Read Uzbek Muqaddas Kitob Yeremiyo 28 Bible Online

Yeremiyo 28 - Uzbek Muqaddas Kitob bible

Yeremiyo 28

¹Ayni oʻsha yili, ya’ni Yahudo shohi Zidqiyo hukmronligining ilk davrida, toʻrtinchi yili beshinchi oyida[153] Xanoniyo paygʻambar Egamiz uyidagi ruhoniylar va xalq oldida menga gapirdi. Xanoniyo Givonlik Azzurning oʻgʻli edi. U menga shunday dedi:

²— Isroil xalqining Xudosi — Sarvari Olam demoqda: “Bobil shohi solgan boʻyinturuqni Men sindirib tashladim.

³Shoh Navuxadnazar[154] uyimdan Bobilga olib ketgan hamma ashyolarni Men ikki yil ichida bu yerga qaytarib olib kelaman.

⁴Bundan tashqari, Bobilga surgun boʻlgan Yahudo shohi Yohayiqim oʻgʻli Yohayixinni[155] va u bilan birga hamma asirlarni[156] qaytarib olib kelaman. Men Bobil boʻyinturugʻini sindirib tashlayman.” Egamizning kalomi shudir.

⁵Shunda men Egamiz uyida hozir boʻlgan ruhoniylar va xalq oldida Xanoniyoga

⁶shunday dedim: — Omin! Iloyim, aytganingizday boʻlsin. Bashorat qilgan soʻzlaringizni Egamizning Oʻzi bajo aylasin. Oʻz uyining ashyolariyu asirlarni Bobildan qaytarib, bu yerga olib kelsin.

⁷Endi esa men sizga va xalqqa aytmoqchi boʻlgan mana bu gaplarimni eshiting.

⁸Sizdan va mendan oldin oʻtgan paygʻambarlar koʻp yurtlaru buyuk shohliklarga qarshi urush, ocharchilik va oʻlatni bashorat qilgan edilar.

⁹Tinchlikni bashorat qilgan paygʻambarning bashorati bajo boʻlganidan keyingina[157], xalq uni “haqiqatan ham Egamizning elchisi” deb tan olar edi.

¹⁰Soʻng Xanoniyo paygʻambar Yeremiyoning gardanidagi boʻyinturuqni olib sindirdi — da,

¹¹toʻplanib turgan xaloyiqqa murojaat qilib dedi: — Egamiz aytmoqda: “Xuddi shunday qilib, Men ikki yil ichida Bobil shohi Navuxadnazarning xalqlarga solgan boʻyinturugʻini olib, sindirib tashlayman.” Bu gaplardan keyin Yeremiyo oʻz yoʻliga ketdi.

¹²Xanoniyo paygʻambar Yeremiyo paygʻambarning gardanidagi boʻyinturuqni sindirgandan keyin, koʻp oʻtmay Egamiz Yeremiyoga Oʻz soʻzini ayon qilib dedi:

¹³“Xanoniyoning oldiga borib, shunday deb ayt: «Egamiz aytmoqda: sen yogʻoch boʻyinturuqni sindirding, ammo oʻshaning oʻrniga Men temir boʻyinturuq yasayman.

¹⁴Zero, Isroil xalqining Xudosi — Sarvari Olam shunday demoqda: Men bu xalqlarning gardaniga temir boʻyinturuq solaman. Ularning hammasi Bobil shohi Navuxadnazarga xizmat qilishadi. Ha, ularning hammasi Navuxadnazarga bosh egadi. Men hatto yovvoyi hayvonlarni ham Navuxadnazarning ixtiyoriga topshiraman.»”

¹⁵Yeremiyo paygʻambar Xanoniyo paygʻambarga dedi: — Menga qara, Xanoniyo, Egamiz seni yubormagan. Sen esa bu xalqni yolgʻon gaplaringga ishontirib qoʻyding.

¹⁶Shu qilganing uchun Egamiz shunday demoqda: “Men seni yer yuzidan daf qilaman. Sen oʻz bashoratlaring bilan xalqni Egangga qarshi qoʻzgʻatganing uchun shu yiliyoq oʻlasan.”

¹⁷Oʻsha yilning yettinchi oyida[158] Xanoniyo olamdan oʻtdi.