Read Uzbek Muqaddas Kitob Yeremiyo 2 Bible Online

Yeremiyo 2 - Uzbek Muqaddas Kitob bible

Yeremiyo 2

¹Egamiz menga Oʻz soʻzini ayon qildi:

²“Quddusga borib, jar sol: «Egamiz shunday deb aytmoqda: Yoshligingdagi vafodorliging yodimda, Kelinchakligingdagi sevging esimda. Sen sahroda Menga ergashgan eding, Ekin ekilmagan yerda orqamdan yurar eding.

³Ey Isroil, sen Menga bagʻishlangan eding, Oʻrimimning ilk hosiliga oʻxshagan eding. Oʻsha hosilni yegan har kim aybdor hisoblanardi, Bundaylarning boshiga kulfat kelar edi, — deb aytmoqda Egamiz.»”

⁴Ey Yoqub nasli, jamiki Isroil[10] urugʻlari, Egamizning soʻzlarini eshitinglar.

⁵Egamiz shunday demoqda: “Ota — bobolaringiz Mendan nima ayb topdilar? Nima uchun Mendan uzoqlashdilar? Ular betayin butlarga sigʻindilar, Oʻzlari ham betayin boʻlib qoldilar.

⁶Ular Menga intilmaydilar. Men esa ularni Misrdan olib chiqqan edim, Choʻldan, chuqurliklarga toʻla sahrodan olib oʻtgandim, Zulmat qamragan qaqroq yerda olib yurgan edim. Odam yashamagan, oyoq yetmagan joydan olib oʻtgan edim.

⁷Men sizlarni hosildor yurtga olib kelgandim, Mevalaridan, moʻl hosilidan yenglar, degan edim. Ammo sizlar kelib, yurtimni harom qildingizlar, Mulkim boʻlgan yerimni jirkanch bir joyga aylantirdingizlar.

⁸Ruhoniylar Menga intilmadilar, Qonun himoyachilari Meni bilmadilar, Hukmdorlar Menga qarshi bosh koʻtardilar, Paygʻambarlar Baal[11] nomidan bashorat qildilar, Hech narsaga yaramaydigan butlarga koʻngil bogʻladilar.”

⁹Egamiz shunday demoqda: “Men sizlarni yana bir bor ayblayman, Nabiralaringizni ham ayblayman.

¹⁰Gʻarbdagi Kipr[12] qirgʻoqlariga borib koʻringlar, Sharqdagi Kedarga[13] odam joʻnatib, bilib kelinglar. Bunday voqea hech yuz berganmikan?!

¹¹Biron xalq oʻz xudolaridan voz kechganmikan?! Xudolari haqiqiy boʻlmasa — da, ulardan yuz oʻgirganmikan?! Mening xalqim esa oʻz ulugʻvor Xudosidan voz kechdi, Qadrsiz butlarga Meni almashtirdi.

¹²Ey osmon, bundan hayratlangin, Vahima ichra titragin, — deb aytmoqda Egamiz. —

¹³Mening xalqim ikki gunoh qildi: Ular Meni — hayotbaxsh suv bulogʻini tark etdilar. Oʻzlari uchun sardobalar qazidilar, Suvni ushlab turolmaydigan yoriq sardobalar qurdilar.

¹⁴Isroil qulmidi?! Yoki qullikda tugʻilganmidi?! Nechun unda u gʻanimlariga oʻlja boʻldi?

¹⁵Gʻanimlari unga sherday oʻkirdi, Ovozi boricha unga boʻkirdi. Oʻshalar dastidan Isroil yurti xarob boʻldi, Shaharlari vayron boʻlib, huvullab qoldi.

¹⁶Ey Isroil, Nuf va Taxpanxasdagi[14] xalqlar Sochingni qirib tashladilar[15].

¹⁷Senga yoʻl koʻrsatgan Egang Xudoni tark etding, Shu qilmishing bilan oʻz boshingni oʻzing yeding.

¹⁸Endi nega Misrga borasan? Nil[16] suvidan ichish uchunmi?! Nechun Ossuriyaga[17] yoʻl olasan? Furot suvidan ichish uchunmi?![18]

¹⁹Qabihliging oʻzingning boshingga yetadi, Xiyonating seni mahkum qiladi. Egang Xudoni tark etganing Naqadar yomon va alamli ekanini Koʻrib, bilib qoʻygin. Sen Mendan qoʻrqmas ekansan”, demoqda Sarvari Olam — Rabbiy.

²⁰Egamiz shunday demoqda: “Ey Isroil, sen ancha oldin Boʻyinturugʻingni sindirgan eding, Koʻp vaqt oldin kishanlaringni uzgan eding. «Senga xizmat qilmayman!» deb aytgan eding. Har bir baland tepalikda butlarga sajda qilding, Har bir yashil daraxt ostida fohishaday yotding[19].

