Read Uzbek Muqaddas Kitob Yeremiyo 25 Bible Online

Yeremiyo 25 - Uzbek Muqaddas Kitob bible

Yeremiyo 25

¹Yahudo shohi Yoʻshiyo oʻgʻli Yohayiqim hukmronligining toʻrtinchi yilida[130] Yeremiyoga Yahudo xalqi toʻgʻrisida Egamizning soʻzi ayon boʻldi. Bobil taxtiga xuddi oʻsha yili Navuxadnazar oʻtirgan edi.

²Yeremiyo paygʻambar Yahudo xalqi va Quddus aholisiga shunday dedi:

³“Omon oʻgʻli Yoʻshiyo Yahudoda hukmronlik qilgan davrning oʻn uchinchi yilidan[131] tortib, to bugunga qadar Egamiz menga Oʻz soʻzini ayon qilib kelmoqda. Mana, yigirma uch yildirki, men sizlarga toʻxtovsiz gapiryapman, ammo sizlar gaplarimga quloq solmayapsizlar.

⁴Egamiz oldingizga paygʻambar qullarini birin — ketin yuborgan boʻlsa ham, sizlar ularning gaplarini eshitmadingiz, ularga quloq solmadingiz.

⁵Ular sizlarga aytishgan edi: «Qabih ishlaringizni bas qilinglar. Yomon yoʻldan qaytinglar. Shunda Egamiz sizlarga va ota — bobolaringizga abadiy mulk qilib bergan yurtda qolasizlar.

⁶Boshqa xudolarga ergashmanglar. Ularga xizmat qilmanglar, sajda etmanglar. Yasagan butlaringiz bilan Egamizni gʻazablantirmanglar. Shunda Egamiz boshingizga falokat keltirmaydi.»

⁷«Ammo sizlar gapimga quloq solmadingizlar, — deb aytmoqda Egamiz. — Butlaringiz bilan Meni gʻazablantirib, oʻz boshingizga falokat keltirdingizlar.»

⁸Shu sababdan Sarvari Olam demoqda: «Sizlar gapimga kirmaganingiz uchun,

⁹Men shimoldagi barcha qabilalarni yigʻaman. Bobil shohi qulim Navuxadnazarni ham chaqiraman, — deb aytmoqda Egamiz. — Ularni sizlarga qarshi, bu yurt aholisi va yon — atrofingizdagi xalqlarga qarshi tortib kelaman. Men sizlarni tamomila qirib bitiraman. Sizlarni koʻrganlar dahshatga tushadi, ahvolingizni koʻrgan odamlar qotib qoladi. Men yurtingizni abadiy xarobazorga aylantiraman.

¹⁰Shunday qilamanki, orangizda shodu xurramlik sadolari boʻlmaydi, kelin — kuyovning ovozi eshitilmaydi, tegirmonning tovushi chiqmaydi. Chirogʻingiz yonmaydi.

¹¹Butun yurt vayron boʻlib, xarobazorga aylanadi. Bu xalqlar yetmish yil mobaynida Bobil shohiga xizmat qilishadi.»

¹²Egamiz shunday demoqda: «Yetmish yildan keyin esa Men Bobil shohini, uning xalqini va Bobilliklarning[132] butun yurtini qilgan gunohlari uchun jazolayman. Ularning yurti to abad huvullab qoladi.

¹³Oʻzim aytgan hamma kulfatlarni oʻsha yurtga yogʻdiraman. Bu kitobda yozilgan hamma falokatlarni keltiraman. Yeremiyoning hamma xalqlarga qarshi aytgan bashoratlarini amalga oshiraman.

¹⁴Bobilliklar koʻplab xalqlaru buyuk shohlarga qul boʻladilar. Qilgan qilmishlariga yarasha jazolarini oladilar.»”

¹⁵Isroil xalqining Xudosi — Egamiz menga shunday dedi: “Qoʻlimdagi kosani ol. Bu kosa gʻazabim sharobiga toʻla. Men seni qaysi xalqlar oldiga yuborsam, bu kosadagi sharobdan ularga ichir.

¹⁶Ular sharobdan ichadilar, gandiraklab qolib, aqldan ozadilar. Axir, Men ularga qarshi qilich yuboraman.”

¹⁷Men Egamizning qoʻlidagi kosani oldim. Egamiz meni qaysi xalqlar oldiga yuborgan boʻlsa, oʻsha xalqlarga sharobdan[133] ichirdim:

¹⁸Quddus, Yahudo yurtining shaharlari va u yerdagi shohu a’yonlar xonavayron boʻlsin deb, men ularga sharobdan ichirdim. Bugungacha ularning ahvolini koʻrib odamlar yoqasini ushlaydi, xalqimning nomini qargʻishlarga qoʻshib ishlatishadi.

