Read Uzbek Muqaddas Kitob Yeremiyo 49 Bible Online

Yeremiyo 49 - Uzbek Muqaddas Kitob bible

Yeremiyo 49

¹Egamiz Ommon[319] xalqi toʻgʻrisida shunday deydi: “Isroil tirnoqqa zormidi?! Uning merosxoʻri yoʻqmidi?! Nimaga unda Moʻlaxga[320] topinadiganlar Gad hududini egallab olishdi? Nimaga Ommon xalqi Gad shaharlarida yashayapti?

²Bu qilmishlari uchun shunday kunlar keladiki, Men Ommonliklarning Rabba shahriga[321] qarshi urush e’lon qilaman, — deb aytmoqda Egamiz. — Rabba shahrini vayronalar uyumiga aylantiraman, Atrofdagi qishloqlariga oʻt qoʻyaman. Shunda Isroil xalqi Ommon bosqinchilarining yerlarini bosib oladi, — deb aytmoqda Egamiz. —

³Dod sol, ey Xashbon![322] Ay shahri[323] vayron boʻldi! Ey Rabba aholisi, faryod qiling! Qanorga oʻranib[324], marsiya ayting, Qaygʻudan badaningizni tiling[325]. Axir, xudoyingiz Moʻlax surgun qilinadi, Ruhoniylaru a’yonlaringiz asirga olib ketiladi.

⁴Ey isyonkor qiz[326] Ommon, Nechun kuching bilan maqtanasan? Sening kuching qirqiladi![327] Sen boyligingga ishonasan, «Bizga hujum qilishga kim jur’at etar?» deysan.

⁵Men Oʻzim senga har tomondan dahshat solaman, — deb aytmoqda Sarvari Olam — Rabbiy. — Hammangiz tumtaraqay boʻlib qochasizlar, Qochoqlarni hech kim toʻplay olmaydi.

⁶Ammo shundan soʻng Men Ommon xalqini yana farovonlikka erishtiraman[328].” Egamizning kalomi shudir.

⁷Sarvari Olam Edom[329] haqida shunday demoqda: “Temonda[330] farosatli kishi qolmadimi? Oqilona nasihat beradigan topilmadimi? Aqllarini mogʻor bosdimi?

⁸Ey Dedonliklar[331], qochinglar, Chuqur gʻorlarda bekinib olinglar! Vaqt keldi Esov naslini[332] jazolashga, Falokat keltiraman uning boshiga.

⁹Bogʻingizda uzum tergan odamlar Bir — ikki bosh boʻlsa — da, uzum qoldiradi — ku! Kechasi uyga tushgan oʻgʻri Faqat xohlagan narsasini oladi — ku!

¹⁰Men esa Esovning bor — yoʻgʻini tortib olaman, Uning pana joylarini oshkor qilaman, U hech qayerga yashirina olmaydi. Uning bolalari halok boʻladi, Ogʻa — ini, qoʻshnilari oʻladi. Undan asar ham qolmaydi.

¹¹Yetimlaringizni qoldiring, Ularning jonini asrayman. Bevalaringiz Menga inonib yashasin.”

¹²Egamiz shunday demoqda: “Aybsiz odamlar jabr tortsa — yu, sen, ey Edom, jazosiz qolasanmi?! Yoʻq, sen jazodan qochib qutulolmaysan. Jazo kosasidan[333] albatta ichasan.

¹³Oʻz nomim bilan qasam ichib[334] aytamanki, Bozrax shahri[335] vayron boʻladi. Uning ayanchli ahvoli odamlarni vahimaga soladi. Oʻtgan — ketganlar uni mazax qilib, nomini qargʻishlarda ishlatadi. Yon — atrofidagi hamma shaharlar ham to abad tashlandiq boʻlib qoladi.” Egamizning kalomi shudir.

¹⁴Egamiz barcha xalqlarga jarchi yubordi, Men, Yeremiyoga shunday xabar yetib keldi: “Toʻplaning! Edomga hujum qiling, Qani, jangga otlaning!”

¹⁵Egamiz deydi: “Ey Edom, seni xalqlar orasida arzimas qilib qoʻyaman, Butun odamzod sendan hazar qiladigan boʻladi.

¹⁶Vajohating seni aldadi, Takabburliging seni ahmoq qildi. Sen — ku tik qoyada yashaysan, Azim choʻqqilarni egallagansan. Burgut kabi iningni baland qurgan boʻlsang ham, Seni u yerdan tortib tushiraman.” Egamizning kalomi shudir.

¹⁷Egamiz shunday demoqda: “Edomning boshiga tushadigan kulfatlar shu qadar dahshatli boʻladiki, bu yurtning oldidan oʻtgan har bir kishi uning ayanchli ahvolidan vahimaga tushib, qotib qoladi. Sadoʻm, Gʻamoʻra[336] va ularning atrofidagi shaharlar qanday vayron boʻlgan boʻlsa, Edom ham xuddi shunday vayron boʻladi. U yerda hech kim yashamaydi.

