Read Uzbek Muqaddas Kitob Yeremiyo 37 Bible Online

Yeremiyo 37 - Uzbek Muqaddas Kitob bible

Yeremiyo 37

¹Bobil shohi Navuxadnazar[217] Yoʻshiyo oʻgʻli Zidqiyoni[218] Yohayiqim oʻgʻli Yohayixinning[219] oʻrniga Yahudo shohi qilib tayinladi.

²Ammo na shoh, na a’yonlari, na yurtdagi xalq Egamizning Yeremiyo orqali aytgan soʻzlariga quloq solar edilar.

³Shoh Zidqiyo Shalamiyo oʻgʻli Yohuxal bilan Masiyo oʻgʻli ruhoniy Zafaniyoni Yeremiyo paygʻambarning oldiga yuborar ekan, shu gaplarni ayttirib yubordi: “Iltimos, biz uchun Egamiz Xudoga iltijo qil.”

⁴Yeremiyo shu vaqtgacha qamoqqa olinmaganligi uchun xalq orasida bemalol yurar edi.

⁵Shu orada fir’avn lashkari Misrdan chiqdi[220]. Quddusni qamal qilib turgan Bobilliklar[221] bu xabarni eshitishgach, Quddusdan chekindilar.

⁶Shunda Egamiz soʻzini Yeremiyoga ayon qildi.

⁷Isroil xalqining Xudosi — Egamiz shunday demoqda: “Xudoning soʻzini bilmoqchi boʻlib, ikkovingizni oldimga yuborgan Yahudo shohiga shunday deb ayting: sizlarga yordam bermoqchi boʻlib kelayotgan fir’avn lashkari oʻz yurti — Misrga qaytib ketadi.

⁸Bobilliklar esa Quddusga qaytib kelib, shaharga qarshi jang qiladilar. Ular shaharni qoʻlga olib, yondirib yuboradilar.”

⁹Egamiz yana shunday demoqda: “Bobilliklar endi qaytib kelishmaydi, deb oʻzlaringizni aldamanglar, chunki ular albatta qaytib kelishadi.

¹⁰Bordi — yu, sizlar Bobilliklarning butun lashkarini magʻlub qilganingizda ham, ularning chodirlarida qolgan yaradorlar kelib, shahringizga oʻt qoʻygan boʻlardi.”

¹¹Fir’avn lashkari yaqinlashib kelayotgani uchun Bobilliklar Quddusdan chekindilar.

¹²Shunda Yeremiyo Benyamin hududidagi[222] xalq orasida oʻziga tegishli yer ulushini koʻrish uchun Quddus shahridan ketmoqchi boʻldi.

¹³U Quddusning Benyamin darvozasiga yetib kelgach, soqchilar boshligʻi Yiriyo: — Sen Bobilliklarning oldiga qochib ketmoqchisan, — deb uni qamoqqa oldi. Yiriyo Shalamiyoning oʻgʻli, Xanoniyoning nevarasi edi.

¹⁴— Yolgʻon! — dedi Yeremiyo, — men Bobilliklarning oldiga qochmoqchi emasman. Ammo Yiriyo Yeremiyoning gapiga quloq solishni istamadi, uni hibsga olib, a’yonlarning oldiga olib bordi.

¹⁵A’yonlar Yeremiyodan gʻazablanib, uni kaltaklashdi. Soʻng kotib Yoʻnatanning zindonga aylantirilgan uyiga qamab qoʻyishdi.

¹⁶Shunday qilib, Yeremiyo uzoq vaqt zindon hujralaridan birida yotdi.

¹⁷Oradan vaqt oʻtdi. Shoh Zidqiyo Yeremiyoni saroyiga chaqirtirib: — Egamizdan biron xabar bormi? — deb yashirincha soʻradi. — Ha, bor, — dedi Yeremiyo. — Siz Bobil shohining qoʻliga tushasiz.

¹⁸Nega ular meni zindonga tashlashdi? Men a’yonlaringizga va bu xalqqa qarshi nima gunoh qilibman?! — dedi yana u.

¹⁹— “Bobil shohi sizga hujum qilmaydi, yurtimizga u tajovuz qilmaydi”, deb bashorat qilgan paygʻambarlaringiz qani?!

²⁰Yolvoraman, olampanohim, iltijoimni rad etmang, meni kotib Yoʻnatanning uyiga qaytarib yubormang. U yerda adoyi tamom boʻlaman.

²¹Shoh Zidqiyo, Yeremiyoni soqchilar hovlisiga qamab qoʻyinglar, shaharda non qolmaguncha, har kuni unga novvoy rastasidan bittadan non olib beringlar, deb buyurdi. Shunday qilib, Yeremiyo soqchilar hovlisida qoldi.