Read Uzbek Muqaddas Kitob Yeremiyo 21 Bible Online

Yeremiyo 21 - Uzbek Muqaddas Kitob bible

Yeremiyo 21

¹Shoh Zidqiyo[101] Yeremiyo paygʻambarning oldiga Malkiyo oʻgʻli Peshxur va Masiyo oʻgʻli ruhoniy Zafaniyoni yubordi. Shunda Egamiz Oʻz soʻzini Yeremiyoga ayon qildi. Peshxur bilan Zafaniyo Yeremiyoga shunday dedilar:

²“Oʻtinamiz, biz uchun Egamizga yolvor, chunki Bobil shohi Navuxadnazar[102] bizga hujum qilyapti. Balki Egamiz avvalgidek moʻjizalar koʻrsatib, Navuxadnazarni orqaga chekintirar.”

³Yeremiyo ularga shunday javob berdi:

⁴“Borib, Zidqiyoga Isroil xalqining Xudosi — Egamizning shu soʻzlarini aytinglar: «Sizlar qoʻlingizga qurol olib, sizlarni qamal qilgan Bobil shohiga va Bobilliklarga[103] qarshi jang qilyapsizlar. Ammo qoʻlingizdagi qurollaringizni Men Bobilliklarga emas, balki oʻzlaringizga qarshi ishlataman. Mana shu shahar — Quddus markazida qurollaringizni uyib tashlayman.

⁵Men Oʻzim sizlarga qarshi chiqaman. Oʻz qudratu ajoyibotlarim bilan, qahru gʻazabim bilan sizlarga qarshi jang qilaman.

⁶Bu shahar aholisini yoʻq qilaman. Odamlaru hayvonlar oʻlatdan nobud boʻladilar.

⁷Shundan keyin Men Yahudo shohi Zidqiyoni, uning a’yonlarini, shaharda urushdan, qahatchilikdan va oʻlatdan omon qolgan hamma odamlarni Bobil shohi Navuxadnazarning qoʻliga beraman, — deb aytmoqda Egamiz. — Ularda qasdi borlarga topshiraman, dushman qoʻliga beraman. Dushmanlar shahar aholisini shafqatsizlarcha qirib tashlaydilar. Bironta odamni ham ayamaydilar, ularga achinmaydilar, rahm qilmaydilar.»

⁸Sizlar bu xalqqa borib aytinglar: «Egamiz demoqda: Men sizlarga ikki yoʻlni — hayot va oʻlim yoʻlini berdim.

⁹Shaharda qolganlar qilich, qahatchilik va oʻlatdan nobud boʻladilar. Shahardan chiqib, Bobilliklarga taslim boʻlganlar esa tirik qoladilar. Bu odamlar hech boʻlmasa oʻz jonlarini saqlab qoladilar.

¹⁰Men bu shaharga yaxshilik emas, kulfat keltirishga qaror qildim, — deb aytmoqda Egamiz. — Bu shaharni Bobil shohiga taslim qilib beraman. Navuxadnazar shaharga oʻt qoʻyadi.»

¹¹Yahudo shohining xonadoniga ham borib shunday aytinglar: «Egamizning soʻzini eshit,

¹²ey Dovud sulolasi! Egamiz shunday demoqda: Har kuni ertalabdan adolat qilinglar, Jabrdiydalarni zoʻravonlar qoʻlidan qutqaringlar. Aks holda, qilgan yovuzliklaringiz tufayli Mening gʻazabim alanga oladi, Bu gʻazabimni soʻndirishga hech kimning qurbi yetmaydi.

¹³Ey vodiydagi qoya ustida qurilgan Quddus, Men senga qarshiman! — deb aytmoqda Egamiz. — Sizlar aytasiz: ‘Kim ham bizga qarshi chiqa olardi?! Kim ham qoʻrgʻonlarimizga kira olardi?!’

¹⁴Men qilmishingizga yarasha jazoingizni beraman, — deb aytmoqda Egamiz. — Shohning saroyiga[104] oʻt qoʻyaman, Olov atrofdagi hamma narsani yondiradi.»”