Read Uzbek Muqaddas Kitob Yeremiyo 26 Bible Online

Yeremiyo 26 - Uzbek Muqaddas Kitob bible

Yeremiyo 26

¹Yoʻshiyo oʻgʻli Yohayiqimning Yahudodagi ilk hukmronligi davrida[140] Yeremiyoga Egamiz Oʻz soʻzini ayon qildi.

²Egamiz shunday dedi: “Ey Yeremiyo, uyimning hovlisiga borib tur. Yahudo shaharlaridan uyimga sajda qilmoqchi boʻlib kelgan hamma odamlarga gapir. Men senga amr qilgan barcha soʻzlarni, birontasini ham qoldirmay ularga ayt.

³Balki, ular Men aytgan gaplarga quloq solib, yovuz yoʻllaridan qaytishar. Shunda Men ham shaxtimdan qaytaman. Qilgan qabihliklari tufayli boshlariga keltirmoqchi boʻlayotgan falokatni keltirmayman.

⁴Sen ularga shunday deb ayt: «Egamiz demoqda: sizlar Menga quloq solmadingizlar, bergan qonunlarimni bajarmadingizlar.

⁵Oldilaringizga qayta — qayta paygʻambar qullarimni joʻnatdim, ammo sizlar ularning gapiga kirmadingizlar. Agar endi aytganlarimni bajarmasangizlar,

⁶Men bu uyni Shiloʻning[141] koʻyiga solaman. Bu shaharni esa yer yuzidagi xalqlar orasida la’nati qilaman.»”

⁷Ruhoniylar, paygʻambarlar va butun xalq Yeremiyoning Egamiz uyida aytayotgan bu gaplarini eshitishdi.

⁸Yeremiyo Egamizning amr qilgan hamma soʻzlarini butun xalqqa aytib boʻlgach, ruhoniylar, paygʻambarlar va butun xalq unga tashlanib: — Oʻldiringlar uni! — deya baqira boshlashdi. —

⁹Sen hali Egamiz nomidan bashorat qiladigan boʻlib qoldingmi?! “Bu uy Shiloʻning koʻyiga tushadi, bu shahar esa vayron boʻlib huvullab qoladi”, deb aytishga qanday jur’at etding?! Egamiz uyidagi butun olomon Yeremiyoni oʻrab oldi.

¹⁰Bundan xabar topgan saroydagi Yahudo a’yonlari Egamizning uyiga keldilar. Qozilik qilish uchun Yangi darvozaning kiraverishidagi kursilarga oʻtirdilar[142].

¹¹Shunda ruhoniylar bilan paygʻambarlar yetib kelgan a’yonlarga va xaloyiqqa murojaat qilib dedilar: — Bu odam oʻlimga loyiq! U shahrimizga qarshi bashorat qildi, buni oʻz qulogʻingiz bilan eshitdingiz.

¹²Yeremiyo oʻz navbatida shunday dedi: — Sizlar eshitgan barcha soʻzlarni gapirishim uchun meni Egam yubordi. “Bu uyga va shaharga qarshi bashorat qil”, dedi.

¹³Agar sizlar yomon yoʻlingizdan qaytsangiz, turmush tarzingizni oʻzgartirsangiz, Egangiz Xudoga itoat etsangiz, Egamiz ham shaxtidan qaytadi, sizlarga e’lon qilgan falokatni boshingizga keltirmaydi.

¹⁴Mana, men sizning ixtiyoringizdaman. Nimani toʻgʻri deb bilsangiz, menga shuni qiling.

¹⁵Faqat bilib qoʻyinglar: agar meni oʻldirsangizlar, sizlar ham, shahar aholisi ham aybsiz odamning qonini toʻkkan boʻlasizlar. Zotan, bu soʻzlarning hammasini sizlarga aytishim uchun Egamizning Oʻzi meni yuborgan.

¹⁶Soʻng a’yonlar bilan butun xaloyiq ruhoniylarga va paygʻambarlarga shunday dedilar: — Yoʻq, bu odam oʻlimga loyiq emas. U bizga Egamiz Xudo nomidan gapiryapti — ku!

¹⁷Yurtning bir nechta oqsoqoli ham chiqib, toʻplangan butun olomonga shunday dedilar:

¹⁸— Yahudo shohi Hizqiyo davrida[143] bashorat qilib yurgan Moʻrashatlik Mixo ham Yahudo xalqiga shunday deb aytgan edi[144]: “Sarvari Olam demoqda: «Quddus daladay shudgor qilinadi, Sion xarobazor boʻladi, Egamizning uyi turgan togʻni[145] Qalin oʻrmonzor qoplaydi.»”

¹⁹Oʻshanda Yahudo shohi bilan butun xalq paygʻambarni oʻldirganmidi?! Aksincha, shoh Egamizdan qoʻrqib, Undan marhamat soʻragan edi. Egamiz esa shaxtidan qaytib, ularga e’lon qilgan falokatni boshlariga keltirmadi. Biz — chi? Biz oʻzimizning boshimizga oʻzimiz falokat keltiryapmiz — ku!

²⁰Egamizning nomidan bashorat qilgan yana bir odam bor edi. U Xirat — Yoʻrimlik Shamayo oʻgʻli Uriyo edi. U ham xuddi Yeremiyoga oʻxshab bu yurt va shaharga qarshi bashorat qilgan edi.

²¹Shoh Yohayiqim, uning hamma soqchilari va a’yonlari Uriyoning soʻzlarini eshitdilar. Shunda shoh Uriyoni oʻldirishga qasd qildi. Bundan xabardor boʻlgan Uriyo qoʻrqqanidan Misrga qochib ketdi.

²²Shoh Yohayiqim uning orqasidan Axbor oʻgʻli Elnatanni odamlari bilan joʻnatdi.

²³Ular Uriyoni Misrda tutib olib, shohning oldiga olib kelgan edilar. Shoh uni oʻldirib, jasadini avom xalqning qabristoniga tashlagan edi.

²⁴Shunga qaramay, Shofon oʻgʻli Oxixam Yeremiyoning tarafini oldi. Yeremiyoni oʻldirmoqchi boʻlgan olomonning qoʻliga topshirishga yoʻl qoʻymadi.