¹⁹Men, Iordan chakalakzoridagi arslonday, yaylovdagi qoʻylarga hujum qilaman. Bir zumda Edom xalqini oʻz yurtidan haydab chiqaraman. Oʻzim xohlagan insonni u yerga bosh qilaman. Axir, kim Menga teng kela oladi?! Kim Mendan hisobot soʻray oladi?! Qaysi choʻpon Menga qarshi tura oladi?!

²⁰Shunday ekan, Edom xalqiga qarshi tuzgan rejalarimni eshitib qoʻying. Temon aholisiga qilgan niyatlarimga quloq tuting: yirtqichlar suruvdagi qoʻzichoqlarni sudrab ketadi. Qilmishlari dastidan yam — yashil yaylovlari payhon boʻladi.

²¹Edom gursullab qulaganda, yer yuzi larzaga keladi. Xalqning dodu voylari Qizil dengizgacha[337] eshitiladi.

²²Qaranglar! Dushman burgutday Bozraxga hujum qilmoqda. Qanot kerib shahar uzra parvoz etmoqda. Oʻsha kuni Edom lashkari dard tutgan ayol kabi vahimaga tushadi.”

²³Quyidagi xabar Damashq haqidadir: Egamiz shunday deydi: “Xomat bilan Arpad ahli[338] shum xabar eshitishadi, Shuning uchun ular sarosimaga tushadi. Yuragiga tushgan gʻulgʻula bosilmaydi, Joʻshqin dengiz kabi tinchlanmaydi.

²⁴Damashq madorsiz qoladi, Orqaga qochmoqchi boʻladi, Butun vujudini vahima qamrab oladi. Dard tutgan ayolday azobu qiynoqda qoladi.

²⁵Evoh, mashhur shahar tark etiladi! Quvonch makoni[339] tashlab ketiladi!

²⁶Oʻsha kuni yigitlari maydonlarda oʻladi, Hamma sipohlari halok boʻladi, — deb aytmoqda Sarvari Olam. —

²⁷Men Damashq devorlariga oʻt qoʻyaman, Olov Banhadad qal’alarini yondirib tashlaydi.”

²⁸Bobil shohi Navuxadnazar[340] magʻlub qilgan Kedar va Xazor[341] shohliklari haqida Egamiz shunday deydi: “Qani boʻling, Kedarga hujum qiling! Oʻsha sharq qabilalarini halok eting!

²⁹Qoʻlga kiriting chodirlariyu qoʻylarini, Chodir pardalariyu bor bisotini. Tuyalarini oʻzingizga oling. Odamlar baqiradi: «Atrofni dahshat qamradi!»

³⁰Ey Xazor aholisi! Qoching! Uzoqlarga bosh olib keting. Chuqur gʻorlarda yashirinib oling, — deb aytmoqda Egamiz. — Zero, Bobil shohi Navuxadnazar Sizlarga qarshi bir reja tuzdi, Sizlarni halok etish niyatida yuribdi.

³¹Ey Bobil lashkarlari, Qani, xotirjam boʻlgan xalqqa hujum qilinglar! Bexatar yashayotganlarga tashlaninglar! — deb aytmoqda Egamiz. — Ular sahroda yolgʻiz yashaydilar, Shaharlarining na darvozalari, na tambalari bor.

³²Ularning tuyalarini oʻlja olasiz, Mol podalarini qoʻlga kiritasiz. Sochini oldirib yurgan[342] Xazorliklarni Men toʻrt tomonga tarqatib yuboraman. Ularning ustiga har yoqdan kulfat yogʻdiraman, — deb aytmoqda Egamiz. —

³³Xazor to abad tashlandiq boʻlib qoladi, Chiyaboʻrilar makoniga aylanadi. U yerda hech kim yashamaydi, U joylarga hech kim borib oʻrnashmaydi.”

³⁴Yahudo shohi Zidqiyo[343] hukmronligining ilk davrida Egamiz Yeremiyo paygʻambarga Elam yurti[344] toʻgʻrisida Oʻz soʻzini ayon qildi.

³⁵Sarvari Olam demoqda: “Men Elam merganlarini nobud qilaman. Qudratining manbaini sindiraman.

³⁶Ular ustiga toʻrt tomondan dushman solaman. Hammasini yer yuzining toʻrt tomoniga tarqatib yuboraman. Elamliklar qochib bormagan biron — bir yurt qolmaydi.

³⁷Men Elamni qasdi bor dushmanlari qarshisida sarosimaga solaman. Qaynagan gʻazabimni ustilariga kulfat qilib yogʻdiraman, — deb aytmoqda Egamiz. — Ortidan qilich solib, hammasini bitta qoldirmay qirib tashlayman.

³⁸Ularning shohini a’yonlari bilan birga yoʻq qilaman. Elamda Oʻz taxtimni oʻrnataman.

³⁹Ammo keyinchalik Men Elam xalqini yana farovonlikka erishtiraman.” Egamizning kalomi shudir.