Read Uzbek Muqaddas Kitob Yeremiyo 30 Bible Online

Yeremiyo 30 - Uzbek Muqaddas Kitob bible

Yeremiyo 30

¹Egamizning soʻzi Yeremiyoga ayon boʻldi.

²Isroil xalqining Xudosi — Egamiz shunday dedi: “Men senga aytgan barcha soʻzlarimni oʻrama qogʻozga[163] yozib qoʻy.

³Shunday kunlar keladiki, Men xalqim Isroilni va Yahudoni yana farovonlikka erishtiraman[164]. Ota — bobolariga bergan yurtga ularni olib kelaman. Ular oʻsha yurtga egalik qiladilar.” Egamizning kalomi shudir.

⁴Egamiz menga Isroil va Yahudo haqida shunday soʻzlarni aytdi:

⁵Egamiz demoqda: “Sarosima ovozlarini eshitdik. Ana, vahima sadolari eshitilmoqda! Tinchlik yoʻq!

⁶Qani, soʻrab koʻring: Erkak kishi tugʻadimi? Nega unda men koʻrgan har bir kuchli erkak Dard tutgan ayolday belini ushlab olgan? Nega har bir erkakning yuzi boʻzday oqargan?

⁷Evoh, naqadar dahshatli bu kun! Bunday kun hech qachon boʻlmagan. Yoqub nasli uchun bu jabr kuni boʻladi, Ammo bu kundan xalqim qutqariladi.”

⁸Sarvari Olam shunday demoqda: “Oʻsha kuni Men xalqimning boʻynidagi boʻyinturuqni sindiraman, kishanlarini uzib tashlayman. Mening xalqim endi hech qachon ajnabiylarga qul boʻlmaydi.

⁹Ular Men, Oʻz Egasi Xudoga va Men taxtga oʻtqizadigan Dovud avlodidan boʻlgan shohga xizmat qilishadi.”

¹⁰Egamiz shunday demoqda: “Ey qulim Yoqub, qoʻrqma! Ey Isroil[165] xalqi, sarosimaga tushma! Men seni olis yurtdan ozod qilib olib kelaman, Naslingni surgun boʻlgan mamlakatdan qutqaraman. Ey Yoqub nasli, sen yurtingga qaytasan, Osoyishta va bexatar yashaysan. Endi hech kim seni qoʻrqitmaydi.”

¹¹Egamiz shunday demoqda: “Men sen bilan birga boʻlaman, Oʻzim seni qutqaraman. Seni xalqlar orasiga tarqatgan edim, Endi oʻsha xalqlarning hammasini qirib tashlayman. Seni esa qirib yubormayman, Ammo jazosiz ham qoldirmayman, Adolat ila jazoingni beraman.”

¹²Mana, Egamiz Oʻz xalqiga shunday demoqda: “Yarangni davolab boʻlmaydi, Sening darding bedavodir.

¹³Arzingni eshitadigan odam yoʻq, Yarang uchun dori — darmon yoʻq, Seni davolab boʻlmaydi.

¹⁴Hamma oʻynashlaring[166] seni unutdi, Ularning sen bilan ishi yoʻq. Men dushman kabi, senga hamla qildim, Shafqatsiz jazoingni berdim. Ogʻir jinoyating, koʻp gunohlaring uchun Seni shu koʻyga soldim.

¹⁵Nechun jon achchigʻida baqiryapsan?! Yarangni davolab boʻlmaydi, axir! Ogʻir jinoyating, koʻp gunohlaring uchun Seni shu koʻyga soldim.

¹⁶Ammo seni halok qilganlar halok boʻladi, Dushmanlaringning hammasi surgun qilinadi. Seni talon — taroj qilganlar talanadi. Senga hujum qilganlar bosib olinadi.

¹⁷Dushmanlar seni «Tashlab ketilgan» deb atashsa ham, «Hech kimning Quddus[167] bilan ishi yoʻq», deb aytishsa ham, Men seni sogʻaytiraman, Yarangga shifo beraman.” Egamizning kalomi shudir.

¹⁸Egamiz shunday demoqda: “Men Yoqub naslining chodirlarini qayta tiklayman. Xalqim xonadonlariga rahm — shafqat qilaman. Shahar oʻz vayronalari ustida qayta bunyod boʻladi, Saroy oʻz joyida tiklanadi.

¹⁹U yerdan shukrona qoʻshiqlari eshitiladi, Shodlik hayqiriqlari yangrab turadi. Men xalqimni koʻpaytiraman, Ularning soni kamaymaydi. Ularni obroʻ — e’tiborli qilaman, Hech kim ularni oyoq osti qilmaydi.

²⁰Farzandlari oldingiday farovon hayot kechiradi, Jamoasi oldimda mustahkam turadi. Ularga jabr qilganlarni Men jazolayman.

²¹Shahzodasi oʻzlaridan chiqadi, Hukmdori Mening xalqimdan boʻladi. Men uni Oʻzimga yaqinlashtiraman, Shunda u Menga yaqinlasha oladi. Zotan, hech kim oʻzidan — oʻzi Menga yaqinlashishga jur’at etmaydi! — deb aytmoqda Egamiz. —

²²Shunda, ey Yoqub nasli, sizlar Mening xalqim boʻlasizlar, Men esa sizlarning Xudoyingiz boʻlaman.”

²³Qaranglar, Egamiz gʻazabga mindi, Uning qahri boʻronga oʻxshaydi, Avj olgan toʻfonday, Fosiqlarning boshiga tushadi.

²⁴Egamiz niyatini toʻliq bajarmaguncha, Oʻz gʻazabidan tushmaydi. Keyinchalik buni anglab olasiz.