Read Uzbek Muqaddas Kitob Yeremiyo 10 Bible Online

Yeremiyo 10 - Uzbek Muqaddas Kitob bible

Yeremiyo 10

¹Ey Isroil xalqi, Egamiz sizlarga aytayotgan soʻzlarga quloq soling.

²Egamiz shunday demoqda: “Boshqa xalqlarga taqlid qilmanglar, Boshqa xalqlar singari, Osmondagi alomatlardan qoʻrqmanglar.

³Xalqlarning udumlari behuda! Ular oʻrmondan daraxt kesadi, Hunarmand boltasi bilan unga shakl berib,

⁴Kumushu oltin bilan bezatadi. Yiqilib ketmasin deya, mix bilan mahkamlaydi,

⁵Butlari polizdagi qoʻriqchilarga oʻxshaydi. Ular gapira olmaydi. Ularni koʻtarib yurish kerak boʻladi, Oʻzlari yura olmaydi. Ulardan qoʻrqmanglar, Ularning qoʻlidan hech qanday yomonlik kelmaydi, Yaxshilik ham qila olmaydi.”

⁶Ey Egamiz, Senga oʻxshashi yoʻq! Sen buyukdirsan, Sening noming ulugʻ va qudratlidir.

⁷Ey ellarning Shohi, Sendan qoʻrqmaydigan biror zot bormi?! Sen bunga loyiqdirsan. Xalqlarning donishmandlari orasida, Ularning shohlari orasida Senga oʻxshashi yoʻq.

⁸Donishmandlariyu shohlari[71] ahmoq va befarosat. Ular betayin yogʻoch butlaridan maslahat olishadi.

⁹Butlarini yasash uchun kumushni Tarshishdan, Oltinni Ufazdan keltirishadi. Butlarni hunarmandu zargarlar yasagan. Koʻk va safsar liboslar bilan bezagan, Hammasi — mohir ustalarning ishidir.

¹⁰Ammo Egamiz haq Xudodir. U barhayot Xudo va abadiy Shohdir. Gʻazablanganda yer silkinadi, Uning qahriga xalqlar dosh bera olmaydi.

¹¹Egamiz shunday dedi: “Boshqa xalqlarga ayt: «Bu xudolar yeru osmonni yaratmagan. Ular yer yuzidan va osmon ostidan yoʻq boʻlib ketadi.»”[72]

¹²Egamiz qudrati ila yerni yaratdi, Donoligi ila dunyoni bunyod etdi, Idroki ila osmon gumbazini oʻrnatdi.

¹³Uning ovozidan osmondagi suvlar gulduraydi, U dunyoning toʻrt burchidan bulutlarni olib keladi. Yomgʻir yogʻdirganda chaqmoq chaqtiradi, Omborlaridagi shamollardan estiradi.

¹⁴Uning oldida hamma odamlar ahmoq va nodondir. Zargarlar yasagan butlari tufayli sharmanda boʻlishadi. Yasagan sanamlari soxtadir, ularning joni yoʻq.

¹⁵Bu betayin butlar aldamchidir. Ularni jazolaganim zahoti yoʻq boʻlishadi.

¹⁶Yoqubning Xudosi esa unday emas. Butun borliqni U yaratgan, Isroil qabilasini Oʻziga mulk qilgan. Uning nomi Sarvari Olamdir.

¹⁷Ey qurshovda yashayotganlar! Bor — budingizni yigʻishtirib oling.

¹⁸Zero, Egamiz shunday demoqda: “Men sizlarni Isroil yurtidan uloqtirib tashlayman, Boshingizga kulfat yogʻdiraman, Toki sizlar buni sezinglar.”

¹⁹Shoʻrim qursin! Shunchalik azoblarga qoldim! Ogʻir yaralangan ekanman. Ammo oʻzimga oʻzim: “Boshimda shu dard bor ekan, Unga chidashim kerak”, dedim.

²⁰Chodirim yiqitilgan, iplari uzib tashlangan. Farzandlarim ketdi, ular yoʻq boʻldi. Endi chodirimni kim tikadi?! Chodirimning pardalarini kim osadi?!

²¹Axir, choʻponlar ahmoq, Ular Egamizdan maslahat olmadilar. Shuning uchun ham ishlari oʻngidan kelmadi, Qoʻylari har yoqqa tarqalib ketdi.

²²Eshitinglar! Bir xabar kelmoqda! Ana, shimoldan[73] shovqin — suron koʻtarilmoqda! Lashkarlar Yahudo shaharlarini xarob qilar emish, Chiyaboʻrilar yashaydigan makonga aylantirar emish.

²³Ey Egam, bilaman, Odam zoti oʻz taqdirini oʻzi belgilay olmaydi, Oʻz qadami oʻzining ixtiyorida emas.

²⁴Ey Egam, meni jahl ustida jazolamagin. Adolating ila haq yoʻlga solgin, Aks holda, meni yoʻq qilib yuborasan.

²⁵Seni tan olmaydigan xalqlar ustiga qahringni soch, Senga sajda qilmaydigan ellar ustiga soch, Axir, ular Yoqub naslining boshini yedilar. Hammasini halok etib, yoʻq qildilar, Yurtini xarobazorga aylantirdilar.