²¹Men seni a’lo tokday ekkan edim, Sen eng sara urugʻdan paydo boʻlgan eding. Nechun endi aynib qolding? Nega yovvoyi tokka aylanib qolding?

²²Sen oʻzingni ishqor bilan ishqalasang ham, Koʻp sovun ishlatib, oʻzingni yuvsang ham, Aybdorlik dogʻlaring ketmaydi, Bular doim koʻz oʻngimda turadi, — deb aytmoqda Egamiz Rabbiy. —

²³Shunday ekan, qanday qilib: «Bulgʻanmadim», deb aytasan?! Nega «Baalga sigʻinmadim», deysan?! Vodiyda qilgan ishlaringga[20] qara, Qilgan qilmishlaring haqida oʻylab koʻr, Sen hirsi qoʻzigan urgʻochi tuyaga oʻxshaysan, Oʻzingni u yoqdan — bu yoqqa urasan.

²⁴Sahroda ulgʻaygan bir qulonga oʻxshaysan, Shahvating qoʻziganda, havoni iskaysan. Sening hirsingni kim qondira oladi?! Hech bir erkak senga erishish uchun oʻzini urintirishi shart emas, Juftlashish davrida seni osonlikcha topib olishadi.

²⁵Ey Isroil, boshqa xudolarning ketidan yuguravermagin, Chorigʻing yirtilguncha, tomogʻing quriguncha Ular ketidan yuravermagin. Lekin sen shunday deding: «Gapirganing befoyda, Axir, men oʻsha xudolarni sevib qoldim, Ularning ketidan bormasam boʻlmaydi.»

²⁶Qoʻlga tushgan oʻgʻri sharmanda boʻlganday, Isroil xalqi ham sharmanda boʻladi. Ularning oʻzlari, shohlari, a’yonlari uyatga qoladi, Ruhoniylaru paygʻambarlari sharmanda boʻladi.

²⁷Ular yogʻochga: «Mening otam sensan» deyishadi, Toshga[21]: «Tuqqan onam sensan», deb aytishadi. Ammo Menga yuz burmay, orqa oʻgirishadi, Boshlariga kulfat kelganda esa, «Bizga najot ber!» deya Menga yolvorishadi.

²⁸Xoʻsh, oʻzlaringiz uchun yasagan xudolaringiz qani? Kulfat chogʻida sizlarni qutqara olsa, kelsin. Shaharlaringiz qancha koʻp boʻlsa, Xudolaringiz ham shunchadir, ey Yahudo xalqi.

²⁹Nechun Men bilan da’volashasiz?! Hammangiz Menga qarshi bosh koʻtardingiz! — deb aytmoqda Egamiz. —

³⁰Ey xalqim, seni jazolaganim zoye ketibdi. Sen baribir gapimga kirmading. Sening qiliching yirtqich arslonday Paygʻambarlaringni qirib tashladi.

³¹Ey bu nasl, Mening gaplarimga quloq sol! Nahotki Men Isroil uchun sahroday boʻlgan boʻlsam?! Nahotki zulmat qoplagan qorongʻi yerday boʻlgan boʻlsam?! Nechun xalqim: «Endi ozodmiz, oldingga qaytib bormaymiz», deb aytadi?

³²Qiz bola taqinchoqlarini unutadimi?! Kelinchak oʻz libosini esdan chiqaradimi?! Yoʻq! Ammo xalqim Meni unutdi, Oradan son — sanoqsiz kunlar oʻtib ketdi.

³³Oshiqlarni topishga naqadar ustasan! Eng buzuq ayol ham sendan oʻrgansa boʻladi.

³⁴Sen kiyimlaringni dogʻ qilding, Aybsiz qashshoqlarning qoniga ularni belading, Ular uyingga oʻgʻri boʻlib tushmagan edi. Shunga qaramay sen:

³⁵«Aybsizman», deb aytasan. «Egamiz gʻazabidan tushgani aniq», deysan. «Gunoh qilmadim» deganing uchun Men seni jazolayman.

³⁶Nega sen yengiltaklik qilasan? Nega ittifoqchilaringni oʻzgartirasan? Sen Ossuriyadan yordam olmaganingday, Misrdan ham hech qanday yordam olmaysan.

³⁷Sen Misrdan chiqib kelasan, Uyalganingdan yuzingni qoʻling bilan toʻsasan. Zero, sen umid bogʻlagan xalqni Egang rad etdi. Sen ulardan hech qanday naf koʻrmaysan.”