Read Uzbek Muqaddas Kitob Yeremiyo 50 Bible Online

Yeremiyo 50 - Uzbek Muqaddas Kitob bible

Yeremiyo 50

¹Egamiz Bobil yurti, Bobilliklarning[345] diyori xususida Yeremiyo paygʻambar orqali shunday soʻzlarni aytdi:

²“Xalqlarga e’lon qiling, xabar yetkazing! Bayroq koʻtarib, yangilikni ayting. Hech narsa yashirmay shunday jar soling: «Bobil qulaydi, Ularning xudosi Bel sharmanda boʻladi, Xudosi Mardux[346] parcha — parcha qilinadi. Bobil butlari xor boʻladi, Sanamlari sindirib tashlanadi.»

³Shimoldagi bir xalq Bobil ustiga bostirib keladi. Ular butun yurtni vayron qilishadi. U yerda hech kim yashamaydigan boʻladi. Odamlar va hayvonlar u yerdan qochib ketadi.”

⁴Egamiz shunday demoqda: “Oʻsha kunlar kelganda, Isroil xalqi Yahudo xalqi bilan birga koʻz yosh toʻkib, Egasi Xudoga intiladigan boʻladi.

⁵Ular yuzlarini Quddus[347] tomon buradilar, u yerga olib boradigan yoʻlni soʻrab — surishtiradilar. Egasiga bogʻlanib qoladilar, U bilan unutilmas, abadiy bir ahd tuzadilar.

⁶Mening xalqim adashgan qoʻylarga oʻxshaydi. Choʻponlari ularni yoʻldan adashtirib, togʻlarga haydab yubordilar. Ular togʻlaru qirlarda darbadar kezib, oromgohini unutdilar.

⁷Qoʻylarimga duch kelgan odam ularni yedi. Dushmanlar shunday dedi: «Bizning aybimiz yoʻq. Ularning oʻzlari Egasiga qarshi gunoh qildi. Egasi ular uchun asil yaylovday edi, ota — bobolari Egasiga umid bogʻlagan edi.»

⁸Ey Isroil xalqi, Bobildan qochib chiqing! Bobilliklarning yurtini tark eting! Suruvni boshqarib ketayotgan serkaday birinchi boʻlib chiqing.

⁹Mana, Men shimoldagi qudratli xalqlarni Bobilga qarshi qoʻzgʻatyapman. Ular saf tortib, Bobilga hujum qiladilar. Bobil jangda magʻlub boʻladi. Dushman oʻqlarining hammasi toʻgʻri nishonga tegadi, ularning oʻqlari merganlarning oʻqlaridaydir.

¹⁰Bobil[348] talon — taroj qilinadi, hamma talonchilari oʻljaga toʻyadi.” Egamizning kalomi shudir.

¹¹Ey Xudoning xalqini talagan Bobilliklar! Sizlar sevinib, xursand boʻlyapsizlar, Yaylovdagi buzoqday[349] shodon sakrayapsizlar, Otlar kabi kishnayapsizlar.

¹²Ammo bilib qoʻying, ona yurtingiz xor boʻladi, Siz tugʻilgan yurt oyoq osti qilinadi. Yurtingiz xalqlar orasida arzimas boʻlib qoladi, Choʻl, qaqroq yer, sahroga aylanadi.

¹³Egamiz Bobilga qahrini sochadi, U yerda hech kim yashamaydi. Butunlay tashlandiq boʻlib qoladi. U yerdan kim oʻtsa yoqasini ushlaydi, Bobil xarobalarini koʻrib qotib qoladi.

¹⁴Ey merganlar! Bobil atrofiga saf torting! Unga qarshi oʻq uzing! Oʻqingizni sira ayamang. Axir, Bobil Egamizga qarshi gunoh qildi.

