Read Uzbek Muqaddas Kitob Yeremiyo 43 Bible Online

Yeremiyo 43 - Uzbek Muqaddas Kitob bible

Yeremiyo 43

¹Yeremiyo Egasi Xudo oʻziga ayon qilgan bu soʻzlarning hammasini butun xalqqa aytib boʻlgach,

²Hoʻshayyo oʻgʻli Ozariyo, Kariyox oʻgʻli Yoʻxanon va boshqa surbetlar Yeremiyoga shunday dedilar: — Yolgʻon gapiryapsan! Egamiz Xudo senga, Misrga borib yashamanglar, deb aytmagan.

³Neriyo oʻgʻli Borux seni bizga qarshi gijgijlab yuribdi. U bizni Bobilliklarning[257] qoʻliga tushirib, halok qilmoqchi yoki surgun qilib yubormoqchi.

⁴Shunday qilib, Kariyox oʻgʻli Yoʻxanon, lashkarboshilar va butun xalq Egamizning amriga itoat qilmadilar, ular Yahudo yurtida qolishdan bosh tortdilar.

⁵Yahudoga turli yurtlardan qaytib kelgan hamma odamlarni Yoʻxanon va lashkarboshilar oʻzlari bilan olib ketdilar.

⁶Bulardan tashqari, qoʻriqchilar sardori Nabizaradon Oxixam oʻgʻli Gadaliyo yonida qoldirib ketgan hamma erkagu ayollarni, bola — chaqa, malikalar, Yeremiyo paygʻambar va Neriyo oʻgʻli Boruxni ham ular oʻzlari bilan olib ketdilar.

⁷Ular Egamizning amriga itoat qilmay, Misrga joʻnab, Taxpanxas shahriga yetib bordilar.

⁸Taxpanxasda Yeremiyoga Egamizning quyidagi soʻzi ayon boʻldi:

⁹“Yahudiylarning koʻzi oldida katta toshlarni ol. Bu toshlarni Taxpanxas shahridagi fir’avn saroyining kiraverishiga, hovlidagi gʻisht yoʻlagi ostiga koʻmib qoʻy.

¹⁰Soʻng yahudiylarga shunday deb ayt: «Isroil xalqining Xudosi — Sarvari Olam demoqda: Men Bobil shohi qulim Navuxadnazarni[258] bu yerga olib kelaman. U mana shu koʻmilgan toshlarning ustiga taxtini oʻrnatib, shohona chodirini tikadi.

¹¹U kelganda Misrni vayron qiladi, har bir odam peshanasidagini koʻradi: Ba’zilar oʻlatga yoʻliqib, nobud boʻladi, Ba’zilar asirlikka tushib, surgun qilinadi, Ba’zilar qilichdan oʻtkaziladi.

¹²Mening amrim bilan Navuxadnazar Misr xudolarining sajdagohlariga oʻt qoʻyadi. Ba’zi butlarini yondiradi, ba’zilarini oʻzi bilan olib ketadi. Qoʻychivon toʻnini bit — burgadan astoydil tozalaganday, Navuxadnazar ham Misr yurtini qirtishlab tozalaydi. Soʻng sogʻ — salomat oʻz yurtiga qaytib ketadi.

¹³U Misrdagi Quyosh sajdagohiga[259] oʻrnatilgan butsimon toshlarni buzib tashlaydi. Misr xudolarining sajdagohlarini yoqib yuboradi.»”