Read Uzbek Muqaddas Kitob Yeremiyo 7 Bible Online

Yeremiyo 7 - Uzbek Muqaddas Kitob bible

Yeremiyo 7

¹Yeremiyoga Egamizning quyidagi soʻzi ayon boʻldi:

²“Uyimning darvozasi oldiga bor. Oʻsha yerda turib, baland ovozda shunday deb ayt: «Ey jamiki Yahudo xalqi! Ey Egamizga sajda qilish uchun mana bu darvozadan kirayotgan xaloyiq! Egamizning gaplarini eshitinglar.

³Isroil xalqining Xudosi — Sarvari Olam shunday demoqda: yomon yoʻlingizdan qaytinglar. Turmush tarzingizni oʻzgartiringlar. Shundagina bu yurtda yashashingizga ijozat beraman.

⁴‘Egamizning Ma’badi shu yerda! Mana, Egamizning Ma’badi, shuning uchun hech qanday xavf — xatar yoʻq!’ degan yolgʻon soʻzlarga ishonmang.

⁵Agar haqiqatan yomon yoʻlingizdan qaytsangiz, turmush tarzingizni oʻzgartirsangiz, bir — biringizga nisbatan adolatli boʻlsangiz,

⁶musofirlarga, yetim va bevalarga zulm qilmasangiz, bu yurtda aybsiz odamning qonini toʻkmasangiz, boshingizga falokat keltiradigan boshqa xudolarga ergashmasangiz,

⁷bu yerda qolishingizga ijozat beraman. Men ota — bobolaringizga abadiy mulk qilib bergan bu yurtda sizlar yashayverasizlar.

⁸Ammo sizlar yolgʻon soʻzlarga ishonyapsizlar.

⁹Oʻgʻrilik qilyapsizlar, odam oʻldiryapsizlar, zino qilyapsizlar, yolgʻondakam qasam ichyapsizlar, Baalga nazrlar atab, oʻzingiz bilmagan xudolarga ergashyapsizlar.

¹⁰Shunday ekan, nima uchun sizlar Mening nomim bilan atalgan uyimga[51] kelib, ‘Biz xavf — xatardan xolimiz!’ deb aytyapsizlar?! Bunday jirkanch ishlarni davom ettirish uchunmi?!

¹¹Aytinglar — chi, Mening nomim bilan atalgan bu uy sizlar uchun qaroqchilar uyasi boʻlib qoldimi?! Qilgan barcha ishlaringizni Men Oʻz koʻzim bilan koʻrib turibman — ku! — deb aytmoqda Egamiz. —

¹²Qani, Shiloʻ shahriga[52] boringlar! Men ulugʻlanishim uchun ilk bor oʻsha joyni tanlagan edim. Ammo xalqim Isroilning qabihliklari tufayli oʻsha joyni ne ahvolga solganimni koʻrib qoʻyinglar.

¹³Bunday yovuz ishlarni qilayotganingizda, Men sizlarga qayta — qayta gapirdim. Ammo sizlar gaplarimga quloq solmadingiz. Sizlarga xitob qildim, ammo javob bermadingiz, — deb aytmoqda Egamiz. —

¹⁴Shunday ekan, Men Shiloʻni ne koʻyga solgan boʻlsam, Oʻz nomim bilan atalgan uyimni ham oʻsha ahvolga solaman. Sizlar umid bogʻlagan bu uyimni va ota — bobolaringizga bergan bu yurtni Shiloʻning ahvoliga tushiraman.

¹⁵Qondoshingiz Efrayim[53] xalqini uloqtirganimday, sizlarni ham Oʻz huzurimdan uloqtirib tashlayman.»”

¹⁶Egamiz shunday dedi: “Ey Yeremiyo, sen bu xalq uchun ibodat qilma! Ular uchun faryod qilib, iltijo qilma! Ularni deb, Menga yolvorma! Men senga quloq solmayman.

¹⁷Yahudo shaharlarida, Quddus koʻchalarida ular nimalar qilayotganini koʻrmayapsanmi?!

