Read Uzbek Muqaddas Kitob Yeremiyo 19 Bible Online

Yeremiyo 19 - Uzbek Muqaddas Kitob bible

Yeremiyo 19

¹Egamiz menga shunday dedi: “Borib kuloldan bir sopol koʻza sotib ol. Soʻng yoningga xalq oqsoqollaridan va bosh ruhoniylardan olib,

²Singan koʻzalar darvozasi yaqinidagi Xinnum soyligiga[95] tush. Men senga aytadigan soʻzlarni oqsoqollarga sen oʻsha yerda aytasan.

³Sen ularga shunday deb ayt: «Ey Yahudo shohlari, Quddus aholisi, Egamizning soʻzlarini eshitinglar. Isroil xalqining Xudosi — Sarvari Olam shunday demoqda: Men bu joyga shunday falokat yogʻdiramanki, bu falokatni eshitganlarning boshidan hushi uchadi.

⁴Zotan, xalqim Meni tark etdi, bu yerni harom qildi. Ular oʻzlari bilmagan, ota — bobolari ham, Yahudo shohlari ham bilmagan begona xudolarga qurbonliklar kuydirdilar. Bu yerni begunoh odamlarning qoniga toʻldirdilar.

⁵Baalga atab sajdagohlar[96] qurdilar. U yerda oʻz oʻgʻil — qizlarini Baalga qurbonlik qilib kuydirdilar. Men ularga buni amr qilmaganman, bunaqasini xayolimga ham keltirmaganman.

⁶Qarab turinglar! — deb aytmoqda Egamiz. — Shunday kunlar keladiki, odamlar bu joyni Tofat yoki Xinnum soyligi deb atamaydi, balki bu joy ‘Qirgʻin vodiysi’ deb ataladigan boʻladi.

⁷Mana shu joyda Men Yahudo va Quddusning rejalarini barbod qilaman[97]. Xalqimni dushmanlarga magʻlub qilib beraman, ularda qasdi borlarning qoʻliga topshiraman. Jasadlarini qushlarga, yovvoyi hayvonlarga yem qilaman.

⁸Men bu shaharni shunday vayron qilamanki, uning oldidan oʻtgan — ketgan har bir kishi shaharning ayanchli ahvolidan dahshatga tushib, qotib qoladi.

⁹Dushmanlar shaharni qamal qilib, odamlarni qirib tashlamoqchi boʻladilar. Qamal paytida azobda qolgan xalq oʻgʻil — qizlarining va bir — birining etini yeydigan boʻladi.»

¹⁰Ey Yeremiyo, oʻzing bilan kelganlarning oldida koʻzani sindir.

¹¹Ularga shunday deb ayt: «Sarvari Olam shunday demoqda: mana bu koʻza chilparchin boʻlib, tuzatib boʻlmaydigan ahvolga tushgani kabi, Men bu xalqni va bu shaharni chilparchin qilaman. Oʻliklar Tofatda dafn qilinadi, oʻliklar koʻpligidan qabrlarga joy yetmay qoladi.

¹²Men bu shaharni va uning aholisini shunday ahvolga solamanki, bu shahar Tofatga oʻxshagan boʻlib qoladi, — deb aytmoqda Egamiz. —

¹³Quddusdagi xonadonlar va Yahudo shohlarining saroylari, Tofat kabi, harom boʻladi. Chunki u yerlardagi hamma uylarning tomlarida samoviy jismlarga atab qurbonliklar kuydirilgan, begona xudolarga sharob nazrlari keltirilgan.»”

¹⁴Yeremiyo Egamizning amri bilan Tofatda bashorat qildi, soʻng u yerdan qaytib kelgach, Egamizning uyi hovlisida turib xalqqa dedi:

¹⁵“Isroil xalqining Xudosi — Sarvari Olam shunday demoqda: endi Men aytgan soʻzimga binoan bu shahar va uning atrofidagi qishloqlarga falokat keltiraman, chunki sizlar oʻjarlik qilib, soʻzlarimni eshitishni xohlamadingizlar.”