Read Uzbek Muqaddas Kitob Yeremiyo 46 Bible Online

Yeremiyo 46 - Uzbek Muqaddas Kitob bible

Yeremiyo 46

¹Egamiz xalqlar haqida Yeremiyoga Oʻz soʻzini ayon qildi.

²Bu Misr haqida bashorat edi. Aniqrogʻi, Misr fir’avni Nexoning[270] lashkari toʻgʻrisida edi. Ular Furot daryosi boʻyidagi Karxamish shahrida qarorgoh qurgan edilar. (Yahudo shohi Yoʻshiyo oʻgʻli Yohayiqim hukmronligining toʻrtinchi yilida[271] Bobil shohi Navuxadnazar[272] bu lashkarni magʻlub qildi.)

³Egamiz shunday deydi: “Kattayu kichik qalqonlarni tayyor tuting! Qani, endi jangga kiring!

⁴Otlarga egar uring, Chopqir otlarga mining! Dubulgʻalarni kiyib oling, Jangovar holatda turing. Nayzalarni oʻtkirlang, Sovutlarni kiyib oling!

⁵Ammo nimalarni koʻryapman?! Misr lashkari vahimaga tushdi, Ular orqaga chekindi, Jangchilari tor — mor boʻldi. Ular orqaga qaramay shoshilib qochdilar. Atrofni dahshat qamradi, — deb aytmoqda Egamiz. —

⁶Chaqqonlar qocha olmaydilar, Sipohlar qochib qutulolmaydilar. Ular shimolda, Furot daryosi boʻyida Qoqilib yiqilib tushadilar.”

⁷Kim u Nil daryosiday qirgʻogʻidan chiqib ketgan?! Kim u suvlari toshqin daryo kabi boʻlib qolgan?!

⁸Misr Nilday haddidan oshgan, Suvlari toshqin daryoga oʻxshab qolgan. Misr aytadi: “Men koʻtarilib, yer yuzini qoplayman, Shaharlarni vayron qilaman, Aholisini qirib tashlayman.”

⁹Ey otliqlar, hujum qiling! Jang aravalarini uchirtiring! Ey qalqon tutgan Habashistonliklaru[273] Liviyaliklar[274], Ey kamon ushlagan Lidiyaliklar[275], Qani, jangga kiring!

¹⁰Axir, bu Sarvari Olam — Rabbiyning kunidir. Bu kun qasos kuni boʻladi, Xudo dushmanlaridan oʻch oladi. Uning qilichi toʻyguncha et yeydi, Chanqogʻi bosilguncha qondan ichadi. Oʻsha kuni Furot boʻyidagi shimoliy yurtda, Sarvari Olam — Rabbiy yovlarini qurbon qiladi.

¹¹Ey bokira qiz[276] Misr, Giladga[277] bor, malham olgin. Ammo sen bekorga dori — darmon yigʻasan, Baribir dardingga shifo topmaysan.

¹²Xalqlar sharmanda boʻlganingni eshitdi, Yer yuzi dodu faryodlaringga toʻlib ketdi. Jangchilaring bir — biriga urildi, Hammasi magʻlub boʻlib yiqildi.

¹³Bobil shohi Navuxadnazar Misrga hujum qilishi haqida Yeremiyoga Egamizning quyidagi soʻzi ayon boʻldi:

¹⁴Misrda shunday deb e’lon qilgin, Migdol shahrida shunday deb xabar bergin, Nuf va Taxpanxas shaharlarida[278] jar solib aytgin: “Joylaringizni egallang! Jangga shay turing! Zero, qilich atrofdagi hammani qiradi.”

¹⁵Jangchilaringiz magʻlub boʻladi! Ular bardosh bera olmaydi. Zero, Egamizning Oʻzi ularni uradi[279].

¹⁶Ular qayta — qayta qoqiladilar[280], Bir — birining ustiga yiqiladilar. Shunda oʻzlariga oʻzlari aytadilar: “Qani, boʻlinglar, Xalqimizning oldiga qochib qolaylik! Kindik qonimiz toʻkilgan yurtga boraylik. Bu qirgʻindan qochib qutulaylik.”

¹⁷Ular shunday deb baqiradilar: “Fir’avn katta gapirdi, Ammo fursatni qoʻldan boy berdi.”

¹⁸Xudo Shohdir, Sarvari Olamdir Uning nomi. U shunday demoqda: “Men barhayot Xudo boʻlganim haqi aytamanki, Sizlarga qarshi bir gʻanim kelayotir. U togʻlar orasidagi Tovur togʻiday zabardast, Dengiz boʻyidagi Karmil togʻiday[281] ulkan.

¹⁹Ey qiz Misr, tuguningni tayyorlagin, Surgunga ketishga hozirlangin! Axir, poytaxting Nuf vayron boʻladi, Kimsasiz, huvullab qoladi.

²⁰Misr chiroyli bir gʻunajinga oʻxshaydi, Ammo shimol soʻnasi[282] unga yopiriladi.

²¹Misrning yollanma askarlari Boqilgan buzoqlarga oʻxshaydi. Ammo kulfat kuni kelganda, Jazo oladigan vaqti yetganda, Ularning hammasi orqaga qochadi, Dushman qarshisida chekinadi.

²²Bostirib kelayotgan dushman dastidan Misr qochayotgan ilonday vishillaydi. Dushmanlar daraxt kesuvchilar kabi, Bolta koʻtarib, Misrga hujum qilishadi.

²³Misrning oʻrmoni qalin boʻlsa — da, Dushmanlar uni kesib tashlaydi, — deb aytmoqda Egamiz. — Axir, dushmanlar chigirtkadan[283] ham koʻp, Sanogʻiga yetib boʻlmaydi.

²⁴Qiz Misr sharmanda boʻladi, Shimoldagi xalqning[284] qoʻliga tushadi.”

²⁵Isroil xalqining Xudosi — Sarvari Olam shunday demoqda: “Men Noʻ[285] shahrining xudosi Omonni[286] jazolayman. Fir’avnning, Misrning, u yerdagi shohlar va xudolarning, fir’avnga umid bogʻlagan hammaning adabini beraman.

²⁶Ularning jonlariga qasd qilayotgan Bobil shohi Navuxadnazarning va a’yonlarining qoʻliga beraman. Ammo vaqt oʻtib, Misrda ilgarigidek odamlar yashaydigan boʻladi.” Egamizning kalomi shudir.

²⁷“Ey qulim Yoqub, qoʻrqma! Ey Isroil[287] xalqi, sarosimaga tushma! Men seni olis yurtdan ozod qilaman, Naslingni surgun boʻlgan mamlakatdan qutqaraman. Ey Yoqub nasli, sen yurtingga qaytasan, Osoyishta va bexatar yashaysan. Endi hech kim seni qoʻrqitmaydi.

²⁸Sen, ey qulim Yoqub, qoʻrqma, Men sen bilan birga boʻlaman, — deb aytmoqda Egamiz. — Seni xalqlar orasiga tarqatib yuborgan edim, Endi oʻsha xalqlarning hammasini qirib tashlayman. Seni esa qirib yubormayman, Ammo jazosiz ham qoldirmayman. Adolat ila jazoingni beraman.”