Read Uzbek Muqaddas Kitob Yeremiyo 18 Bible Online

Yeremiyo 18 - Uzbek Muqaddas Kitob bible

Yeremiyo 18

¹Egamiz Yeremiyoga shu soʻzini ayon qildi:

²“Qani boʻl, kulolning uyiga bor. Oʻsha yerda senga bir gap aytaman.”

³Men kulolning uyiga bordim. Kulol charx urib, ishlayotgan edi.

⁴U loydan yasayotgan idish buzildi, shundan keyin u oʻzi xohlagan shakldagi boshqa bir idishni yasadi.

⁵Egamiz Oʻz soʻzini menga ayon qilib dedi:

⁶“Ey Isroil xalqi, nahotki bu kulol qilgan ishni Men sizlarga qila olmasam?! Sizlar Mening qoʻlimda kulol qoʻlidagi loyga oʻxshaysizlar.

⁷Men biron xalqni yoki shohlikni qoʻporib tashlashimni, yoʻq qilib vayron qilishimni e’lon etishim mumkin.

⁸Ammo oʻsha xalq yovuz qilmishlaridan qaytsa, Men ham ularning boshlariga falokat keltirish niyatimdan qaytaman.

⁹Shunday paytlar ham boʻladiki, Men biron xalq yoki shohlikka: «Sizlarni qayta bunyod etib, mustahkam qilaman», deb aytaman.

¹⁰Ammo oʻsha xalq Mening oldimda qabihlik qilsa yoki aytganlarimga quloq solmasa, Men niyatimdan qaytaman, ularga qilmoqchi boʻlgan yaxshiligimni qilmayman.

¹¹Shunday ekan, Yahudo xalqi bilan Quddus aholisiga ayt: «Egamiz shunday demoqda: mana, Men boshingizga soladigan kulfatni tayyorlayapman, sizlarga qarshi rejalar tuzyapman. Boʻldi endi, har biringiz yomon yoʻlingizdan qaytinglar. Turmush tarzingizni oʻzgartiringlar. Eski qilmishlaringizdan voz kechinglar.»

¹²Ammo ular: «Gapirganing befoyda!» deyishadi. «Biz baribir xohlaganimizday yashaymiz, yovuz yuraklarimizning oʻjarliklariga itoat qilaveramiz», deb aytishadi.”

¹³Shuning uchun Egamiz demoqda: “Xalqlardan soʻrab — surishtiring — chi, Bunaqasini hech eshitganmikan?! Bokira qiz Isroil jirkanch bir ish qildi.

¹⁴Lubnondagi qorlar hech eriganmi?! Azim choʻqqilarni hech tark etganmi?! Uning muzdek suvlari hech ado boʻlganmi?!

¹⁵Mening xalqim esa Meni tark etdi, Ular behuda butlarga tutatqi tutatdilar. Butlari tufayli xalqim qoqildi, Azaliy yoʻlidan adashdi. Toʻgʻri yoʻlni tark etib, soʻqmoqlardan yurib ketdi.

¹⁶Shu sababdan yurti huvullab qoladi, Yurtning ahvolidan odamlar qotib qoladi, Oʻtgan — ketganlar dahshatga tushadi, «Yo tavba» deb, yoqasini ushlashadi.

¹⁷Sharqdan esgan shamol kabi, Men ularni dushmanlari oldida sochib tashlayman. Boshlariga kulfat tushgan kuni Ularga orqa oʻgiraman, Ularga nazar solmayman.”

¹⁸Soʻng odamlar shunday dedilar: “Qani, Yeremiyoga qarshi fitna uyushtiraylik. Axir, qonunni oʻrgatadigan ruhoniylar, maslahat beradigan donishmandlar va Xudoning soʻzini aytadigan paygʻambarlar har doim bor. Yeremiyoga tuhmat qilaylik, uning gaplariga umuman e’tibor bermaydigan boʻlaylik.”

¹⁹Ey Egam, meni tingla, Raqiblarim gaplarini eshit!

²⁰Nahotki yaxshilikka yomonlik qaytarishsa?! Esingdami, huzuringda turib, Ular uchun Senga yolvorgandim, Ulardan Sening qahringni qaytargandim. Ular esa menga chuqur qazidilar.

²¹Shunday ekan, bolalarini ochlikdan oʻldir, Hammasini qilich izmiga topshir. Xotinlari bolalaridan judo boʻlsin, Hammasi beva boʻlib qolsin. Erkaklari oʻlatdan qirilib ketsin, Yigitlari jangda halok boʻlsin.

²²Toʻsatdan ustiga bosqinchi yuborganingda, Uylaridan dod — faryodlar koʻtarilsin! Axir, ular meni tutib olmoqchi boʻlib, chuqur qazidilar, Oyogʻimni sirtmoqqa ilintirmoqchi boʻldilar.

²³Meni oʻldirish uchun fitna qildilar, Buni Sen bilasan, ey Egam. Ularning gunohlarini kechirma, Jinoyatlaridan oʻtma. Gʻazablanib, jazolarini bergin, Ular Sening oldingda yiqilib qolsinlar.