Read Uzbek Muqaddas Kitob Yeremiyo 51 Bible Online

Yeremiyo 51 - Uzbek Muqaddas Kitob bible

Yeremiyo 51

¹Egamiz shunday demoqda: “Men Bobilga va uning aholisiga[358] qarshi, Halokat keltiradigan shamol qoʻzgʻataman.

²Bobilga ajnabiylarni joʻnataman. Ular bugʻdoyni sovurganday, Bobilni sovurib tashlaydilar. Uning bor — yoʻgʻini shilib oladilar. Kulfat kuni unga har yoqdan yopiriladilar.

³Bobil kamonkashlarining sovut kiyishiga, Oʻq uzishlariga imkon bermang. Bobil yigitlariga rahm qilmang! Lashkarini tamomila qirib bitiring.

⁴Ular Bobil[359] yurtida chopib tashlanadilar, Koʻchalarida ogʻir yaralanib yotadilar.”

⁵Isroil va Yahudo xalqlari Sarvari Olam oldida gunoh qilgan boʻlsalar ham, Xudosi ularni tark etmadi. Isroil xalqining Muqaddas Xudosi ulardan yuz oʻgirmadi.

⁶Bobildan qochib chiqinglar! Joningizni qutqarib qolinglar! Bobilning gunohi tufayli qirilib ketmanglar, Zotan, Egamiz Bobildan oʻch olmoqda, Qilgan qilmishlariga yarasha jazosini bermoqda.

⁷Bobil Egamizning qoʻlidagi oltin kosaday edi, Bobil butun dunyoni mast[360] qildi. Dunyo xalqlari kosadagi sharobdan ichdi, Hammasi aqldan ozdi.

⁸Bobil birdaniga qulaydi, vayron boʻladi. U uchun faryod qiling! Yaralariga malham surting, Zora tuzalib qolsa!

⁹Bobilda yashagan ajnabiylar aytishadi: “Bobilni tuzatmoqchi edik, ammo u tuzalmadi. Endi uni tashlab ketaylik, Har birimiz yurtimizga qaytib ketaylik. Axir, Bobilning jazosi boshidan oshdi, Koʻkdagi bulutlargacha yetib bordi.”

¹⁰Isroil xalqi deydi: “Egamiz bizni oqladi. Yuringlar, Quddusga[361] boraylik, Egamiz Xudoning buyuk ishlarini U yerda e’lon qilaylik.”

¹¹Egamiz Oʻz Ma’badi uchun Bobilliklardan oʻch olmoqchi boʻldi. U butun Bobil yurtini vayron qilishni rejalashtirib qoʻygan edi. Rejasini amalga oshirish uchun Midiya shohlarini[362] Bobilga qarshi qoʻzgʻatib, shunday degan edi: “Oʻtkirlang oʻqlarni! Toʻldiring oʻqdonlarni!”

¹²Bobilga qarshi bayroq koʻtaring. Qoʻriqchilar safini kuchaytiring, Soqchilar qoʻying. Pistirma qoʻyishga tayyor turing. Egamiz rejalarini amalga oshiradi, Bobilga qarshi aytganlarini bajaradi.

¹³Ey serob suvlar boʻyidagi shahar, Boy xazinaga ega boʻlgan shahar! Sening kuning bitdi. Hayoting ipi uzildi[363].

¹⁴Sarvari Olam Oʻz nomi bilan qasamyod qilib dedi: “Chigirtkaday[364] gala — gala dushmanni senga qarshi yuboraman. Ular yurting uzra gʻolibona hayqiradi.”

¹⁵Egamiz qudrati ila yerni yaratdi, Donoligi ila dunyoni bunyod etdi, Idroki ila osmon gumbazini oʻrnatdi.

¹⁶Uning ovozidan osmondagi suvlar gulduraydi, U dunyoning toʻrt burchidan bulutlarni olib keladi. Yomgʻir yogʻdirganda chaqmoq chaqtiradi, Omborlaridagi shamollardan estiradi.

¹⁷Uning oldida hamma odamlar ahmoq va nodondir. Zargarlar yasagan butlari tufayli sharmanda boʻlishadi. Yasagan sanamlari soxtadir, ularning joni yoʻq.

¹⁸Bu betayin butlar aldamchidir. Ularni jazolaganim zahoti yoʻq boʻlishadi.

¹⁹Yoqubning Xudosi esa unday emas. Butun borliqni U yaratgan, Isroil qabilasini Oʻziga mulk qilgan. Uning nomi Sarvari Olamdir.

²⁰Egamiz shunday deydi: “Ey Bobil, sen Mening bolgʻam, urush qurolimsan. Sen bilan ezdim Men xalqlarni, Sen bilan parchaladim shohliklarni.

²¹Sen bilan pachaqladim otlaru chavandozlarni, Majaqladim jang aravalariyu aravakashlarni.

