Read Uzbek Muqaddas Kitob Yeremiyo 22 Bible Online

Yeremiyo 22 - Uzbek Muqaddas Kitob bible

Yeremiyo 22

¹Egamiz menga shunday dedi: “Yahudo shohi saroyiga borib, u yerda ushbu soʻzlarni jar solib ayt:

²«Ey Dovud taxtida oʻtirgan Yahudo shohi, eshit. A’yonlaring va mana bu saroyga kirgan odamlaring ham sen bilan birga Egamizning soʻzini eshitsin.»

³Keyin ularga ayt, Egamiz shunday demoqda: «Adolat va toʻgʻrilik bilan ish tuting. Jabrdiydalarni zoʻravonlarning qoʻlidan qutqaring. Musofirlarga, yetim va bevalarga nohaqlik qilmang, ularni ezmang. Bu yerda begunoh odamning qonini toʻkmang.

⁴Bordi — yu, sizlar haqiqatan ham bularga rioya qilsangizlar, Quddus taxtida doim Dovud naslidan boʻlgan shoh oʻtiradi. Jang aravalariyu otlar mingan shohlar saroy darvozalaridan kirishadi. A’yonlar va xalq ham ular bilan birga kiradi.

⁵Bordi — yu, bu amrlarimga rioya qilmasangizlar, Men Oʻz nomim haqi ont ichib[105] aytamanki, bu saroy vayron boʻladi.» Egamizning kalomi shudir.

⁶Axir, Egamiz Yahudo shohining saroyi haqida shunday demoqda: «Sen Men uchun goʻzal Gilad oʻlkasiga[106] oʻxshaysan, Bamisoli Lubnonning yuksak choʻqqilarisan. Lekin qasam ichib aytamanki, sen sahroga oʻxshab qolasan, Huvullagan bir shaharga aylanib qolasan.

⁷Senga qarshi bosqinchilarni joʻnataman, Qurollangan odamlarni yuboraman. Ular sara sadrlaringni kesadilar, Yogʻochlaringni olovga tashlaydilar.»

⁸Koʻplab xalqlar bu shahar oldidan oʻtayotib, bir — birlaridan: «Nega Egamiz bunday buyuk shaharni shu koʻyga solgan ekan — a?» deb soʻraydilar.

⁹Ularga shunday javob berishadi: «Shahar aholisi oʻzlarining Egasi Xudo bilan tuzgan ahdini buzdi. Boshqa xudolarga sajda qilib, xizmat qiladigan boʻldi.»”

¹⁰Oʻlgan shohingiz[107] uchun yigʻlamang, U uchun aza tutmang. Undan koʻra, surgun boʻlgan shahzodangiz[108] uchun qaygʻuring, U uchun achchiq — achchiq koʻz yosh toʻking. Axir, u endi qaytib kelmaydi, Ona yurtini boshqa koʻrmaydi.

¹¹Shoh Yoʻshiyodan keyin Yahudo taxtiga Yoʻshiyoning oʻgʻli Yohuxoz[109] oʻtirgan edi. Shoh Yohuxoz surgun qilingandan keyin, Egamiz u haqda shunday dedi: “U bu yerga hech qachon qaytib kelmaydi.

¹²Surgun qilingan yerda olamdan oʻtadi, bu yurtni boshqa koʻrmaydi.”

¹³Egamiz shunday deydi: “Uyini nohaqlik bilan qurganning[110] holiga voy! Yuqori xonalarini adolatsizlik bilan bino qilganning holiga voy! Bunday odam birodarini tekinga ishlatadi, Uning mehnat haqini bermaydi.

¹⁴U shunday deydi: «Mana, oʻzim uchun katta saroy qurdim, Yuqori qavatdagi xonalarni keng qildirdim.» U uyiga katta oynalar qoʻydirmoqda, Devorlarini sadr yogʻochi bilan qoplamoqda, Ularni qirmizi rangga boʻyamoqda.

