Read Uzbek Muqaddas Kitob Yeremiyo 14 Bible Online

Yeremiyo 14 - Uzbek Muqaddas Kitob bible

Yeremiyo 14

¹Yeremiyoga Egamizning qurgʻoqchilik haqidagi soʻzi ayon boʻldi:

²“Yahudo aza tutmoqda, Shaharlari adoyi tamom boʻldi. Odamlar qaygʻuga botgan, Bagʻirlarini yerga berib yotibdi, Quddusdan faryod koʻtarilmoqda.

³Asilzodalar xizmatkorlarini suvga yubordilar. Xizmatkorlar sardobalarga borgan edilar, Ammo suv topa olmadilar. Idishlari boʻm — boʻsh qaytib keldilar. Ular tushkunlikka tushdilar, Sharmanda boʻlib qoldilar, Uyatdan yuzlarini berkitib oldilar.

⁴Yomgʻir yogʻmagani uchun yer yorilib ketdi, Dehqonlar umidsizlikka tushdi, Yuzlarini berkitib olishdi.

⁵Hatto choʻldagi ona ohu ham, Oʻt — oʻlan boʻlmagani uchun, Yangi tugʻilgan ohuchalarini tashlab ketmoqda.

⁶Qulonlar yalang qirlarda turib, Chiyaboʻrilar kabi hansirayapti, Oʻt yoʻqligidan qulonlarning koʻzlari kirtayib qolgan.”

⁷Gunohlarimiz bizga qarshi guvohlik bersa — da, Oʻz noming haqi — hurmati bizga rahm qil, ey Egam. Axir, biz Senga koʻp xiyonat qildik, Senga qarshi gunoh ishlar qildik.

⁸Ey Isroilning yolgʻiz umidi, Kulfat vaqtida Qutqaruvchisi! Nechun yurtimizda musofirga oʻxshaysan? Bir kechagina tunaydigan sayyohga oʻxshaysan?

⁹Nega sarosimaga tushgan odamga oʻxshaysan? Nega yordam bera olmaydigan jangchiga oʻxshaysan? Ey Egam, Sen bizning oramizdasan — ku! Biz Senikimiz. Bizni tark etma!

¹⁰Egamiz bu xalq haqida shunday demoqda: “Ular oʻzlarini sira tiya olmaydilar, Daydib yurishni haqiqatan yaxshi koʻradilar. Shuning uchun Men ulardan rozi emasman, Endi qabihliklarini yodga olaman, Gunohlari uchun ularni jazolayman.”

¹¹Soʻng Egam menga tayinlab dedi: — Bu xalq uchun ibodat qilma.

¹²Ular roʻza tutishsa ham, Men ularning iltijolariga quloq solmayman. Menga atab qurbonliklar kuydirishsa ham, don nazrlarini olib kelishsa ham qabul qilmayman. Aksincha, ularni qahatchilik, urush va oʻlat orqali qirib tashlayman.

¹³Men esa shunday dedim: — Yo Egam Rabbiy, paygʻambarlar bu xalqqa, urush va qahatchilik boʻlmaydi, sizlar bu yurtda chinakamiga osoyishta hayot kechirasizlar, deb aytishmoqda — ku.

¹⁴Egamiz menga shunday javob berdi: “Paygʻambarlar Mening nomimdan yolgʻon gapirishmoqda. Men ularni yubormaganman, ularga gapirishni buyurmaganman. Ular sizlarga uydirmalarni oʻzlaricha bashorat qilishyapti, behuda fol ochib, xayollariga kelgan yolgʻonlarni gapirishyapti.

¹⁵Oʻsha paygʻambarlar Mening nomimdan gapirishsa ham, ularni Men joʻnatmaganman. Ular: «Yurtda urush va qahatchilik boʻlmaydi», deb aytayotgan ekanlar, ammo Men aytamanki, oʻsha paygʻambarlar urush va qahatchilikdan nobud boʻlishadi.

¹⁶Ularning gaplarini tinglayotgan odamlar ham urush va qahatchilikdan oʻladi. Jasadlari Quddus koʻchalarida qolib ketadi. Ularning, xotinlarining, oʻgʻil — qizlarining jasadlarini koʻmadigan odam boʻlmaydi. Qilgan qabihliklarini Men oʻzlarining boshlariga solaman.

¹⁷Sen ularga shunday deb ayt: «Kechayu kunduz koʻzlarimdan yosh oqyapti, Oʻzimni toʻxtata olmayapman. Zero, bokira qizim — Mening xalqim, Qattiq zarba yedi, ogʻir yaralandi.

¹⁸Dalaga chiqaman, Evoh, ana, qilichdan halok boʻlganlar yotibdi. Shaharga kiraman, Ana, ocharchilikdan oʻlganlar yotibdi. Paygʻambaru ruhoniylar esa pul dardida Odamlarga bema’ni maslahatlar berib yuribdilar[85].»”

¹⁹Ey Egamiz, nahotki Yahudoni butunlay rad etgan boʻlsang?! Nahotki Quddusdan[86] hazar qilsang?! Nechun bizni ogʻir yaralading? Shifo topa olmayapmiz — ku! Biz tinchlikni izladik, ammo yaxshilik kelmadi, Shifo topmoqchi edik, ammo vahimaga duchor boʻldik.

²⁰Ey Egamiz, Senga qarshi gunoh qildik! Qabihliklarimizga iqror boʻldik, Ha, ota — bobolarimizning ayblarini tan olamiz.

²¹Noming haqi — hurmati bizni rad etma, Ulugʻvor taxting turgan joyni xor qilma. Biz bilan tuzgan ahdingni yodingda tut, Oʻtinamiz, ahdingni buzma.

²²Xalqlarning betayin butlari yomgʻir yogʻdira olarmidi?! Yogʻingarchilik osmonning xohishi bilan boʻlarmidi?! Bularni qilishga qodir Sen emasmi, ey Egamiz Xudo?! Biz umidimizni Senga bogʻlaganmiz, Zotan, bularning hammasini qila oladigan Sensan.