¹⁸Bolalar oʻtin yigʻishadi, otalari olov yoqishadi, xotinlar esa xamir qorib, samo qirolichasiga[54] atab nonlar yopishadi. Gʻazabimni qoʻzgʻatish uchun begona xudolarga sharob nazrini keltirishadi.

¹⁹Bu qilmishlari bilan ular Menga emas, oʻzlariga zarar keltirmoqda — ku! — deb aytmoqda Egamiz. — Oʻzlarini sharmanda qilishmoqda — ku!

²⁰Shu sababdan, Men, Egangiz Rabbiy, aytamanki, Men qahru gʻazabimni bu zaminga, insonlaru hayvonlarga, daladagi daraxtlaru ekinlarga sochaman. Gʻazabim soʻnmas olovday yonadi.”

²¹Isroil xalqining Xudosi — Sarvari Olam shunday demoqda: “Sizlar qurbonliklarning goʻshtini yeysizlar, kuydiriladigan qurbonliklaringizning goʻshtini ham oʻzlaringiz yeyaveringlar[55].

²²Men ota — bobolaringizni Misrdan olib chiqqanimda ularga nafaqat qurbonliklar va kuydiriladigan qurbonliklarga oid amrlar bergan edim,

²³balki ularga yana shunday amr bergan edim: «Menga itoat qiling! Shunda Men sizning Xudoyingiz, sizlar esa Mening xalqim boʻlasizlar. Faqat Men koʻrsatgan yoʻldan yuringlar, shunda baxtiyor boʻlasizlar.»

²⁴Ammo ular itoat qilishni ham, quloq solishni ham xohlamadilar. Yovuz yuraklarining oʻjarliklariga itoat qildilar. Oldinga yurmay, orqaga ketdilar.

²⁵Ajdodlaringiz Misrdan chiqqan kundan boshlab shu kunga qadar, Men paygʻambar qullarimni oldingizga ketma — ket joʻnatdim.

²⁶Ammo sizlar Menga quloq ham solmadingizlar, e’tibor ham bermadingizlar. Oʻjarlikda ota — bobolaringizdan ham oʻtib tushdingiz, qilgan ishlaringiz ularnikidan ham yovuzroq.”

²⁷Egamiz shunday dedi: “Ey Yeremiyo, sen borib, aytganlarimning hammasini ularga yetkazasan, lekin ular senga quloq solishmaydi. Ularga xitob qilasan, ammo ular senga javob berishmaydi.

²⁸Shuning uchun sen ularga shunday deb ayt: «Sizning xalqingiz Egasi Xudoga itoat qilmadi, Uning gapiga kirmadi. Haqiqat qolmabdi, ogʻzingizdan haq soʻz chiqmaydigan boʻldi.

²⁹Ey Quddus aholisi, aza tuting! Sochingizni qirib tashlang[56]. Marsiyangiz yalang qirlar uzra nola qilsin. Zero, Egamizning toqati toq boʻldi, U bu naslni rad etib, tashlab ketdi.»”

³⁰Egamiz shunday demoqda: “Yahudo xalqi oʻzining Egasi oldida qabihliklar qildi. Ular Mening nomim bilan atalgan uyimga makruh butlarini oʻrnatdilar. Uyimni harom qildilar.

³¹Shunisi yetmagandek, Xinnum soyligidagi[57] Tofatda sajdagohlar[58] qurdilar. U yerda oʻz oʻgʻilu qizlarini olovda kuydirdilar. Ammo Men ularga buni amr qilmaganman, bunaqasini xayolimga ham keltirmaganman.

³²Qarab turing! — deb aytmoqda Egamiz. — Shunday kunlar keladiki, odamlar bu joyni Tofat yoki Xinnum soyligi deb atamaydi. Bu joy «Qirgʻin vodiysi» deb nom oladi. U yerda koʻp murdalar dafn qilinadi, murdalar koʻpligidan qabrlarga joy yetmay qoladi.

³³Bu xalqning jasadlari qushlarga va yovvoyi hayvonlarga yem boʻladi, hech kim ularni haydamaydi.

³⁴Yahudo shaharlarida va Quddus koʻchalarida shodu xurramlik sadolari boʻlmaydi, kelin — kuyovning ovozi eshitilmaydi. Bu yurt huvullab qoladi.”