¹⁵Sen oʻzing uchun koʻp sadr yogʻochini yigʻding, Bu bilan sen yaxshi shoh boʻlib qolmading! Sening otang ham xohlaganicha yeb — ichgan, Ammo doim haqiqatu adolatni oʻrnatgan. Shu sababdan uning ishi yurishgan.

¹⁶U faqiru bechorani himoya qilgan, Shuning uchun farovon hayot kechirgan. Xudoni bilish degani shu emasmi?! — deb aytmoqda Egamiz. —

¹⁷Sen esa faqat nohaq foydani koʻzlaysan. Begunoh odamning qonini toʻkasan, Zoʻravonlik va zulm oʻtkazasan.”

¹⁸Shu sababdan Yahudo shohi Yoʻshiyo oʻgʻli Yohayiqim haqida Egamiz shunday demoqda: “Unga hech kim aza tutmaydi, «Voy, jigarim! Voy, jigarim!» deb yigʻlamaydi. «Xoʻjayinim! Olampanohim!» deb hech kim qaygʻurmaydi.

¹⁹Uni oʻlgan eshakning ahvoliga soladilar, Quddus darvozalaridan sudrab chiqib, otib yuboradilar.”

²⁰Egamiz shunday deydi: “Ey Quddus, Lubnonga chiqib faryod qilgin, Bashan oʻlkasiga borib, xitob etgin. Aborim togʻlarida[111] turib, ovozing boricha baqirgin, Chunki hamma oʻynashlaring[112] yoʻq boʻldi.

²¹Farogʻatda yashaganingda, senga gapirdim, Sen esa «Gapingga quloq solmayman!» deb aytding. Ha, yoshligingdan shu yoʻlni tutgansan, Gapimga sen kirmagansan.

²²Shamol hamma choʻponlaringni supurib ketadi, Oʻynashlaring surgun boʻladi. Sen esa qabih ishlaring tufayli uyatda qolasan, Sharmandayi sharmisor boʻlasan.

²³Sen «Lubnon» saroyida[113] yashab yuribsan, Sadr daraxtlari orasida in qurgansan, Ammo tugʻayotgan ayol kabi dard chekasan, Azobdan ingraysan.”

²⁴Yohayiqim oʻgʻli Yohayixin[114] haqida Egamiz shunday demoqda: “Ey Yahudo shohi Yohayixin! Bordi — yu, sen Mening oʻng qoʻlimdagi muhr uzugim boʻlganingda edi, Men barhayot Xudo boʻlganim haqi ont ichib aytamanki, seni uloqtirib tashlagan boʻlar edim.

²⁵Sen kimdan qoʻrqsang, seni oʻshaning qoʻliga beraman, senda qasdi borlarning qoʻliga topshiraman. Seni shoh Navuxadnazarning[115] va Bobilliklarning[116] qoʻliga beraman.

²⁶Seni va seni tuqqan onangni[117] begona bir yurtga, kindik qoning toʻkilmagan bir yerga uloqtirib yuboraman. Sizlar oʻsha yerda oʻlasizlar.

²⁷Sizlar bu yurtga qaytib kelishni orzu qilasizlar, ammo qaytib kelmaysizlar.”

²⁸Yohayixin tashlab yuboriladigan siniq xumday boʻlib qoladi, Hech kimga kerak boʻlmaydigan sopol idishga oʻxshab qoladi. U bolalari bilan surgun boʻladi! Oʻzi bilmagan yurtga uloqtirib tashlanadi!

²⁹Ey yurt, yurt, yurt! Egamizning soʻzini eshit!

³⁰Egamiz shunday demoqda: “Bu odamning farzandlarini nasabnomaga kiritmang, Uni hayotda omadi yoʻq, deb qayd qilib qoʻying. Uning zurriyotidan birortasi muvaffaqiyat qozonmas, Birortasi Dovud taxtiga chiqa olmas. Yahudoda ular hech qachon hukmronlik qilmaydilar.”