²²Sen bilan ezdim erkagu ayollarni, Sen bilan urdim yoshu qarilarni, Sen bilan oʻldirdim yigitu qizlarni,

²³Sen bilan ezdim choʻponlaru ularning suruvlarini, Sen bilan urdim dehqonlaru ularning hoʻkizlarini, Sen bilan oʻldirdim hokimlaru a’yonlarni.”

²⁴Egamiz shunday demoqda: “Quddusga qilgan barcha yovuzliklari uchun Bobilliklarni[365] va butun Bobil yurtini sizning koʻzingiz oldida jazolayman.

²⁵Ey Bobil, sen togʻday boʻlib, Butun dunyoni vayron qilding. Shu bois Men senga qarshiman! — deb aytmoqda Egamiz. — Men senga qarshi qoʻl koʻtaraman, Seni qoyalardan pastga dumalatib yuboraman, Kuyib xarob boʻlgan toqqa aylantiraman.

²⁶Sendan na tamal toshi, Na poydevor uchun tosh olinadi. Sen to abad tashlandiq boʻlib qolasan.” Egamizning kalomi shudir.

²⁷Bayroqni koʻtaring! Xalqlarga burgʻu chaling! Xalqlarni Bobilga qarshi urushga tayyorlang. Ararat, Minnax va Ashkanoz shohliklarini[366] Unga qarshi toʻplang. Bobilga qarshi jang qiladigan lashkarboshini tayinlang, Chigirtka galasiday koʻp otlar keltiring.

²⁸Xalqlarni Bobilga qarshi urushga tayyorlang. Midiya shohlarini, ularning hokimu a’yonlarini, Ularning qoʻli ostidagi hamma yurtlarni Bobilga qarshi safarbar qiling.

²⁹Butun dunyo dagʻ — dagʻ titramoqda, Zero, Egamiz Oʻz rejasini amalga oshirmoqda. Bobil vayron boʻladi, Evoh, kimsasiz huvullab qoladi.

³⁰Bobil sipohlari jangdan voz kechishadi, Qal’alarida pisib yotishadi. Ularning madori qolmaydi, Ayollarday zaif boʻlib qolishadi. Bobilning dushmani shahar binolariga oʻt qoʻyadi, Shahar darvozalarini buzadi.

³¹Chopar ketidan chopar yugurar, Xabarchi ketidan xabarchi kelar. Bobil shohiga shunday xabar yetkazmoqchi ular: “Shahringiz quladi,

³²Daryoning kechuv joylari qoʻlga olindi, Toʻqaylarga oʻt qoʻyildi[367], Sipohlar sarosimaga tushdi.”

³³Isroil xalqining Xudosi — Sarvari Olam shunday demoqda: “Qiz[368] Bobil xirmondagi bugʻdoyga oʻxshaydi. Tez orada oʻrim vaqti yetib keladi, Hademay u yanchiladi[369].”

³⁴Quddus aholisi shunday dedi: “Bobil shohi Navuxadnazar[370] bizni gʻajidi, ezdi, Bizni boʻm — boʻsh idishday qilib qoʻydi. U ajdarhoday bizni yamladi, Lazzatli narsalarimiz bilan qornini toʻygʻizdi, Keyin esa bizni tupurib tashladi.”

³⁵Quddus aholisi aytsin: “Majaqlangan tanam[371] uchun Bobildan oʻch olinsin”, deya. Sion aholisi aytsin: “Toʻkilgan qonim uchun Bobilliklar jazolansin”, deya.

³⁶Egamiz shunday demoqda: “Men da’voingizni eshitib, Sizni himoya qilaman. Sizlar uchun oʻch olaman. Bobilning bulogʻini quritaman, Daryolarini suvsiz qoldiraman.

³⁷Bobilni bir uyum toshga aylantiraman, Chiyaboʻrilarning makoni qilaman. Bobilning ahvolidan odamlar dahshatga tushadi, Uni koʻrganlar qotib qoladi. U yerda biron kimsa yashamaydi.

³⁸Bobilliklar sher kabi oʻkirishadi, Sher bolalariday boʻkirishadi.

³⁹Ayni qizishgan paytlarida Ularga oʻtkir ichimlikdan ichiraman. Ularni mastu[372] shodon qilaman. Soʻng ular abadiy uyquga ketishadi, Hech qachon uygʻonishmaydi, — deb aytmoqda Egamiz. —

⁴⁰Men ularni qoʻzichoq, qoʻchqor va takalarday Qassob oldiga olib boraman.

⁴¹Eha, Bobil[373] shahri quladi — ya! Butun dunyo gʻururi magʻlub boʻldi — ya! Uning qismatidan xalqlar dahshatga tushdi!

⁴²Dengiz suvlari Bobilni bosdi, Shovqin toʻlqinlar uni qoplab oldi.

⁴³Ana, shaharlari xarob boʻldi, Ular choʻlu sahroga aylandi. Endi u yerda hech kim yashamaydi, Inson qadami u yerga yetib bormaydi.

⁴⁴Bobil xudosi Belni[374] Men jazolayman, Yutganlarini ogʻzidan chiqaraman. Endi xalqlar uning oldiga oqib bormaydi, Bobil devorlari qulab tushadi.