¹⁵Har yoqdan Bobilga shunday deb xitob qiling: “Bobil taslim boʻlyapti, Istehkomlari yiqilyapti, Devorlari oʻpirilib tushyapti.” Egamizning qasosidir bu. Sizlar ham Bobildan oʻch oling, Qilmishlarini oʻz boshiga qaytarib soling.

¹⁶Bobildagi urugʻ sepuvchilarni yoʻq qiling, Oʻrim mavsumida oʻroqchilarni oʻldiring. Dushman qilichidan hamma qochsin, U yerdagi asirlar oʻz xalqi orasiga qaytsin, Ona yurtiga qochib borsin.

¹⁷Isroil xalqi[350] sherlar har yoqqa tumtaraqay qochirib yuborgan qoʻylarga oʻxshaydi. Ilk bor Isroilga Ossuriya shohi[351] tashlangan edi, Isroilning suyaklarini esa Bobil shohi Navuxadnazar[352] gʻajigan edi.

¹⁸Shu sababdan Isroil xalqining Xudosi — Sarvari Olam shunday demoqda: “Men Ossuriya shohini qanday jazolagan boʻlsam, Bobil shohini va uning yurtini ham xuddi shunday jazolayman.

¹⁹Isroilni oʻz yayloviga qaytarib olib kelaman, ular Karmil togʻining yon bagʻirlarida va Bashanda oʻtlab yuradilar. Efrayim qirlarida va Giladda[353] yurib, qorinlarini toʻygʻizadilar.

²⁰Oʻsha kunlar kelganda Isroildan biron gunoh topilmaydi, Yahudo ham benuqson boʻladi, — deb aytmoqda Egamiz. — Zero, Men asragan xalqimning gunohlarini kechiraman.”

²¹Egamiz shunday demoqda: “Marotayim[354] yurtiga bostirib boringlar, Paxoʻd[355] aholisiga hujum qilinglar, Ularni tamomila qirib bitiringlar. Sizlarga Men buyurgan hamma ishni bajaringlar.

²²Bobildan jang shovqin — suroni koʻtarilmoqda, Hamma yoq xarobaga aylanmoqda.

²³Bobil butun dunyoni bolgʻaday parcha — parcha qildi, Eh, endi oʻzi sinib parchalanib ketdi! Bobilning ahvoli xalqlarni vahimaga soldi.

²⁴Ey Bobil, Men senga tuzoq qoʻygandim, Bilmasdan tuzogʻimga tushib qolding. Seni fosh qildim, qoʻlga oldim. Axir, sen Menga qarshi chiqqan eding.”

²⁵Egamiz Oʻz aslahaxonasini ochdi, Gʻazab qurollarini olib chiqdi. Sarvari Olam — Rabbiy Bobilliklar yurtida bir ish qilishga shaylandi.

²⁶Uzoq yurtlardan Bobilga hujum qiling! Omborxona eshiklarini buzing! Bobilni don uyumlariday yigʻing, Hammasini yoʻq qiling. Undan asar ham qolmasin!

²⁷Yosh jangchilarini oʻldiring, Hammasini qirib tashlang. Bobilning holiga voy, uning kuni bitdi, Jazo oladigan vaqti yetdi.

²⁸Bobildan qochib kelganlarning gaplarini eshiting. Ular Quddusga kelib, Egamiz Xudo Oʻz Ma’badi uchun qasos olganini e’lon qilishmoqda.

²⁹Egamiz shunday demoqda: “Bobilga hujum qilish uchun kamonkashlarni yigʻinglar. Shaharni qurshovga olinglar, bironta odam qochib keta olmasin. Bobilliklarning qilgan ishiga yarasha jazosini beringlar, qilmishlarini oʻz boshiga qaytarib solinglar. Zero, ular Menga, Isroil xalqining Muqaddas Xudosiga nisbatan takabburlik qildilar. Oʻsha kuni Bobilliklarning yigitlari maydonlarda oʻlib ketadi, hamma sipohlari halok boʻladi.”

