Read Uzbek Muqaddas Kitob Yeremiyo 23 Bible Online

Yeremiyo 23 - Uzbek Muqaddas Kitob bible

Yeremiyo 23

¹Egamiz shunday demoqda: “Choʻponlar yaylovimdagi qoʻylarni tarqatib yuboryaptilar, ularni yoʻq qilyaptilar. Bunday choʻponlarning holiga voy!

²Ey xalqimni boqqan choʻponlar, sizlar qoʻylarimni oʻz holiga tashlab qoʻydingizlar. Ularni tarqatib, uzoqlarga qochirib yubordingizlar. Bu yovuz qilmishlaringiz uchun Men sizlarni oʻz holingizga qoʻymay jazolayman, — deb aytmoqda Isroil xalqining Xudosi — Egamiz. —

³Men qoʻylarimni har xil yurtlarga haydab yuborgan edim. Endi Oʻzim ularni yigʻib olaman, oʻzlarining yayloviga olib kelaman. Ular barakali boʻlib, koʻpayadilar.

⁴Men ular ustidan boshqa choʻponlarni tayinlayman. Choʻponlar qoʻylarimni boqadilar. Shunda qoʻylarim hech narsadan qoʻrqmaydi, sarosimaga tushmaydi. Ularning birontasi ham yoʻqolmaydi.” Egamizning kalomi shudir.

⁵Egamiz demoqda: “Shunday kunlar keladiki, Men Dovud naslidan solih bir novdani yetishtiraman. Bu Shoh donolik bilan hukmronlik qiladi. Adolat va toʻgʻrilik bilan ish tutadi.

⁶Uning hukmronligi davrida Yahudo xalqi bexatar yashaydi, Isroil xalqi osoyishta hayot kechiradi. Oʻsha Shohni «Egamiz — najotkorimiz» deb atashadi.”

⁷Egamiz demoqda: “Shunday kunlar keladiki, odamlar ont ichganda: «Isroil xalqini Misrdan olib chiqqan Egamiz shohid», deb aytmaydigan boʻladi.

⁸Buning oʻrniga ular: «Isroil naslini shimoldagi yurtdan[118] va surgun qilingan boshqa barcha yurtlardan olib chiqqan Egamiz shohid», deb ont ichadigan boʻladi. Ular oʻz yurtlarida yashashadi.”

⁹Paygʻambarlar haqida oʻylab, Yurak — bagʻrim ezilib ketdi, Vujudim titrab ketmoqda. Egamiz tufayli, Uning aytgan muqaddas soʻzi tufayli Men mast odamga oʻxshab qoldim, Sharobga boʻkkan kishiday boʻlib qoldim.

¹⁰Evoh, yurt zinokorlarga toʻlib ketdi, La’nat[119] tufayli yer qaqrab qoldi, Dashtdagi yaylovlar qurib yotibdi. Paygʻambarlar qabihlik qilishga shoshiladi, Kuchini haqsizlik yoʻlida ishlatishadi.

¹¹Egamiz shunday demoqda: “Paygʻambaru ruhoniylar betavfiqdirlar, Hatto Mening uyimda ham qabihlik qilganlarini koʻrdim.

¹²Shu sababdan yurgan yoʻllari sirpanchiq boʻladi, Ular zulmatga gʻarq boʻlishadi. Hammasi yiqilib qoladi. Jazo oladigan yili Boshlariga kulfat keltiraman, — deb aytmoqda Egamiz. —

¹³Samariya paygʻambarlari orasida Jirkanch bir ishni koʻrdim: Ular Baal nomidan bashorat qilishdi, Xalqimni yoʻldan ozdirishdi.

¹⁴Ammo Quddus paygʻambarlari orasida Bundan ham battarrogʻini koʻrdim: Ular zino qilib, yolgʻon ichida yashashadi, Yovuzlarning ishini qoʻllab turishadi, Shuning uchun hech kim yomon yoʻlidan qaytmayapti. Nazarimda ularning hammasi Sadoʻm odamlariday boʻlib qolgan, Quddus aholisi Gʻamoʻra[120] aholisiga oʻxshab qolgan.”

¹⁵Sarvari Olam paygʻambarlar haqida shunday demoqda: “Men ularga achchiq oʻtdan yediraman, Zaharli suvdan[121] ichiraman, Zero, Quddus paygʻambarlari dastidan Yurtimda betavfiqlar koʻpayib ketdi.”

¹⁶Sarvari Olam shunday demoqda: “Sizlarga bashorat qilayotgan paygʻambarlarning gaplariga quloq solmanglar. Ular qoʻyningizni puch yongʻoqqa toʻldiryapti. Ular Mening ogʻzimdan chiqqan soʻzlarni emas, oʻz dil orzularini aytishyapti.

¹⁷Mening soʻzimdan nafratlangan odamlarga ular hadeb: «Hammasi yaxshi boʻladi», deyishadi. Yuragidagi oʻjarliklarga itoat qilganlarga: «Boshingizga balo — qazo kelmaydi», deyishadi.”