¹⁹Soʻng men Misrga yoʻl oldim. Fir’avn, uning xizmatkorlari, a’yonlari, butun xalqi

²⁰va u yerda yashayotgan musofirlarga sharobdan ichirdim. Soʻng Uz nomli yurtning shohlariga, shuningdek, Ashqalon, Gʻazo, Exron va talafot koʻrgan Ashdodda[134] hukmronlik qilgan hamma Filist shohlariga sharobdan ichirdim.

²¹Soʻng men Edom, Moʻab, Ommonga,

²²Tir, Sidon va dengiz ortidagi yurtlarning shohlariga sharobdan ichirdim.

²³Dedon, Temo, Buz[135] va sochini oldirib yuradigan[136] boshqa hamma xalqlarga sharobdan ichirdim.

²⁴Hamma Arabiston shohlariga, sahroda yashaydigan har xil koʻchmanchi qabilalarning hamma shohlariga sharobdan ichirdim.

²⁵Zimri, Elam va Midiya yurtlarining hamma shohlariga sharobdan ichirdim.

²⁶Shimoldagi uzoq — yaqinda boʻlgan hamma shohlarga sharobdan ichirdim. Yer yuzidagi barcha saltanatlarga birin — ketin borib keldim. Oxiri kosadagi sharobdan Bobil[137] taxtida oʻtirgan shoh ichadigan boʻldi.

²⁷Egamiz menga dedi: “Ularga shunday deb ayt: «Isroil xalqining Xudosi — Sarvari Olam demoqda: gʻazab kosamdan ichinglar! Mast boʻlib qusinglar! Turmaydigan boʻlib yiqilinglar, chunki Men sizlarning ustingizga qilich yuboryapman.»

²⁸Bordi — yu, ular qoʻlingdagi kosani olishdan va sharob ichishdan voz kechsalar, sen ularga shunday deb ayt: «Sarvari Olam sizlarga demoqda: ichishingiz shart!

²⁹Mana, Oʻzimga tegishli Quddus shahriga kulfat yogʻdira boshladim. Sizlar jazodan qochib qutularmidingiz?! Yoʻq, jazodan qutula olmaysizlar! Men yer yuzidagi barcha odamlarni urush balosiga giriftor etaman, — deb aytmoqda Sarvari Olam.»

³⁰Shuning uchun, ey Yeremiyo, sen bu soʻzlarning hammasini ularga ayt: «Egamiz yuksakdan sherday oʻkiradi, Muqaddas makonidan sado beradi. Yurtiga shiddat bilan oʻkiradi. Uzum ezuvchilar kabi[138] baqiradi, Yer yuzidagi hamma insonlarga hayqiradi.

³¹Gumburlashi dunyoning chetigacha eshitiladi. Zero, Egamiz xalqlarga da’vo qilmoqda, Dunyodagi odamzodni U hukm etmoqda, Fosiqlarni qilichdan oʻtkazmoqda. Egamizning kalomi shudir.

³²Sarvari Olam shunday demoqda: Qaranglar, falokat kelmoqda, Xalqdan xalqqa yuqmoqda! Dunyoning toʻrt burchagidan Kuchli boʻron koʻtarilmoqda!

³³Oʻsha kuni butun yer yuzi, bu boshidan narigi chetigacha Egamizning qudratidan nobud boʻlgan odamlarning jasadlariga toʻladi. Marhumlar uchun hech kim marsiya aytmaydi, hech kim ularni yigʻib koʻmmaydi. Ular yer ustida goʻngday yotaveradi.

³⁴Ey choʻponlar, uvvos solib yigʻlanglar! Ey yoʻlboshchilar, kulga belaninglar![139] Boʻgʻizlanadigan kuningiz yetib keldi, Jasadlaringiz yerda sochilib yotadi, Chilparchin boʻlgan qimmatbaho koʻzaday boʻladi.

³⁵Choʻponlar hech qayerga qocha olmaydi, Yoʻlboshchilar qutulolmaydi.

³⁶Eshiting! Yoʻlboshchilar faryod qilmoqda, Choʻponlar hoʻngramoqda! Egamiz ularning yaylovlarini nobud qilyapti.

³⁷Soʻlim maysazorlarini payhon etyapti. Axir, Egamizning gʻazabi alanga oldi.

³⁸Oʻlja qidirib uyasidan chiqqan sherday, Egamiz Oʻz makonidan chiqdi. Egamizning alangali gʻazabi tufayli, Urush balosi tufayli Butun yurt xarobazorga aylanadi.»”