Read Uzbek Muqaddas Kitob Yeremiyo 3 Bible Online

Yeremiyo 3 - Uzbek Muqaddas Kitob bible

Yeremiyo 3

¹Egamiz shunday demoqda: “Bir odam xotini bilan ajrashdi, deylik. Agar xotini borib, boshqasiga turmushga chiqsa, oldingi eri uni qayta nikohiga olishi mumkinmi?! Bunday bema’nigarchilik yurtni harom qilib yubormaydimi?![22] Ey Isroil, sen koʻp oʻynashlar orttirib fohishalik qilding. Endi qaysi yuz bilan oldimga qaytib kelmoqchisan?!

²Atrofingdagi yalang qirlarga nazar solib, qara! Sen fohishalik qilmagan biror joy qoldimi?![23] Sen yoʻl boʻylarida oʻtirib, oʻynashlaringni kutding. Choʻlda bosqinchilik qilishga shay turgan qaroqchiday boʻlding. Menga qilgan bevafoliging va fosiqliging bilan, Butun yurtni harom qilding.

³Shu sababdan yomgʻir yogʻmadi, Bahorda yogʻingarchilik boʻlmadi. Sen fohishaday bezbetsan, Uyat degan narsani bilmaysan.

⁴Endi esa Menga: «Otajonimsan», deyapsan, «Yoshligimdan buyon doʻstimsan», deb aytyapsan!

⁵«Hadeb mendan jahling chiqaveradimi?» deysan, «Bir umr menga gʻazabingni sochasanmi?» deb aytasan, Oʻzing esa imkoning boricha yovuzlik qilaverasan.”

⁶Shoh Yoʻshiyo davrida[24] Egamiz menga shunday dedi: “Bevafo Isroilning[25] qilmishlarini koʻrdingmi? Har bir baland tepalikda va har bir yashil daraxt ostida u fohishalik qildi[26].

⁷Barcha qilmishlaridan keyin ham, oldimga qaytib keladi, deb oʻylagan edim. Lekin u qaytib kelmadi. Shuning uchun Men sadoqatsiz Isroilga taloq xatini berib, joʻnatib yubordim[27]. Uning singlisi Yahudo esa buni koʻrgan edi. Shunga qaramay bu munofiq zarracha ham qoʻrqmadi, u Menga vafo qilmay, fahshga berildi.

⁹Isroil tosh va yogʻochdan yasalgan xudolarga sigʻinib, zino qilgan edi. Yengiltaklik bilan fohishalik qilib, yurtni harom etgan edi.

¹⁰Bularga qaramay, uning munofiq singlisi Yahudo Menga sof koʻngil bilan qaytmadi. U koʻzboʻyamachilik qildi”, — deb aytmoqda Egamiz.

¹¹Keyin Egamiz menga shunday dedi: “Bevafo Isroil, munofiq Yahudoga qaraganda, oʻzini solih qilib koʻrsatdi.

¹²Qani, shimolga bor, u yerda ushbu soʻzlarni jar solib ayt: «Egamiz shunday demoqda: ey bevafo Isroil, Menga yuz bur! Endi Men senga gʻazabimni sochmayman, Men rahmdilman, — deb aytmoqda Egamiz. — Sendan to abad gʻazablanmayman.

¹³Faqatgina gunohingni tan olgin: sen Egang Xudoga qarshi bosh koʻtarding, har bir yashil daraxt ostida begona xudolarga sajda etib, zino qilding, Mening gapimga kirmading, — deb aytmoqda Egamiz.»”

¹⁴Egamiz shunday demoqda: “Ey sadoqatsiz farzandlar, oldimga qaytinglar! Zero, Men xoʻjayiningizman. Har bir shahardan bittangizni, har bir xonadondan ikkitangizni olib, Quddusga[28] olib kelaman.

¹⁵Men sizlarga koʻnglimdagi choʻponlarni beraman. Ular sizlarni donolik va bilim bilan boshqarishadi.

¹⁶Sizlar yurtda koʻpayib, uvali — juvali boʻlasizlar. Shunda xalq Mening Ahd sandigʻim[29] haqida gapirmaydigan boʻladi. Ular Sandiq haqida oʻylashmaydi, uni esga ham olishmaydi, zarurati boʻlmagani uchun yangisini yasashmaydi[30].

¹⁷Zero, oʻsha vaqtda Quddus «Egamizning Taxti» deb ataladi. Hamma xalqlar Menga sajda qilish uchun Quddusda, Mening huzurimda toʻplanadilar. Shundan keyin ular hech qachon yovuz yuraklarining oʻjarliklariga itoat qilmaydilar.

¹⁸Oʻsha kunlarda Yahudo va Isroil xalqlari birlashadi. Ular shimoldagi yurtdan Men ota — bobolaringizga mulk qilib bergan yurtga birga qaytib kelishadi.

¹⁹Men, Egangiz, ichimda shunday degan edim: «Seni jon — jon deya Oʻzimga farzand qilib olgan boʻlar edim, Senga ajoyib yurtni sovgʻa qilgan boʻlar edim, Xalqlarning eng goʻzal mulkini senga bergan boʻlar edim.» Meni «Otajonim deysan», deya niyat qilgan edim, Mendan hech qachon yuz oʻgirmaysan, deb oʻylagan edim.

²⁰Ammo, ey Isroil, Menga bevafolik qilding! Sen eriga xiyonat qilgan ayolday boʻlding, — deb aytmoqda Egamiz. —

²¹Yap — yalang qirlar uzra figʻon eshitilmoqda, Isroil xalqi dodu faryod solmoqda. Zotan, ular haq yoʻldan ozgan edilar, Oʻzlarining Egasi Xudoni unutib yuborgan edilar.

²²Ey sadoqatsiz farzandlarim, orqaga qaytinglar! Bevafo qalbingizga Men shifo beraman. Sizlar Menga shunday deysizlar: «Mana, oldingga qaytyapmiz, Axir, Egamiz Xudo Sensan.

²³Biz qirlarda butlarga sajda qilar edik, Qattiq shovqin — suron koʻtarar edik. Ammo hammasi behuda ekan. Yagona najotkorimiz Sensan, ey Egamiz Xudo.

²⁴Bu yaramas butlar bolaligimizdan buyon, Otalarimizning mehnatini yoʻqqa chiqardi, Ularni mol — qoʻylaridan ayirdi, Oʻgʻil — qizlaridan judo qildi.

²⁵Keling, sharmandalikni oʻzimizga toʻshak qilaylik, Uyatni yopinchiq qilib, ustimizga yopaylik! Axir, ota — bobolarimiz bilan biz Egamiz Xudoga qarshi gunoh qildik. Yoshligimizdan to bugungacha Egamiz Xudoning gapiga kirmadik.»”