Read Uzbek Muqaddas Kitob Yeremiyo 52 Bible Online

Yeremiyo 52 - Uzbek Muqaddas Kitob bible

Yeremiyo 52

¹Zidqiyo yigirma bir yoshida shoh boʻldi[377] va Quddusda oʻn bir yil hukmronlik qildi. Onasining ismi Xamutal boʻlib, Libnalik Yeremiyoning[378] qizi edi.

²Zidqiyo ham, Yohayiqim kabi, Egamiz oldida qabih ishlar qilgani uchun

³Egamiz Quddus va Yahudo xalqidan gʻoyat gʻazablangan, oqibatda ularni Oʻz huzuridan quvib yuborgan edi. Zidqiyo Bobil shohiga qarshi isyon koʻtardi.

⁴Zidqiyo hukmronligining toʻqqizinchi yili oʻninchi oyining[379] oʻninchi kunida Bobil shohi Navuxadnazar[380] Quddusga qarshi bor lashkarini tortib kelib, shaharni qamal qildi. Shahar devori atrofida qamal inshootlari[381] yasatdi.

⁵Shoh Zidqiyo hukmronligining oʻn birinchi yiligacha[382] shahar qamalda qoldi.

⁶Toʻrtinchi oyning[383] toʻqqizinchi kuni shaharda ocharchilik shu qadar kuchaydiki, xalq bir burda nonga zor boʻldi.

⁷Bobilliklar[384] Quddus devorini yorib kirdilar. Ular Quddusni har tomondan qurshab olishgan boʻlsalar — da, Yahudo sipohlari shoh bilan birga qochib ketdilar. Ular tunda saroyning bogʻi yaqinidagi ikki devor orasidagi darvozadan chiqib, Iordan vodiysi[385] tomonga qochgan edilar.

⁸Ammo Bobil[386] sipohlari shohning orqasidan quvib, Yerixo tekisligida unga yetib oldilar. Butun lashkar esa shohni tashlab qochib ketdi.

⁹Bobil sipohlari shoh Zidqiyoni ushlab, Xomat yurtidagi Rivlo shahriga[387], Bobil shohi huzuriga olib keldilar. Bobil shohi Zidqiyoni hukm qildi.

¹⁰Rivloda Zidqiyoning koʻzi oldida hamma oʻgʻillarini, soʻng Yahudo a’yonlarini qatl qildi.

¹¹Zidqiyoning esa koʻzlarini oʻyib, uni kishanlab qoʻydi. Bobil shohi uni oʻzi bilan Bobilga olib ketdi. Zidqiyo umrining oxirigacha zindonda yotdi.

¹²Bobil shohi Navuxadnazar hukmronligining oʻn toʻqqizinchi yili beshinchi oyining[388] oʻninchi kunida Bobil shohi xizmatidagi qoʻriqchilar sardori Nabizaradon Quddusga kirdi.

¹³U Egamizning uyiga, shoh saroyiga, har bir hashamatli imoratga, Quddusdagi hamma uylarga oʻt qoʻydi.

¹⁴Qoʻriqchilar sardori boshchiligida butun Bobil lashkari Quddus devorlarini yiqitdi.

¹⁵Nabizaradon ba’zi qashshoqlarni, shaharda tirik qolganlarni, Bobil shohi tomonga oʻtgan qochoqlaru qolgan — qutgan hunarmandlarni[389] asir qilib olib ketdi.

¹⁶Uzumchilik va dehqonchilik bilan mashgʻul boʻlsinlar deya, hech vaqosi yoʻq, qashshoq odamlardan ba’zilarinigina qoldirdi, xolos.

¹⁷Bobilliklar Egamizning uyidagi bronza ustunlarni, aravalarni, bronza hovuzni[390] parchaladilar, bronzaning hammasini Bobilga olib ketdilar.

¹⁸Egamizning uyida xizmat paytida ishlatiladigan buyumlarni — qozonlarni, kuraklarni, qaychilarni, togʻorachalar va kurakchalarni, barcha bronza ashyolarni ham olib ketdilar.

¹⁹Qoʻriqchilar sardori Nabizaradon oltin va kumushdan yasalgan togʻoralarni, olovkuraklarni, togʻorachalarni, tovoqlarni, chiroqpoyalarni, kurakchalarni va sharob nazri uchun ishlatiladigan idishlarni ham olib ketdi.

²⁰Egamizning uyi uchun shoh Sulaymon yasattirgan ikkita ustunga, hovuzga, hovuz ostidagi oʻn ikkita buqaga va aravalarga[391] behisob bronza sarf qilingan edi.

²¹Har bir ustunning balandligi 18 tirsak, tevaragi 12 tirsak[392] edi. Ustunlarning ichi kavak boʻlib, devorlarining qalinligi toʻrt enli edi.

²²Ikkala ustunning tepasida bittadan ustunqosh bor edi. Ustunqoshlarning balandligi 5 tirsakdan[393], atroflari bronzadan yasalgan toʻrsimon bezak va anor[394] tasviri bilan bezatilgan edi.

²³Ustunqoshning har bir tomoniga toʻqson oltita anor tasviri tushirilgan edi. Toʻrsimon bezakdagi anorlarning soni hammasi boʻlib yuzta edi.

²⁴Qoʻriqchilar sardori Nabizaradon oliy ruhoniy Sarayoni, undan keyingi ruhoniy Zafaniyoni va uchta darvozabonni ham asirga oldi.

²⁵Quddusda qolgan sipohlarning lashkarboshisini, shohning yettita shaxsiy maslahatchisini, xalqni lashkar safiga yozgan lashkarboshining kotibini va xalqdan shaharda qolgan oltmish kishini ham bandi qildi.

²⁶Ularning hammasini Rivloga, Bobil shohi huzuriga olib keldi.

²⁷Bobil shohi ularni Xomat yurtida — Rivloda qatl qildi. Shunday qilib, Yahudo xalqi oʻz yurtidan surgun boʻldi.

²⁸Navuxadnazar surgun qilgan xalqning soni quyidagichadir: hukmronligining yettinchi yili[395] 3023 nafar yahudiyni,

²⁹oʻn sakkizinchi yili[396] Quddus aholisidan 832 nafar kishini,

³⁰yigirma uchinchi yili[397] qoʻriqchilar sardori Nabizaradon Yahudodan 745 nafar kishini surgun qildi. Hammasi boʻlib surgun qilingan xalqning soni 4600 kishi edi.

³¹Yahudo shohi Yohayixin Bobilga surgun qilinganiga oʻttiz yetti yil boʻlganda, Bobil taxtiga Evilmardux oʻtirdi[398]. Evilmardux oʻsha yilning oʻn ikkinchi oyi[399] yigirma beshinchi kuni Yahudo shohi Yohayixinga marhamat qilib, uni zindondan olib chiqdi.

³²Unga yaxshi munosabatda boʻldi, Bobilga surgun qilingan boshqa shohlardan koʻra, balandroq martaba berdi.

³³Shunday qilib, Yohayixin zindon kiyimlarini yechdi. Umr boʻyi doimo Bobil shohining dasturxonidan taom yedi.

³⁴Umrining oxirigacha Bobil shohi tarafidan kundalik ehtiyoji har doim qondirildi.