³⁰

³¹Sarvari Olam — Rabbiy shunday demoqda: “Ey takabbur Bobil, Men senga qarshi chiqyapman! Sening kuning bitdi, Seni jazolaydigan vaqt yetdi.

³²Bu takabbur xalqing qoqilib tushadi, Seni hech kim turgʻizib qoʻymaydi. Men hamma shaharlaringga oʻt qoʻyaman, Olov atrofdagi hamma narsani yondirib yuboradi.”

³³Sarvari Olam shunday demoqda: “Isroil va Yahudo xalqlari zulm iskanjasida qolishdi. Dushmanlarning hammasi ularni qattiq tutib turibdi. Ularni qoʻyib yuborishdan bosh tortyapti.

³⁴Ammo Men ularning qudratli Qutqaruvchisiman, Mening nomim Sarvari Olamdir. Men xalqimni astoydil himoya qilaman, ularning yurtiga orom beraman. Bobilliklarni esa tinchlikdan mahrum qilaman.”

³⁵Egamiz shunday demoqda: “Bobilliklarga oʻlim! Butun Bobil aholisiga, A’yonlariyu donishmandlariga oʻlim!

³⁶Folbinlariga oʻlim! Naqadar ahmoqdir ular! Jangchilariga oʻlim! Naqadar vahimaga tushgan ular!

³⁷Otlariyu jang aravalariga oʻlim! Yollangan jangchilariga oʻlim! Ayollarga oʻxshagan zaifdir ular! Zeb — ziynatu boyliklarini yoʻq qiling, Talang, oʻlja qilib oling.

³⁸Butun yurtga qurgʻoqchilik kelsin! Daryolari qurib ketsin. Zero, bu yurt butlar makoni boʻldi, Vahimaga solgan oʻsha butlar dastidan Odamlari aqldan ozdi.

³⁹Shuning uchun Bobilda sirtlonlaru tuyaqushlar yashaydi. U yer yovvoyi dasht hayvonlarining makoniga aylanadi. Inson zoti endi u yerda hech qachon yashamaydi, Bobil to abad boʻm — boʻsh boʻlib qoladi.

⁴⁰Sadoʻm, Gʻamoʻra[356] va ularning atrofidagi shaharlar qanday vayron boʻlgan boʻlsa, Bobil ham shunday vayron boʻladi. U yerda hech kim yashamaydi.” Egamizning kalomi shudir.

⁴¹Ana, shimoldan olomon kelmoqda. Dunyoning chetidan Buyuk bir xalqu koʻp shohlar qoʻzgʻalmoqda.

⁴²Kamonu nayzalar bilan qurollangan ular, Shafqat qilmaydigan zolimdir bu odamlar. Ular otlarini yeldiradi, Dengizday guvullab keladi. Ey qiz[357] Bobil, ular senga qarshi chiqadi, Jang qilgani saf tortishadi.

⁴³Bobil shohi bu xabarni eshitdi, Qoʻllarida mador qolmadi. Dard tutgan ayol kabi Azobu iztirobda qoldi.

⁴⁴Egamiz shunday deydi: “Men, Iordan chakalakzoridagi arslonday, yaylovdagi qoʻylarga hujum qilaman. Bir zumda Bobil xalqini oʻz yurtidan haydab chiqaraman. Oʻzim xohlagan insonni u yerga bosh qilaman. Axir, kim Menga teng kela oladi?! Kim Mendan hisobot soʻraydi?! Qanday choʻpon Menga qarshi tura oladi?!

⁴⁵Shunday ekan, Bobil yurtiga qarshi Men tuzgan rejalarni eshitinglar. Bobil xalqi toʻgʻrisida qilgan niyatlarimga quloq tutinglar: yirtqichlar suruvdagi qoʻzichoqlarni sudrab ketadi. Qilmishlari dastidan yam — yashil yaylovlari payhon boʻladi.

⁴⁶Bobil gursullab qulaganda, yer yuzi larzaga keladi, xalqning dodu voylari olisdagi ellarga eshitiladi.”