⁴⁵Ey xalqim, chiqib ket u yerdan! Qochib qol Mening qahrimdan! Joningni qutqargin!

⁴⁶Yurtdagi mish — mishlar sizni qoʻrqitmasin, Yuragingizga gʻulgʻula solmasin. Bir yil bir mish — mish boʻladi, Keyingi yili boshqasi chiqadi. Ha, yurtdagi zoʻravonlik haqida mish — mish chiqadi, Shohlar orasidagi urush haqida mish — mish tarqaladi.

⁴⁷Mana, shunday kun kelyaptiki, Men Bobilning soxta xudolarini jazolayman. Butun Bobil yurti sharmanda boʻladi, Koʻchalarida jasadlar yotadi.

⁴⁸Ha, Bobilga qarshi shimoldan Qirgʻin keltiruvchi keladi. Shunda Bobilning halokatidan Yeru osmon shodlanadi, U yerdagi barcha mavjudot xursand boʻladi, — deb aytmoqda Egamiz. —

⁴⁹Axir, Bobil Isroil xalqining umriga zomin boʻldi, Yer yuzidagi koʻp xalqlarning boshini yedi, Ana endi uning qilmishlari oʻzining boshiga yetdi.”

⁵⁰Ey qilichdan omon qolganlar! Oʻylanmasdan qochinglar! Olis yurtda Egamizni eslanglar. Quddus haqida oʻylanglar.

⁵¹Sizlar aytasiz: “Sharmanda boʻldik. Haqoratlar eshitdik. Yuzimiz shuvut. Axir, Egamiz uyining muqaddas xonalarini Ajnabiylar oyoq osti qildi.”

⁵²Egamiz esa shunday demoqda: “Mana, shunday kunlar kelyaptiki, Men Bobilning soxta xudolarini jazolayman. Butun yurt uzra Yaradorlarning faryodlari eshitiladi.

⁵³Bobil osmonga chiqib olsa ham, Baland qal’asini mustahkam qilsa ham, Men unga qarshi qirgʻin keltiruvchini yuboraman.” Egamizning kalomi shudir.

⁵⁴Ana, Bobil xalqidan dodu faryod koʻtarilmoqda, Bobil yurtidan vayron — talqon sadolari kelmoqda.

⁵⁵Egamiz Bobilni vayron qiladi, Shangʻillagan tovushini oʻchiradi. Dushmanlar shiddatli toʻlqinlarday oʻkiradi, Quloqni teshgudek qilib baqiradi.

⁵⁶Qirgʻin keltiruvchi Bobilga qarshi chiqadi, Sipohlarini asirlikka oladi. Kamonlarini sindiradi. Axir, Egamiz jazolaydigan Xudodir, U rosa Bobilning jazosini beradi.

⁵⁷Xudo Shohdir, Sarvari Olamdir Uning nomi. U shunday demoqda: “Mast qilaman Bobil amaldorlariyu donishmandlarini, Hokimlarini, a’yonlariyu jangchilarini. Ular abadiy uyquga ketadilar, Hech qachon uygʻonmaydilar.”

⁵⁸Sarvari Olam shunday demoqda: “Bobilning qalin devorlari yer bilan yakson qilinadi, Baland darvozalari yondirib tashlanadi. Ellar behuda tinkasini quritadi. Xalqlarning ter toʻkib erishganlari olovga yem boʻladi.”

⁵⁹Yahudo shohi Zidqiyo hukmronligining toʻrtinchi yili[375]. Shoh Zidqiyo Bobilga bormoqchi boʻlib yoʻlga otlanganda, Yeremiyo paygʻambar Neriyoning oʻgʻli, Maxsiyoning nevarasi Sarayoga koʻrsatmalar berdi. Sarayo bu safarda javobgar bir shaxs edi.

⁶⁰Yeremiyo oʻrama qogʻozga[376] Bobilning boshiga tushadigan barcha kulfatlarni batafsil bayon qilib yozdirgan edi.

⁶¹U Sarayoga shunday tayinladi: — Bobilga borganingdan keyin, oʻrama qogʻozdagi hamma soʻzlarni xalqqa baland ovozda oʻqib ber.

⁶²Keyin esa shunday xitob qil: “Ey Egam, Sen Oʻzing bu joyni vayron qilaman, degansan. Bu yerda na odamlar, na hayvonlar yashaydi, bu joy to abad tashlandiq boʻladi, deb aytgansan.”

⁶³Oʻrama qogʻozni oʻqib boʻlganingdan keyin, unga bir tosh bogʻlagin — da, Furot daryosining oʻrtasiga uloqtirib yubor.

⁶⁴Keyin shunday deb ayt: “Bobil ham shunga oʻxshab choʻkib ketadi. Egamiz Bobilga yogʻdiradigan kulfatlar tufayli Bobil hech qachon oʻnglanmaydi. Uning butun aholisi oʻladi.” Yeremiyoning bashoratlari tugadi.