¹⁸Xoʻsh, Egamizning kengashida[122] ulardan qaysi biri qatnashibdi?! Xudoning soʻzini qaysi biri eshitibdi?! Qaysi biri e’tibor bilan Uni tinglabdi?!

¹⁹Ana, boʻron koʻtarildi! Bu Egamizning gʻazabidir. Uning gʻazabi quyun girdobi boʻlib, Fosiqlarning boshiga tushdi.

²⁰Egamiz koʻnglidagi niyatini bajarmaguncha, Uni oxiriga yetkazmaguncha, Gʻazabidan tushmaydi. Keyinchalik buni anglab olasizlar.

²¹Egamiz shunday dedi: “Bu paygʻambarlarni Men yubormadim, Ular oʻzlari yugurib bordilar. Ularga Men gapirmadim, Ular esa bashorat qildilar.

²²Agar oʻsha paygʻambarlar kengashimda boʻlganlarida edi, Soʻzlarimni xalqimga yetkazgan boʻlardilar. Xalqimni yomon yoʻldan, Yovuz qilmishlardan qaytargan boʻlardilar.”

²³Egamiz shunday demoqda: “Men hamma yoqdaman — yaqinda ham, uzoqda ham oʻsha Xudoman.

²⁴Kim Mendan yashirina oladi?! Yeru koʻkni toʻldirib turgan Men emasmi?! — deb aytmoqda Egamiz. —

²⁵Mening nomimdan yolgʻon bashorat qilgan paygʻambarlarning: «Men bir tush koʻrdim! Xudo menga bir tush berdi!» deganlarini eshitdim.

²⁶Qachongacha bu davom etadi?! Ular yuraklaridagi hiylayu nayranglarini, yolgʻon bashoratlarini bas qilishadimi, yoʻqmi?!

²⁷Ularning ota — bobolari Meni unutib, Baalga sajda qilgan edilar. Shu singari, bu soxta paygʻambarlar «Xalq Egamizni unutsin», deya bir — birlariga tushlarini aytishadi.

²⁸Mayli, tush koʻrgan paygʻambar tushini aytsin, soʻzimni eshitgan esa uni sadoqat bilan e’lon qilsin. Axir, somon bilan bugʻdoyning farqi bor — ku! — deb aytmoqda Egamiz. —

²⁹Mening soʻzim olovday kuydiradi. Qoyani yoradigan bolgʻaday zarba beradi.” Egamizning kalomi shudir.

³⁰Egamiz shunday demoqda: “Bu paygʻambarlar «Egamizning soʻzi» deb bir — biridan gap oʻgʻirlaydi. Men ularga qarshiman.

³¹Ha, Men oʻsha paygʻambarlarga qarshiman, — deb aytmoqda Egamiz. — Ular oʻzlaricha valdirab yuradilar, yana «bu Egamizning soʻzlari», deb aytadilar.

³²Uydirma tushlarini aytgan paygʻambarlarga qarshiman! Ular yolgʻonlariyu telbaligi bilan xalqimni yoʻldan ozdirishmoqda. Ularni Men tayinlamaganman, xalqimning oldiga Men yubormaganman. Xalqimga ularning zarracha ham foydasi yoʻq.” Egamizning kalomi shudir.

³³Egamiz menga dedi: “Ey Yeremiyo, agar xalqimdan boʻlgan birorta odam, paygʻambar yoki ruhoniy sendan: «Bu safar Egamiz bizga nima yuklamoqchi?[123]» deb soʻrasa, sen shunday deb javob ber: «Sizlar oʻzlaringiz Egamizga yuk boʻldingizlar[124]. Endi U sizlarni uloqtirib tashlaydi.»

³⁴Bordi — yu, biron odam, paygʻambar yoki ruhoniy: «Egamizning soʻzi bizga yuk boʻldi», deb aytadigan boʻlsa, Men unday odamni butun xonadoni bilan jazolayman.

³⁵Sizlar bir — biringizdan: «Egamiz nima deb javob berdi?» yoki «Egamiz nima deb aytdi?» deb soʻranglar.

³⁶Ammo: «Egamiz bizga nima yuklamoqchi?» deb boshqa soʻramanglar. Zero, odamlar bu iborani ishlatib, oʻz soʻzlarini ishonarli qilmoqchi boʻladilar, barhayot Xudo, Sarvari Olam — Xudoyingizning soʻzlarini buzib aytadilar.

³⁷Sizlar esa paygʻambarning oldiga borganingizda, undan: «Egamiz sizga nima deb javob berdi?» yoki «Egamiz sizga nima dedi?» deb soʻranglar.

³⁸Bordi — yu, sizlar gapimga kirmay: «Egamiz bizga nima yuklamoqchi?» deb yana soʻrasangizlar,

³⁹Men sizlarni yuk koʻtarganday koʻtarib[125], Oʻz huzurimdan uloqtirib tashlayman. Ota — bobolaringizga Oʻzim bergan shaharni ham shu koʻyga solaman.

⁴⁰Abadiy isnod va sharmandalikka duchor qilaman. Bunday sharmandalikni unutib boʻlmaydi.”