuzukroq ham gapira olmayman. Hali juda yoshman.

⁷Egamiz esa menga shunday dedi: — Oʻzingni, yoshman, deb aytma! Men seni kimning oldiga yuborsam, oʻshalarning oldiga borasan. Senga amr qilgan hamma gaplarimni ularga aytasan.

⁸Sen ulardan qoʻrqma. Men sen bilan birga boʻlaman, seni xalos qilaman. Buni Men, Egang, aytdim.

⁹Soʻng Egamiz qoʻlini uzatib, labimga tekkizdi — yu, dedi: — Mana, soʻzlarimni ogʻzingga solib qoʻydim.

¹⁰Bugundan boshlab xalqlar va shohliklarni qoʻporib, yoʻq qilishing uchun, vayron qilib, agʻdarishing uchun, bunyod etib, mustahkamlashing uchun senga izn berdim.

¹¹Egamiz menga Oʻz soʻzini ayon qilib, shunday dedi: — Ey Yeremiyo, nimani koʻryapsan? — Bodom shoxini, — deb javob berdim men.

¹²— Toʻgʻri koʻrding, — dedi Egamiz. — Bodom shoxi Mening hushyor turishimni bildiradi[7]. Aytgan soʻzlarimni[8] Men tez orada bajo keltiraman.

¹³Egamiz menga Oʻz soʻzini yana ayon qilib dedi: — Nimani koʻryapsan? — Shimol tomonda qaynab turgan bir qozonni. Qozon biz tomonga agʻdarilay — agʻdarilay deb turibdi, — dedim.

¹⁴Egamiz menga shunday dedi: — Bu yurtning butun aholisi ustiga shimol tomondan falokat yogʻiladi.

¹⁵Egamiz shunday demoqda: “Men shimoldagi shohliklarning barcha xalqlarini[9] chaqirib olyapman. Ularning shohlari kelib, oʻz taxtlarini Quddus darvozalarining yoniga oʻrnatadilar. Quddus devorlarini qurshab oladilar, Yahudo shaharlarining hammasiga hujum qiladilar.

¹⁶Shu yoʻsin Men xalqimga qarshi hukmimni e’lon qilaman, chunki Oʻz xalqim Meni tark etib, qabihlik qildi. Ular begona xudolarga qurbonliklar keltirib, oʻz qoʻllarining ijodiga sajda qildilar.

¹⁷Sen endi boʻla qol, belingni bogʻla. Buyurganlarimning hammasini ularga borib ayt. Ulardan qoʻrqma. Aks holda, ularning oldida seni vahimaga solaman.

¹⁸Bugun Men seni bir qal’aday, temir ustunday va bronza devorday mustahkam qildim. Sen butun yurtga — Yahudo shohlariga, shahzodalariga, ruhoniylariga, yurt aholisiga qarshi chiqasan.

¹⁹Ular senga hujum qilishadi, lekin seni yenga olishmaydi. Men sen bilan birga boʻlaman, seni xalos qilaman.” Egamizning kalomi shudir.