Read Uzbek Muqaddas Kitob Yeremiyo 12 Bible Online

Yeremiyo 12 - Uzbek Muqaddas Kitob bible

Yeremiyo 12

¹Sen bilan da’volashganimda, ey Egam, Sen har doim haq boʻlib chiqasan. Shunday boʻlsa — da, Sen bilan yana gaplashmoqchiman, Adolat xususida savol bermoqchiman. Nechun fosiqlarning ishi yurishadi? Nechun munofiqlar rohatda yashaydi?

²Ularni Sen ekib undirding, Ular oʻsib hosilga kirdilar. Noming ularning ogʻzidan tushmaydi, Ammo dillari Sendan uzoqdir.

³Lekin Sen, ey Egam, meni bilasan. Sen meni sinagansan, Dilim Senga moyil ekanini Oʻzing koʻrding. Endi yovlarimni boʻgʻizlanadigan qoʻylarday sudragin! Boʻgʻizlashga tayyorlash uchun ajratib qoʻygin!

⁴Evoh, qachongacha yer qaqrab yotadi? Qachongacha dalalardagi hamma oʻtlar quriydi? Bu yerda yashaydigan fosiqlarning dastidan, Qushlaru hayvonlar nobud boʻldi. Bu odamlar: “Bizga nima boʻlishini Yeremiyo qayerdan ham bilardi?!”[77] deb aytishadi.

⁵Egamiz menga dedi: “Ey Yeremiyo, Sen odamlar bilan poyga qilib holdan toygan boʻlsang, Qanday qilib otlar bilan poyga qila olasan?! Faqat osoyishta yurtda oʻzingni bexatar sezsang, Iordan boʻyidagi chakalakzorda[78] nima qilasan?!

⁶Hatto qarindoshlaring ham sendan yuz oʻgirdi, Oʻz oilang senga xiyonat qildi. Ovozi boricha senga doʻq urdi. Ular senga shirin gapirishsa ham, Ularning soʻzlariga ishonma.”

⁷Egamiz shunday deb aytdi: “Men xonadonimni tark etdim, Mulk qilib olgan xalqimni rad etdim. Sevgan xalqimni dushmanlarining qoʻliga berdim.

⁸Oʻz xalqim Menga Oʻrmondagi sherday boʻlib qoldi. U Menga qarab boʻkirdi, Shuning uchun undan nafratlandim.

⁹Oʻz xalqim Menga Olachipor kalxatday boʻlib qoldi. Boshqa kalxatlar xalqimni oʻrab oldi! Boring, barcha yovvoyi hayvonlarni yigʻing, Xalqimni gʻajib tashlashsin.

¹⁰Toʻda — toʻda choʻponlar uzumzorimni xarob qildilar, Dalamni ular payhon qildilar. Ha, goʻzal dalamni tashlandiq choʻlga aylantirdilar.

¹¹Ular yerimni xarob qildilar, Tashlandiq yerim koʻz oldimda qaqrab yotibdi. Butun yurtim vayron boʻldi, Ammo bu bilan hech kimning ishi yoʻq.

¹²Bosqinchilar sahrodagi Hamma yalang qirlarni egallab oldilar. Endi Mening qilichim butun yurtni vayron qiladi, U boshidan bu boshigacha hammani qirib tashlaydi. Bexatar yashayotgan bironta odam qolmaydi.

¹³Mening xalqim bugʻdoy ekdi, Ammo tikan oʻrib oldi, Zoʻr berib ishladi, Ammo hech narsaga erishmadi. Qattiq qahrim ularning hosilini nobud qildi. Ular hosilsiz qolib, sharmanda boʻlishdi.”

¹⁴Egamiz shunday demoqda: “Men xalqimga Isroil yurtini mulk qilib bergan edim, ammo uning yovuz qoʻshnilari xalqimga hujum qilib, yurtimni talon — taroj qildilar. Men bu yovuz xalqlarni oʻz yurtlaridan sugʻurib tashlayman. Yahudo xalqini ularning iskanjasidan sugʻurib olaman.

¹⁵Oʻsha yovuz xalqlarni sugʻurib tashlaganimdan keyin, ularga yana rahm — shafqat qilaman. Hammasini oʻz yurtlariga, oʻz mulklariga qaytarib olib kelaman.

¹⁶Ilgari bu xalqlar Isroil xalqiga Baal nomi bilan qasam ichishni oʻrgatgan edilar. Agar endi ular xalqim Isroilning yoʻlini astoydil oʻrgansalar, «Egamiz shohid» deya Mening nomim bilan qasam ichsalar, xalqim orasida oʻrnashib oladilar.

¹⁷Bordi — yu, bironta xalq Menga itoat etmasa, oʻsha xalqni tag — tomiri bilan qoʻporib tashlayman.” Egamizning kalomi shudir.