Read Uzbek Muqaddas Kitob Yeremiyo 35 Bible Online

Yeremiyo 35 - Uzbek Muqaddas Kitob bible

Yeremiyo 35

¹Yoʻshiyo oʻgʻli shoh Yohayiqim[206] hukmronlik qilgan davrda Egamiz Oʻz soʻzini Yeremiyoga ayon qildi:

²“Qani boʻla qol, Yeremiyo, Raxav xonadoni huzuriga borib, u yerdagi odamlar bilan gaplash. Soʻng uyimdagi yon xonalarning biriga ularni taklif qilgin — da, sharobdan quyib ber.”

³Men borib, Xavazinyoning nevarasi — Yeremiyo oʻgʻli Yazaniyoni aka — ukalari bilan birga, hamma oʻgʻillarini va butun Raxav xonadonini chaqirib,

⁴Egamizning uyiga boshlab keldim. Ularni Yixdaliyo oʻgʻli Xanon paygʻambarning oʻgʻillariga qarashli xonaga olib kirdim. Bu xonaning yonida Ma’bad a’yonlarining xonasi, tagida esa Shallum oʻgʻli Masiyoning xonasi joylashgan edi. Masiyo Ma’bad darvozaboni boʻlib xizmat qilar edi.

⁵Men dasturxonga idishlarni toʻldirib sharob tortdim, piyolalar qoʻydim. Soʻng Raxav nasliga: — Marhamat qilib, sharobdan ichinglar, — deb taklif qildim.

⁶Ular shunday dedilar: — Biz sharob ichmaymiz. Bobokalonimiz Raxav oʻgʻli Yohunadav[207] bizga shunday amr qilgan: “Zinhor sharob ichmanglar, bolalaringiz ham ichmasin.

⁷Uylar qurmanglar, ekin ekmanglar, uzumzorlar barpo qilmanglar, ularni oʻzingizga mulk qilib olmanglar. Koʻchib borgan joyingizda uzoq vaqt yashay olishingiz uchun chodirlarda kun kechiringlar.”

⁸Shuning uchun biz bobokalonimizning amriga boʻysunib, hech qachon sharob ichmaymiz, xotinlarimiz ham, oʻgʻil — qizlarimiz ham sharob ichmaydilar.

⁹Oʻzimiz uchun uylar qurmaymiz, ekin ekmaymiz, bizda na uzumzor bor, na dala bor.

¹⁰Biz bobokalonimiz Yohunadavning amriga itoat qilib, bir umr chodirlarda yashab keldik.

¹¹Ammo Bobil shohi Navuxadnazar[208] bu yurtga bostirib kelgandan soʻng, Bobil[209] va Oram lashkarlaridan qoʻrqib, Quddusga kelishga qaror qilgan edik. Shu sababdan hozir biz Quddusda yashab yuribmiz.

¹²Shundan soʻng Yeremiyoga Egamizning quyidagi soʻzi ayon boʻldi.

¹³Isroil xalqining Xudosi — Sarvari Olam unga shunday dedi: “Qani boʻl, Yeremiyo, Yahudo xalqi va Quddus aholisining huzuriga borib, shunday deb ta’na qil: sizlar oʻzi saboq olasizlarmi?! Menga itoat qilishni oʻrganasizlarmi oʻzi?!

¹⁴Ana, koʻrib qoʻying, Raxav nasli oʻz bobokalonining amriga itoat qilgani uchun bugunga qadar sharobni ogʻziga ham olmay yuribdi. Men esa sizlarga qayta — qayta gapirgan boʻlsam ham, sizlar Menga itoat qilmadingizlar.

¹⁵Men paygʻambar qullarimni oldingizga qayta — qayta joʻnatdim. Ular orqali sizlarni shunday deb ogohlantirgan edim: «Sizlarga va ota — bobolaringizga Men bergan bu yurtda yashay olishingiz uchun yomon yoʻlingizdan qaytinglar. Turmush tarzingizni oʻzgartiringlar. Boshqa xudolarga ergashmanglar. Ularga xizmat qilmanglar.» Ammo sizlar quloq solmadingizlar, gapimga kirmadingizlar.

¹⁶Yohunadavning avlodi oʻz bobokaloni buyurib ketgan amrni ijro etdi, bu xalq esa Menga itoat qilmadi.”

¹⁷Shuning uchun Isroil xalqining Xudosi, Parvardigori Olam — Egamiz shunday demoqda: “Men Yahudo va Quddus aholisiga gapirgan edim, ammo ular gaplarimga quloq solmadilar, ularni chaqirgan edim, ammo Menga javob bermadilar. Shuning uchun Oʻzim aytgan barcha balo — qazolarni ularning boshlariga yogʻdiraman.”

¹⁸Raxav xonadoniga esa Yeremiyo shunday dedi: “Isroil xalqining Xudosi — Sarvari Olam demoqda: «Sizlar bobokaloningiz Yohunadavning amriga itoat etdingiz, uning nasihatlarini rad etmay, aytganlarining hammasini bajardingiz, shuning uchun

¹⁹Raxav oʻgʻli Yohunadav avlodidan boʻlgan kishi huzurimda abadulabad xizmat qiladigan boʻladi.» Isroil xalqining Xudosi — Sarvari Olamning kalomi shudir.”